Read Sukuma Bible 2015 – Bibilia Ilagano Lya Kale 2015 Maliko 2 Bible Online

Maliko 2 - Sukuma Bible 2015 – Bibilia Ilagano Lya Kale 2015 bible

Maliko 2

¹Aho jabīta shikū, ū Yesu ūshoka hangī ī Kapelanaumu; gūkumūka gīkī alīho a ha kaya.

²Banhū bingī biza kūmona, bokala ho bishita; kūshisha būchiba a ha mīta. Nang'hwe ūyūbalomeela mhayo go ng'wa Mulungu.

³Kūhayimanīla bang'wenhela munhū wa būsaatu bo mangwisha, abūūchiwe na banhū bane.

⁴Alīyo īkī baalī bingī a banhū, būlemeelwa ū kūshikīīla aho walī ū Yesu. Na lūūlū būlinha kwigūlya ya numba, būūkachibūla ipūndū kūlīngīsīla aho walī, būshibītīja hene ī shilago īsho walī ashilaalīlile ū nsaatu, būng'wicha.

⁵Ū Yesu aho wakūbona ū kūzunya kwabo ūng'wīla ū nsaatu gīkī, “Bebe ng'wana, walekejiagwa ī shibi shako.”

⁶Baalīho na balangi ba shilagīlo balebe, baalī bigasha hoi; bandya kwiganika ū mung'holò jabo gīkī,

⁷“Nibūlī wayūhaya na mihayo īlī gīko hangī ū ng'wenūyū? Ū wenūbū būgimu! Nani ūyo adūgije kūlekeja shibi ūlū atī Mulungu dūhū?”

⁸Haho na haho ū Yesu ūdeeba ū mu moyo gokwe ūmo biganikīlaga. Na ūbawīla, “Nibūlī muliganika mihayo īlī gīko ū mung'holò jing'we?

⁹Ī gīsī, ū nogu gūlī ginehe? Ū gwa kūng'wīla ū nsaatu gīkī, ‘Walekejiagwa ī shibi shako,’ nūūlū hamo ū kūng'wīla gīkī, ‘Būūkaga ūshibūūche ī shilago shako ūshimīze?’

¹⁰Ali lūūlū, shiigelile mumane gīkī ū Ng'wana wa Munhū alī nabo ū būdūla bo kūlekeja shibi ū mu sī.” Hūna ūng'wīla ū nsaatu gīkī,

¹¹“Bebe nalīkūwīla būūkaga ūshibūūche ī shilago shako ūje kaya.”

¹²Ng'hana ūbūūka haho na haho, ūshibūūcha ī shilago shakwe, ūgumha ajile balolile a bose! Pyī būjinjimala, būyūnkumīlīja Mulungu dūhū balīhaya, “Tūtaalī kūbona mhayo gūlī gīkī na hado yaya!”

¹³Hūna ūfuma, ūja alīsīngīja hangī kū nyanza; pye a mabita gūnondeela, nang'hwe ūyūbalanga.

¹⁴Aho akūbītaga ūko na ūko, ūmona Lawī ng'wana Alifayo igashije ng'witobisījo lya goodi; ūg'wīla, “Nilondeelage.” Ng'hana ūbūūka ūnondeela.

¹⁵Ū Yesu aho alī ha ng'wa Lawī akigasha kūlya shilīwa, na batobisha ba goodi bingī hamò na banhū ba shibi bigasha kūlya nang'hwe, na a bahemba bakwe. Nguno abo banondeelaga baalī bingī no.

¹⁶Alīyo a balangi ba shilagīlo abo baalī Bafalisayo, aho bamona alīlya na banhū ba shibi na batobisha ba goodi, būbawīla a bahemba bakwe gīkī, “Nibūlī akūlyaga hamò na batobisha ba goodi, būyaga na banhū ba shibi?”

¹⁷Ū Yesu aho wigwa ūbawīla gīkī, “A bapanga batī na nguno na mfumu, alīyo a basaatu h'abo bakankoobaga.” Ū nene natizile kwitana batūngīlīja, alīyo ba shibi!”

¹⁸A bahemba ba ng'wa Yohana na a ba Bafalisayo baalī bafunga. Hūna banhū balebe biza kūmūja gīkī, “Nibūlī a bahemba ba ng'wa Yohana na a ba Bafalisayo bakafungaga, alīyo a bahemba bako batafungaga?”

¹⁹Nang'hwe ū Yesu ūbawīla gīkī, “Ū ntooji ūlū ataalī hamò nabo a bageni ba ha būkwīlīma, nibūlī bafunge? Ū ng'wikanza pye īlo ataalī hamò nabo ū ntooji, batīko ū kūfunga.

²⁰Jikūshika ī shikū ja kwīngījiwa ū ntooji, ū ng'wikanza lyenīlo hū bakūyūfunga.

²¹Atīho ūyo akasumīlījaga shilaka sha ng'wenda mpya ha ng'wenda nkūlūkūlū, nguno ūlū wīta gīko shikūgūtandūla ū ng'wenda ū nkūlūkūlū gūkenaagūke kūtinda.

²²Na hangī atīho ūyo akabīkaga mvinya mhya ng'wibīkīlo ikūlūkūlū, ūlū wīta gīko, ī mvinya īkūlītandūla ī libīkīlo līkenaagūke, nī mvinya yidīka! Alīyo ī mvinya ī mhya shiigelile ībize ng'wibīkīlo ipya!”

²³Yalīho sabato ndebe, ū Yesu wabītīlaga mu migūnda ya būsīga, a bahemba bakwe būyūbīnza mangala gamò aho bajile.

²⁴Hūna a Bafalisayo būng'wīla, “Bebe ūlībona ahene! Nibūlī balīīta mhayo ūyo gūlī ngilo kwītwa ha sabato?”

²⁵Nang'hwe ūbawīla gīkī, “A bing'we mutaalī ū kūsoma ūmo akīītīla ū Daūdi na a babo walī nabo, aho baalī na makoye ga lūtuubo?

²⁶Ī gīkī ū mu shikū ja ngabīji ntaale Abiasali akingīla nabo a biye ū mu numba ya ng'wa Mulungu, ūūkalya migatī ya kūtūūlwa kū būtongi bo ng'wa Mulungu, īyo yalī ngilo ū kwīlya ū wei na a biye, ūlū ītī bagabīji dūhū?”

²⁷Ongeja kūbawīla gīkī, “Ī sabato ītūūlilwe ho kūlwa nguno ya banhū, ītī banhū kūlwa sabato.

²⁸Hūna lūūlū, ū Ng'wana wa Munhū alī Seeba wayo nī sabato.”