Read Sukuma Bible 2015 – Bibilia Ilagano Lya Kale 2015 Luka 10 Bible Online

Luka 10 - Sukuma Bible 2015 – Bibilia Ilagano Lya Kale 2015 bible

Luka 10

¹Ha numa ya yenīyo ū Seeba ūsola bahemba bangī makūmi mpungatī na babīlī, ūbatūma babīlī babīlī, batonge ū kū mizengo na a mapandī ayo walī atogilwe kūja ū wei.

²Ūbawīla gīkī, “Ū nīmo gw'igesa gūlī ntaale no, alīyo a batūmami bagehu; nombagi ū Seeba atūme batūmami ū kū nīmo gokwe.

³Ali lūūlū, jagi; kwike managi gīkī nalīmutūma gītī baana ba ng'holo kūja kwigulanya na mapūge!

⁴Mutizūsola mbogoshi, nūūlū mfuko, nūūlū shilatū; hama ūlū mulīja, yaya ū kwikala ng'witūja tūja mu nzīla kūgīsha banhū.

⁵Ūlū ng'ūshika ha kaya ndebe bagīshagi tame; ng'ūbawīla gīkī, ‘A ha kaya īyī, twang'wenhelaga mhola.’

⁶Ūlū ūbiza alīho munhū ntengeke, ī mhola ying'we īkūng'wikalīla; alīyo ūlū atīho, īkūmushokela ī mhola ying'we.

⁷Ī kaya īyo īlang'wanukūle ikalagi henaho, muyūlya na kūng'wa hamò nabo, nguno ū ntūmami shing'wigelile kūpandīka mheela yakwe. Yaya ū kwitambūkīja tambūkīja ng'hambī; kwīnga ha kaya īyī kūja kaya yīngī.

⁸Hangī nūūlū ng'wingīla mu nzengo nebe, ūlū būng'wanukūla lyagi īsho balamutengele.

⁹Bapījagi a basaatu baamo, nīyo ng'ūbawīla gīkī, ‘Ū būtemi bo ng'wa Mulungu bong'wegeelaga.’

¹⁰Alīyo ūlū ng'wingīla mu nzengo nebe būleka ū kūng'wanukūla, jagi ng'ūbīta ū mu mapanda gabo mulīhaya gīkī,

¹¹‘Nū lūbuubu lo mu nzengo gwing'we ūlo lwadaamīīlaga kū mhambala jise lūūlo twamukung'unhīla, alīyo managi gīkī ū būtemi bo ng'wa Mulungu bong'wegeelaga.’

¹²Nalīmuwīla gīkī, ū mu lūshikū lwenūlo īkūbiza hambū hambū ū kū bana Sodoma; kūtinda ū kū nzengo gwenūyo!”

¹³“Ūlī mu kwihīga Kolasini, nū bebe Betisaida ūlī mu kwihīga, nguno ī shītwa sha koolecha būdūla būtaale īsho shabeejiwe mu bing'we ūlū ni shabeejiwa mu Tulo na Sidoni, a bazengi baamo ni bagalūka kale, mu kūzwala magūnīla na kwifudīka mu mabu.

¹⁴Alīyo ū ng'wikanza lya kūlamulwa, īkūbiza hambū hambū ū kū bana Tulo na a bana Sidoni, kūtinda ū kū bing'we!

¹⁵Ū bebe nang'ho Kapelanaumu, ūliganika gīkī ūkūgūngūhiwa kūshisha ng'wigūlū? Ūkwichiwa kūshisha kūlimu!

¹⁶Ū wa kūng'wigwa a bing'we numho waniigwaga nene, nū wa kūmufīkīlīja a bing'we numho wanifīkīlījaga nene; hangī ūyo ūnifīkīlīja nene, hū wanfīkīlījaga ūyo anitūmile.”

¹⁷A bahemba makūmi mpungatī na babīlī aho bashoka baalī na būyegi no; būng'wīla gīkī, “Seeba na a bana masamva twalūbapeejaga mu nguzu ja lina lyako.”

¹⁸Nang'hwe ūbawīla gīkī, “Namonile ū Shetani alīīgwa gītī lūlabi alīfuma ng'wigūlū!

¹⁹Managi gīkī a bing'we naang'winhile būdūla bo kūpanda nūūlū nzoka na ng'homi, nū būdūla bo ng'wanishi kūbūpyena ū bose; na shitīho shikolo shose shose sha kūng'wītīla mayanga.

²⁰Kwike ū gwa kūheeba masamva gūtamuyejage, alīyo yegagi īkī a mina ging'we gandīkilwe ū ng'wigūlū.”

²¹Ū ng'wikanza lyenīlo ū Yesu ūkumīlīja mu būyegi wa ng'wa Moyo Ng'wela; ūhaya gīkī, “Nalīkūlūmba Baba, bebe ūyo ūlī Seeba w'igūlū na sī, nguno pyī ī mihayo īyī wībisile ū kū ba masala na a bitegeleja, wīyoolecha ū kū baana. Alichene Baba, nguno h'ūmo ībeelelile ū kūlī bebe.

