Read Sukuma Bible 2015 – Bibilia Ilagano Lya Kale 2015 Maliko 15 Bible Online

Maliko 15 - Sukuma Bible 2015 – Bibilia Ilagano Lya Kale 2015 bible

Maliko 15

¹Hūna aho wela ī dilū, haho na haho ligasha ibanza: Baalīho bagabīji bataale na banamhala, hamò na balangi ba shilagīlo, nīyo lyalīho pyī ī libanza ī lyose; bizunīlīja kūntunga ū Yesu. Būntongeja bantwalile kūlī Pilato.

²Ū Pilato ūmūja gīkī, “Ū bebe hū ūlī ntemi o Bayudaya?” Ūshosha ūng'wīla gīkī, “H'ūmo ūlīhayīla!”

³A bagabīji bataale bandya kūmūūla mihayo mingī.

⁴Nang'hwe ū Pilato ūmūja hangī gīkī, “Nibūlī ūtūshoshaga nūūlū mhayo? Hū kūhaya ūtūyigwaga pyī īyo balīkūbūūla?”

⁵Alīyo ū Yesu atashokije mhayo gūngī gose gose, ū Pilato ūyūkumya dūhū!

⁶Ū mu shikū ja shigukulu ū Pilato walī na shīmīle sha kūbataligūlīla ntungwa ūmò, ūyo būnomba.

⁷Walīho nkenaagūji nebe, witanagwa Balaba, walī watungwa hamò na biye kūlwa kwenheleja nsambo; ū wei ūbūlaga ū mu nsambo gwenūyo.

⁸Hūna lūūlū a banhū būng'wegeela ū Pilato kūnomba abīītīle gīt'ūmo olī obamanīlīgīja.

⁹Nang'hwe ūbabūja gīkī, “Mutogilwe hamo namutaligūlīle ū ntemi o Bayudaya?”

¹⁰Nguno walī amanile gīkī, a bagabīji bataale baalī bantūūla ū Yesu mu makono gakwe kūlwa wilu.

¹¹Nīyo a bagabīji bataale benabo baalī babasoosela a banhū, gīkī banombe abataligūlīle Balaba.

¹²Hūna lūūlū ū Pilato ūbabūja hangī gīkī, “Mutogilwe nang'wīte ginehe ūyo mukūng'witanaga ntemi o Bayudaya?”

¹³Nabo būhoolanīja n'ilaka lya higūlya gīkī, “Nkomage ha nsalaba!”

¹⁴Ū Pilato aho wababūja gīkī, “Ī gete wītile būbi kī?” Bongeja kūhoolanīja dūhū n'ilaka lya higūlya balīhaya, “Nkomage ha nsalaba!”

¹⁵Nose ū Pilato ūbona gīkī hambū hambū abayeje a banhū, na ūbataligūlīla ng'hana ū Balaba. Aho wamala kūntūla mbooko ū Yesu, ūntūūla mu makono gabo, gīkī akakong'we ha nsalaba.

¹⁶Hūna a bashilikale būntwala ū Yesu ng'wibīndo lya numba ya h'ikūlū (litanagwa plaetolio, biyitana ibita igima, būng'wihoolekela.)

¹⁷Būnzwalīkīja ng'hanjo ya nzulunge. Būbeeja na ngikili ya ming'hwa, nayo būnzwalīkīja ū kū ntwe.

¹⁸Hūna bandya kūngīmba nyachilū, būyūng'wīla gīkī, “Kūlaga ūhangame ntemi o Bayudaya!”

¹⁹Būyūntūla na nang'ha ū kū ntwe, kūnū bakūnswīlaga na mate, bīīta bantugīja mazwi kūnamya!

²⁰Aho bamala ū kūngīmba nyachilū gīko, būnzuuja ī ng'hanjo ī ya nzulunge būnzwalīkīja ī shizwalo shakwe, hūna būntwala hanze kūjūnkoma ha nsalaba!

²¹Munhū ūmò, muna Kilene, Simoni ise o ba Isikanda na Lufo, akasangwa alīfuma kū ngūnda, būng'hadīkīja amūūkīje ū nsalaba gokwe.

²²Hūna būntwala ū Yesu, būūkanshisha h'ipandī līkitanagwa Goligota, makūlū gaho, “Ipandī lya lūpanga.”

²³Būng'winha mvinya īsangije būgota bo ngazu, gīkī ang'we; alīyo atayanukūlile.

²⁴Hūna būnkoma ha nsalaba, ī shizwalo shakwe būshigabanha bo kūshesela mbale, babone būlī ng'wene akūbūūcha kī!

²⁵Aho balīnkoma ha nsalaba lyalī ikanza lya sa idatū.

