Read Sukuma Bible 2015 – Bibilia Ilagano Lya Kale 2015 Maliko 11 Bible Online

Maliko 11 - Sukuma Bible 2015 – Bibilia Ilagano Lya Kale 2015 bible

Maliko 11

¹Bahayūtumbya Yelusalemu, būbiza bashika Betifage na Betania, kū lūgūlū lo mizeituni, ūtūma babīlī ba bahemba bakwe.

²Ūbawīla gīkī, “Jagi ū mu chalo īsho shilī kū būtongi wing'we shenīsho, ūlū mulashike mo, haho na haho mukūbona nzobe mūūga īkūngilwe. Ītaalī kūdamhīlwa na munhū nūūlū ūmò, ītaligūlīlagi muyenhe.

³Ose ose ūyo alamuwīle gīkī, ‘Nibūlī mulīīta gīko?’ Hayagi gīkī, ‘Seeba alī na nīmo nayo, haha yenīyī dūhū akwīshosha hangī aha.’”

⁴Aho baja būsanga ng'hana mūūga ya nzobe, īkūngilwe hanze ya mita, hihī n'ipanda, bandya kwītaligūlīla.

⁵Bamò ba banhū abo baalī bīmīīla haho hihī nayo būbabūja gīkī, “Nibūlī mulīyītaligūlīla ī nzobe?”

⁶Nabo būbashokeja gīt'ūmo walī wabawīlīla ū Yesu, būbaleka būja.

⁷Hūna būng'wenhela ū Yesu ī mūūga ya nzobe yenīyo, aho bīshisha bītūūlīla myenda yabo a ha ngongo, ūdamhīla.

⁸Banhū bingī bandya kūja balamba myenda yabo ū mu nzīla, bangī būyūbbuta matambī mado mado ga mitī kūfuma mu malaale, bagaponangīja ū mu nzīla.

⁹Abo baalī kū būtongi, na a babo bakūūbījaga bandya kūhamuka balīhaya, “Hosana! Akumīlījiwe ūyo aliza mu lina lya ng'wa Seeba.

¹⁰Būkumīlījiwe ū būtemi bo nkūlūgenji wise Daūdi ūbo būliza. Akūjiwe ū Mulungu wa ng'wigūlū!”

¹¹Aho washika ū mu Yelusalemu wingīla mu hekalu, wandya kūshilola lola pyī ī shikolo īsho shalīmo. Alīyo īkī yalī mhīndī, ūfuma wīnga nabo abo ikūmi na babīlī, ūja Betania.

¹²A ha ntondo yaho, aho balīfuma Betania, ū Yesu walī atuubile.

¹³Wahayūloleela ntini gūlī na madūūtū, ūliga ho kūlola ūlū ninga gūlī na matwajo gose gose. Alīyo aho washika ho atabonile shose shose, ūlū ītī madūūtū dūhū, nguno ī likanza lya matwajo ga mitini lyalī lītaalī ū kūshika.

¹⁴Ūgūwīla gīkī, “Kūfuma lelo atīho wa kūlya matwajo gako hangī nūūlū na hado!” A bahemba bakwe nabo bigwa ūmo akahayīla.

¹⁵Aho bashika ī Yelusalemu, ū Yesu wingīla ū mu hekalu wandya kūbapeeja abo bīītīlaga mo byashala ja kūjinja na kūgūla. Ūjisalingūla nī meza ja bakaabanya ba hela, pye na a masumbī ga bajinja ba mhunda.

¹⁶Nīyo atazunīlīgije nūūlū ūmò kūbīta ū mu hekalu abūūkije shikolo shose shose sha byashala.

¹⁷Ūbalanga alībawīla, “Ītandīkilwe gīkī, ‘ī numba yane īkwitanwa numba y'ilomba kūlwa mahanga gose?’ Ni ginehe a bing'we ng'wīgalūkije kūbiza ipilinga lya basambo?”

¹⁸Aho bigwa a bagabīji bataale na a balangi ba shilagīlo bogoha, bandya kūkooba nzīla ya kūnyagaja, nguno ū būlangi bokwe būkabinha kūkumya pye a banhū.

¹⁹Aho yabiza mhīndī, ū Yesu na a bahemba bakwe būja hanze ya nzengo.

²⁰Ī ntondo yaho ī dilū aho balībīta, būgūbona ū ntini gūūmaga kwandīja ng'witina.

²¹Ū Petelo wizūkwa, hūna ūng'wīla ū Yesu gīkī, “Nangi aligūlolage ū ntini ūyo ūkagūzuma, gūūmaga!”

²²Nang'hwe ū Yesu ūshosha ūbawīla, “Nzunyagi Mulungu.[2]

²³Nalīmuwīla gwa ng'hana gīkī, munhū ose ose ūyo ūlūwīla nūūlū lūgūlū gīt'ūlū gīkī, ‘Dubbūkaga ūje ūkagwe mu nyanza’; ūlū atī na kūhana hana ū mung'holò yakwe, alīyo ūbiza na kūsanya gīkī, ūyo alīgūhaya gūkūbiza ho, ng'hana akūshikīlīgījiwa.

²⁴Hūna lūūlū nalīmuwīla gīkī, shose shose īsho mukūkooba mu nzīla ya kūlomba, sanyagi gīkī, ng'wanukūlaga; na ng'hana shikūbiza shing'we.

²⁵Nīyo hangī ūlū ng'wīmīīla kūlomba lekejagi ūlū mulī na mhayo na munhū ose ose. Ūlū ng'wīta gīko ning'we akūmulekeja ū būsobya wing'we ū Sīng'we ūyo alī ng'wigūlū. [

²⁶Alīyo ūlū mutūdūla ū kūlekeja, ning'we atūmulekeja ū būsobya wing'we ū Sīng'we ūyo alī ng'wigūlū.]”

²⁷Hūna būshikīīla hangī ū mu Yelusalemu, aho alīshimīza shimīza mu hekalu, kwimanīla bansanga bagabīji bataale na balangi ba shilagīlo, hamò na banamhala.

²⁸Būmūja gīkī, “Bebe īyo ūkwīyītaga yenīyī, ūkwīyītaga mu būdūla kī? Nīyo hangī nani ūyo wakwinhile ū būdūla bo kwīta gīko?”

²⁹Nang'hwe ū Yesu ūbawīla gīkī, “Nane namubūje mhayo gūmò, ūlū mulanishokeje nū nene nakūmuwīla ī yenīyī nakwīyītaga mu būdūla kī.

³⁰Ū būbatīīja bo ng'wa Yohana boolī būfumile ng'wigūlū nūūlū kū banhū? Nishokejagi!”

³¹Bandya kwilūnjalūnja baliwīla gīkī, “Ūlū tūlahaye boolī būfumile ng'wigūlū, akūtūbūja, ‘Nibūlī lūūlū mutīzunije ī mihayo yakwe?’

³²Hamo tūhaye gīkī, ‘Boolī būfumile kū banhū?’” Nī chene bogoha ū kūhaya, nguno pye a banhū baalī bamanile gīkī, ū Yohana walī ng'hangi.

³³Hūna būkalīla kūnshokeja dūhū ū Yesu gīkī, “Tūtamanile!” Nang'hwe ūbawīla, “Nū nene natūmuwīlaga ī yenīyī nakwīyītaga mu būdūla kī!”