Read Sukuma Bible 2015 – Bibilia Ilagano Lya Kale 2015 Maliko 4 Bible Online

Maliko 4 - Sukuma Bible 2015 – Bibilia Ilagano Lya Kale 2015 bible

Maliko 4

¹Ikanza līngī hangī ū Yesu akandya kūlanga ha ng'walo gwa nyanza. Ibita itaale lyūng'okalīīla, nose ūja mu nyanza ūūkigasha mu lyato; ī libita lya banhū pye a bangī lyūbiza ha ng'walo, a ha sī nyūmu henaho.

²Ūbalanga mihayo mingī bo kūtūmamīla shigemeng'hejo; ū mu būlangi bokwe ūbawīla gīkī,

³“Alidegelekagi; mībi akafuma, ūja kūbība mbīyū.

⁴Aho alībība jingī jūgwīla mu nzīla, jiza noni jūjilya.

⁵Jingī jūgwīla mu sī ya mawe mawe, jūgehelwa ī sī ya kūjifukīīla, ahene jikangūha ū kūzwa īkī jalī jitafukīīlilwe chiza.

⁶Alīyo aho lyaseba ī līīmi, lyūjoocha jūjiga, nguno jalī jitī na miji ya kwigela.

⁷Jingī jūgwīla mu ming'hwa, aho jilīkūla na a ming'hwa gūkūlanīja najo, gūjishiteleja; jūduuma ū kūtwaja a matwajo.

⁸Alīyo ī jingī jikagwīla mu sī yawiza, jūzwa chiza jūkūla, jūtwaja matwajo, jimò makūmi adatū, jingī makūmi atandatū, na jingī igana.”

⁹Hūna ūhaya gīkī, “Ūyo alī na matū gakigwaga ni igwage.”

¹⁰Ū Yesu aho wasaaga iyene, abo baalī hihī nang'hwe, na a babo ikūmi na babīlī būmūja ī mihayo ya shigemeng'hejo shenīsho.

¹¹Nang'hwe ūbawīla gīkī, “A bing'we ng'winhilwe ī mbisīla ja būtemi bo ng'wa Mulungu. Alīyo ū kū ba hanze, pyī ī mihayo īlī mu shigemeng'hejo dūhū.

¹²Ībize gīkī, ‘Ū kūlola balole, alīyo ū kūbona yaya, nū kūdegeleka badegeleke, alīyo ū kwitegeleja yaya, batizūgalūka, bakalekejiwa!’”

¹³Hūna ū Yesu ongeja kūbawīla gīkī, “Mutūshiitegelejaga ī shigemeng'hejo shenīshi? Mukūshimana ginehe lūūlū pyī ī shigemeng'hejo ī shingī?

¹⁴Ū mībi akabībaga mhayo go ng'wa Mulungu.

¹⁵Alīyo abo balī mu nzīla ūmo gūkabībagwa ū mhayo gwenūyo, balī abo bakamalaga ū kūgwigwa, hūna haho na haho wiza ū Shetani wagūpula ū mhayo ūyo gwabībagwa ū mung'holò jabo.

¹⁶Bangī balīho balī gītī sī ya mawe mawe, a benabo balī abo bakagwigwaga ū mhayo bagwanukūla wangū wangū na būyegi.

¹⁷Kwike gwikala gūtī na miji ū mubo, gwabagunanha ikanza iguhī dūhū, alīyo ūlū gilonga makoye, nūūlū būluhi kūlwa nguno yago ū mhayo, haho na haho bakagwaga.

¹⁸Balīho bangī balī gītī sī īzwile ming'hwa; a bene balī abo bakagwigwaga ū mhayo,

¹⁹kwike ī myatīla ya būlī lūshikū, nū būlemba lembi bo sabo, nū kwikūmva kwa būlī mbika, shikagūshitelejaga ū mhayo gwagaya a matwajo!

²⁰Alīyo bangī balī gītī sī yawiza; bakagwigwaga ū mhayo bagwanukūla, batwaja matwajo, bangī makūmi adatū, bangī makūmi atandatū, na bangī igana.”