²⁶Na wandīke bo kūbūūlwa kwakwe būtūūlwa ho, boolī būhayile gīkī, “NTEMI O BAYUDAYA.”

²⁷Na basambo babīlī būkong'wa hamò nang'hwe, būlī ng'wene ha nsalaba gokwe, ūmò kū būlyo bokwe, ūngī kū lūmoso. [

²⁸Shūbiza shashikīīla ī shandīkwa īsho shihayile gīkī, “Akabalanījiwa hamò na bagomi.”]

²⁹Abo babītīlaga haho hihī bansondagūlaga kūnū bakūshingishaga mitwe yabo balīhaya gīkī, “Haho lūūlū ng'wing'wana o kūsambagūla hekalu na kūmala kwīzenga mu shikū idatū.

³⁰Alik'ipījage shi lūūlū, wīnge ho a ha nsalaba!”

³¹Na a bagabīji bataale bandya kwiyineenelegeja boi bike, hamò na balangi ba shilagīlo. Būyūhaya gīkī, “Walūpījaga bangī dūhū gashi nīyo, ū wei ng'wenekīlī walemeelagwa ū kwipīja!

³²Angū nang'hwe Kilisito, ntemi wa Bayudaya ī gīko, ni ikage ho a ha nsalaba ī haha, tūbone tūzunye!” Na a babo baalī bakong'wa hamò nang'hwe nabo būyūmbyeedeleja!

³³Ī līīmi aho lyashika ntwe gatī, shūbiza ho giiti; shīkundīkīja pyī ī sī, kūshisha sa kenda.

³⁴Mu saa kenda ū Yesu ūlīla n'ilaka itaale alīhaya, “Eloi, Eloi, lama sabaktani?” Ū kūshomelejiwa kwaho gīkī, “Mulungu wane, Mulungu wane, nibūlī wanilekaga?”

³⁵Bamò babo abo baalī bīmīīla henaho aho bigwa būhaya, “Bing'we ong'witana Eliya!”

³⁶Hūna ūmò wabo ūpeela kūjūsola ibbūpyo, ūlīlobya mu siki ūlītunga kwidete, wiza ūng'winha ang'we; kūnū alīhaya, “Leka tūlole ūlū akwiza ang'wiche ū Eliya!”

³⁷Alīyo ū Yesu ūfunya ilaka itaale, ūzumalīka!

³⁸Hūna ī lisenge lya mu hekalu lyūtandūka kūfuma kwigūlya kūshisha ha sī, lyūlekana habīlī.

³⁹Ū ntaale o bashilikale igana, ūyo olī wīmīīla haho hihī, aho wabona waacha gīko ūhaya; “Bing'we ū munhū ng'wenūyū ng'hana olī Ng'wana wa ng'wa Mulungu!”

⁴⁰Ka kūle ho hado, baalīho bakīma biloleelaga. Ū mu benabo baalīmo ba Malia Magadalena, Salume, nū Malia ū nina o ng'wa Yakobo ū ndo na Yosefu.

⁴¹A bakīma benabo bajaga būnondeela ū Yesu kūngunanha aho walī Galilaya. Baalīho na bakīma bangī bingī, abo baalī banondeela ū Yesu kwiza ī Yelusalemu.

⁴²Ū lūshikū lwenūlo lwalī lwa kūlonja lonja, nguno a ha ntondo yaho yalī sabato. Hūna lūūlū aho yabiza mhīndī,

⁴³Yosefu, muna Alimataya ūtimbya ng'holò, ūja ū kūlī Pilato, ūūkanomba ū mīlī go ng'wa Yesu. Ū munhū ng'wenūyo olī namhala w'ibanza nkūjiwa, nīyo nang'hwe ol'abūlindīīlile ū būtemi bo ng'wa Mulungu.

⁴⁴Ū Pilato akakumya aho wigwa gīkī ū Yesu omalaga kūcha. Ūng'witana ū ntaale o bashilikale igana ūyo onang'hanaga ū Yesu, ūmūja ūlū ng'hana omalaga kūcha.

⁴⁵Aho wamana ū kūfuma ū kūlī munhū ng'wenūyo gīkī īlī chene, ūng'winha ū Yosefu ū mimba.

⁴⁶Hūna aho wagwicha ū mimba a ha nsalaba, ūūkagūla ng'wenda gwawiza gwa kitaani, ūgūlingīīla ū mimba, ūgūlaaja mu shigila, shalī shisīmbilwe ng'wiwe gīt'ihalo. A ha mīta gwa shigila ūpilingītīja ho iwe, lyūchiba.

⁴⁷A ba Malia Magadalena nū Malia ū nina o ng'wa Yosefu, būbona aho akalaajiwa.