²²Ū Baba ashitūūlile pyī ī shose mu nkono gwane; na atīho nūūlū ūmò ūyo aamanile ū Ng'wana, ūlū atī Baba iyene. Hangī atīho ūyo aamanile ū Baba, ūlū atī Ng'wana wike, na būlī ng'wene ūyo Ng'wana alatogwe kūmfubolela.”

²³Hūna ūbagalūkīla a bahemba bakwe boi dūhū; ūhaya gīkī, “Galī na lubango a miso ayo gakwībonaga īyo mukwībonaga a bing'we.

²⁴Nguno nalīmuwīla gīkī, bahangi na batemi bingī baalī batogilwe kwībona īyo mukwībonaga alīyo batībonile; na kwīyigwa īyo mukwīyigwaga alīyo batayigwile.”

²⁵Kwitulwa nangi nebe wa shilagīlo wīmīīla ūmūja mu kūngema, ūhaya gīkī, “Nangi nīīte mhayo kī nabize na būpanga butashilaga?”

²⁶Nang'hwe ūng'wīla, “Yandīkilwe ginehe ū mu shilagīlo, ūkūsomaga ginehe?”

²⁷Ūnshokeja ūhaya, “Ntogagwe ū Seeba Mulungu wako nang'holò yako yose, na būpanga wako bose na nguzu jako jose, na maganiko gako gose; nū nzenganwa ng'wiyo gīt'ūmo witogelilwe bebe ng'wenekīlī.”

²⁸Nang'hwe ū Yesu ūng'wīla gīkī, “Watūngīlīja a kashokeje, nū bebe ītaga gīko, Ūkūpīla.”

²⁹Alīyo ū nangi ng'wenūyo walī atogilwe kwiyoolecha gīkī ntūngīlīja, na lūūlū ūmūja ū Yesu gīkī, “Ū nzenganwa ng'wichane h'ūyo alī?”

³⁰Ū Yesu wandīja henaho; ūng'wīla gīkī, “Lwise lūmò munhū nebe watulumenhaga kūfuma Yelusalemu ajile Yeliko, ohayimanīla onyang'wa na banyoli. Būntūlagūla, hama būntaaja pyī ī shikolo, nī shizwalo būnzuuja, būja būneka alī mandetendete, hihī kūcha!

³¹A makanza genayo, ngabīji nebe nang'hwe ūsangwa alītulumenha kūbītīla ī nzīla yenīyo. Ūng'wipumūkīja hoi, aho wamona ūtaja ūbītīla kū mhelo.

³²Na Nawī ūshika ho a h'ipandī lyenīlo, wahayūmona ūchaalīīla, ūbīta chaawī.

³³Na Nsamalia nebe walī mu lūgendo ajile, ū ng'wene wahayūshika a halī munhū ng'wenūyo, aho wamona ūnsaatwa.

³⁴Ūng'wegeela ūng'ooja ooja na mvinya a magulagīje, ūmila na maguta, hūna ūgatunga; hama ūndamhīja ha nzobe yakwe, ūntwala kū numba ya kūlaala bageni ūūkangaliila chiza kwenūko.

³⁵A ha ntondo yaho ūsola denali ibīlī, ūng'winha ū ng'wenekīlī numba ya bageni, ūng'wīla gīkī, ‘Ngaliilage ū munhū ng'wenūyū; shose shose īsho ūlatūmamīle kūkīla a ha hela jenīji, nakwiza nakwinhe ūlū nalashoke.’

³⁶Ūlībona ginehe a ha gatī ya banhū a badatū benabo, alī ginehe ūyo akabiza nzenganwa ng'wiye ū munhū ūyo olī onyang'wa na banyoli?”

³⁷Ūng'wīla, “Ūyo akang'wītīla ya koolecha shigongo.” Nang'hwe ū Yesu ūng'wīla, “Jaga ūkīīte gīko nang'ho!”

³⁸Ū Yesu aho alī mu lūgendo na a bahemba bakwe, bakashika mu chalo shilebe. Nkīma ūmò lina lyakwe Malita ūng'wegeleja ha kaya yakwe.

³⁹Ū nkīma ng'wenūyo walī na ng'wanong'wawe witanagwa Malia. Ū ng'wene wigasha ha sī hihī na mhambala ja ng'wa Yesu, ūyūndegeleka īyo wasomboolaga.

⁴⁰Alīyo ū Malita wandya kūtagamba na milīmo ya kūbalonja longeja. Nose ūng'wegeela ū Seeba ūng'wīla, “Seeba nibūlī ūtūlonjaga ī gīkī ū ng'wanong'wise onilekanījaga nene dūhū pyī ī milīmo? Ni wang'wīla anigunanhe!”

⁴¹Nang'hwe ū Seeba ūnshokeja ūng'wīla, “Malita Malita, otagambaga na milīmo mingī no, nose ozwangana.

⁴²Alīyo gūlīho gūmò dūhū ūyo gwigeleelilwe; ū ngabo ūyo wagūsolaga Malia gūlī gwawiza, atūdūla kwīngījiwa na hado yaya!”