Read Sukuma Bible 2015 – Bibilia Ilagano Lya Kale 2015 Matayo 7 Bible Online

Matayo 7 - Sukuma Bible 2015 – Bibilia Ilagano Lya Kale 2015 bible

Matayo 7

¹“Mutabalamulage a biching'wi, hū mutalizo lamulwa.

²Nguno ūmo mukūbalamulīlaga banhū bangī, na a bing'we h'ūmo mukūlamulīlwa. Nīyo ī ngelekelo īyo mukūbagelekelaga bangī, h'īyo mukūgelekelwa na a bing'we.

³Nibūlī ulilola kasasala kī palala ako kalī mu liso lya ng'wiyo, alīyo ū bebe ū mu liso lyako gūlīmo ngamba, ūyo ūtūgūlonjaga?

⁴Ī gīsī, ūlū gūlīmo ngamba ū mu liso lyako ū bebe, ūkūdūla ginehe ū kūng'wīla ū ndūgūyo gīkī, ‘Lembeelaga nakwīngīje kasasala ka kapalala, kalīmo ū mu liso lyako?’

⁵Bebe ng'wibeeleja, gwīnjage tame ū ngamba ūyo gūlīmo ū mu liso lyako, hū ūkūdūla ū kūbona chiza, ūng'wīngīje nū ng'wiyo a kasasala ka kapalala ako kalīmo ū mu liso lya ng'wiyo!

⁶Ī shikolo ī shawiza mutajinhage mva, nī shikolo shing'we ī sha mpango ntaale[1] yaya ū kūshiponeja ngulubī, nguno jikūshipandagīla dūhū shisosohale, hama jimugalūkīle jimugulaje!”

⁷“Lombagi mukwinhwa, koobagi mukūpandīka, godagulagi mukūlugūlīlwa.

⁸Nguno būlī ng'wene ūyo akalombaga akinhagwa, nū yūyo akakoobaga akapandīkaga, hama nū yūyo akagodagulusa ha mīta akalugūlīlagwa.

⁹Ī gīsī alīho munhū kī ū mu bing'we ūyo ashikile kūlomva nūmbū[2] na ng'wana wakwe, nang'hwe ūng'winha iwe?

¹⁰Nūūlū hamo ūlomva ndīlo, nani ūyo adūgije kūng'winha nzoka?

¹¹Na lūūlū manīlagi henaho; a bing'we nūūlū īkī mulī babūbi, nahene mumanile ū kūbinha a baana bing'we shikolo shawiza, alu sing'we ūyo ali ng'wigulu atiira yawiza kumtinda a bing'we! Nguno ng'wene akūbinha shakwinha shawiza no pye abo bakūnombaga.

¹²Kwike shing'wigeleelilwe kūbīītīla a banhū gīt'ūmo mutogilwe bang'wītīle a bing'we, nguno h'ūmo shihayīlile ī shilagīlo na a bahangi.”

¹³“Bītīlagi mu nzīla mhine, nguno ī likūūwa ī ligalī nū mita ū ngalī shijile mu kūyagala; na balī bingī abo bakabītīlaga mo.

¹⁴Alīyo ī nzīla īyo ījile mu būpanga, ī yene ngololoku; kwike mhine, pyī nū mīta mpine. Hama balī bagehu abo bakībonaga!”

¹⁵“Bilang'hanagi a bahangi a balemba lembi, abo bakūng'wizīīlaga gītī shiinū ng'wikūnza lya ng'holo, alīyo ū mu gatī balī mhūge ndaki.

¹⁶A benabo mukūbamanīla kū matwajo gabo. Angū, a banhū badūgije kūyoba mizabibu kwīngīīla mu migwata, nūūlū shisuumo sha ntini kwīngīīla mu malūla?

¹⁷H'ūmo ījīlile, ū ntī gwawiza gūkatwajaga matwajo gawiza, nū ntī ū gwabūbi nago gūkatwajaga matwajo gabubi.

¹⁸Ū ntī ū gwawiza gūtūdūla kūtwaja matwajo mabi, nū ntī ū gwabūbi nago gūtūdūla kūtwaja matwajo gawiza.

¹⁹Būlī ntī ūyo gūtatwajaga matwajo gawiza gūkabbutagwa gwaponyiwa mu moto.

²⁰Hūna lūūlū, mukūbamanīla kū matwajo gabo.”

²¹“Ītī gīkī pye abo bakanitanaga Seeba, Seeba, bakwingīla ū mu būtemi bo ng'wigūlū, alīyo dūhū ūyo akīītaga īyo yīnyegije Baba ūyo alī ng'wigūlū.

²²Ū mu lūshikū lwenūlo bingī bakūnidayīīla, balīhaya gīkī, ‘Seeba, Seeba, twalī tūtahangaga mu lina lyako? Na hangī twalī tūtapeejaga masamva, na kūbeeja milīmo mitaale mu lina lyako?’

²³Nane nakūbashokeja nalībawīla hape gīkī, ‘Natamumanile nūūlū hado a bing'we bīīti ba shibi, nīngīlagi aha!’”

²⁴“Ali lūūlū, būlī ng'wene ūyo ūyigwa ī mihayo yane hūna wīdīlīla na kwīshikīlīja, akwikolanījiwa mnū wa masala, ūyo akazenga numba yakwe ya madafaali h'itale.

²⁵Hūna yūtūla mbula ya kuhūmiila ihuumo, kūnū na miyaga īkūhembaga; pyī ī shose shenīsho shūyikīīla ī numba yenīyo, alīyo ītagwile; nguno ū nsingi gwayo gwalī h'itale.

²⁶Kwike būlī ng'wene ūyo ūyigwa ī mihayo yane alīyo ūleka ū kwīdīlīla, nūūlū kwīshikīlīja, ū ng'wene akwikolanījiwa na munhū mbūūlī, ūyo akazenga numba yakwe ha maseni.

²⁷Yahayūtūla mbula ya kuhūmiila ihuumo, kūnū na miyaga īkūhembaga; aho pyī ī shose shenīsho shayikīīla ī numba yenīyo, īkagwa na kagwīle ka kūkamaaja no!”

²⁸Ū Yesu aho wamala ū kūsomboola ī mihayo ī yose īyī, pye a mabita ga banhū abo bandegelekaga bakabūkumya na kakumīje kataale no ū būlangi bokwe.

²⁹Nguno wabalangaga na būdūla, walī atabalangaga gīt'ūmo bīītīlaga a balangi babo ba shilagīlo.