²¹Hūna ūbawīla hangī gīkī, “Angū ī tala īkenhagwa gīkī īkundīkījiwe itangwa, nūūlū ītūūlwe ng'wizungu lya būlīīlī? Ītī gīkī ītūūlwe h'ikīndīkīlo lya tala?

²²Nguno gūtīho mhayo ūyo gūkabisagwa ūlū ītī gīkī gūloolechiwe, nū yūyo gūkakundīkījiagwa ūlū ītī gīkī gūlakundūlīlwe!

²³Ūlū munhū alī na matū gakigwaga ni igwage.”

²⁴Ūbawīla hangī gīkī, “Ilang'hanagi nayo īyo mukūdegelekaga, ī ngelekelo īyo mukūgelekelaga, h'īyo mukūgelekelwa na a bing'we, nīyo hangī mukongejiwa na kūtinda ho.

²⁵Ūyo alī na shikolo akwinhwa, ūyo atī na shikolo nī shisho alī nasho akūtaajiwa!”

²⁶Hangī ū Yesu ūhaya, “Ū būtemi bo ng'wa Mulungu būbizile gītī munhū ūyo akabībaga mbīyū ha sī.

²⁷Ūlū wila olaala, wela hangī omisha, alīyo atūdūla ū kūmana ūmo jikazwīlaga nū mumo jikakūlīlaga.

²⁸Ī sī hū yene īkajinhaga kūtwaja matwajo; kwandīja idūūtū, hama lyangala, kūshisha kūpandīka mbeke ū mu lyangala.

²⁹Alīyo a matwajo ūlū gakomeela, haho na haho akabītyaga mo lūshū, nguno gashikaga a magesa.”

³⁰Hangī ūhaya, “Ū būtemi bo ng'wa Mulungu tūbūlenganīje na kī, nūūlū tūbūtūūle mu shigemeng'hejo kī?

³¹Būbange gītī kabīyū ka haladali ako kakahambagwa; a koyi kalī kado ba bado ū mu mbīyū pyī ī jose.

³²Alīyo ūlū kūūzwa, kakakūlaga lyabiza Isaka itaale kūtinda pye ī mitī ya masaka. A matambī gakakūlaga kūshisha na noni ja kūlala japandīka wikalo ū mu mbeho yalyo.”

³³Būlī ikanza ū mu kūbasomboolela, ū Yesu watūmamīlaga shigemeng'hejo shingī sha mbika yenīyī, kūlenganīla nū būdūla bo kwitegeleja kwabo.

³⁴Walī atabasomboolelaga mhayo ūlū ītī mu shigemeng'hejo, alīyo a bahemba bakwe waboolekejaga ūlū wasaaga nabo iyene.

³⁵Aho lyabiza lya mhīndī ū mu lūshikū lwenūlo, ū Yesu ūbawīla a bahemba bakwe gīkī, “Tūjagi kū nkīlo.”

³⁶Būlīleka ī libita lya banhū bingīla nang'hwe mu lyato, būnjana gīt'ūmo walī; na mato gangī gūlondeela.

³⁷Aho balīja gūbūūka nyaga ntaale, mahuuli gūyūlītūla ī lyato, nose lyegeela kokala minzī.

³⁸Ū wei walī kū numa ya lyato alaalile tūlo, wisagūlaga ha nsago ū ntwe gokwe. Būmisha balīng'wīla, “Nangi nibūlī ūtūdīlīlaga alīyo tūlīhaya kūshila?”

³⁹Aho wabūūka ūgūhama ū nyaga; nī nyanza wīwīla, “Lembeelaga ūhuumūle.” Na ng'hana gūlembeela ū nyaga, hūbiza sele sele.

⁴⁰Hūna ūbawīla, “Nibūlī ng'walī ng'ogohaga gīko? Mutaalī dūhū ū kūbiza na kūsanya?”

⁴¹Bakogoha na kogohele kataale no, bandya kwiwīla boi bike balīhaya, “Ī gete ū munhū ng'wenūyū ni nani, wa kwigwiwa būyaga na miyaga na manyanza hose?”