Read Sukuma Bible 2015 – Bibilia Ilagano Lya Kale 2015 Luka 11 Bible Online

Luka 11 - Sukuma Bible 2015 – Bibilia Ilagano Lya Kale 2015 bible

Luka 11

¹Ikanza ilebe ū Yesu walī hanhū akūlombaga, aho wamala ū kūlomba ūmò o bahemba bakwe ūng'wīla gīkī, “Seeba tūlangage nise ū kūlomba gīt'ūmo Yohana akabalangīla bahemba bakwe.”

²Hūna ūbawīla, “Ūlū mulīlomba mulahayage gīkī, ‘Sīswe lina lyako lyeela līkūjiwe, būtemi wako wize.

³Twinhage ī shilīwa shise ī sha būlī lūshikū.

⁴Tūlekejage nū būhūbi wise, nguno na a bise tūkanekejaga būlī ng'wene ūyo alī na būgasa kū bise. Na hangī ūtizūtūtwala mu kūgeng'wa.’”

⁵Ha numa ya henaho ūbawīla gīkī, “Ī gīsī gemelagi ūlū ūmò wing'we alī na nwani ng'wiye wiza kūnugūja būjikū ha gatī ūng'wīla gīkī, ‘Ng'wanong'wise nigunanhage migatī idatū.

⁶Napandīka ngeni, nwani ng'wichane wafuma mu lūgendo; alīyo ī haha natī na shilīwa sha kūntengela!’

⁷Ūyo alī mu gatī ashikile kūnshokeja ūng'wīla gīkī, ‘Ūtanikoyage namalaga kūpagīja ū lwigī; nīyo a baana bane pyī nū nene tūlī mu būlīīlī twalaalaga; ī haha natūdūla ū kūbūūka, nūūlū kūkwinha shose shose!’

⁸Nalīmuwīla atūdūla ng'hana ū kūbūūka ang'winhe nūūlū īkī nwani ng'wiye. Alīyo kūlwa kalombele ka lūgūūmī, akūnoga nose abūūke ang'winhe; nīyo akūng'winha kūlenganīla na a kalombele kakwe.

⁹Hūna lūūlū nalīmuwīla lombagi mukwinhwa, koobagi mukūpandīka, tūlagi hoodi ha mīta mukūlugūlīlwa.

¹⁰Nguno būlī ng'wene ūyo akalombaga akinhagwa, nū yūyo akakoobaga akapandīkaga, hama nū yūyo akatūlaga hoodi ha mīta akalugūlīlagwa.

¹¹Angū, alīho myaji kī ū mu bing'we ūyo ashikile kūlomva ndīlo na ng'wanokwe, nang'hwe ūng'winha nzoka a ha ng'wanya go ndīlo?

¹²Nūūlū hamo ūlomva igī, nani ūyo adūgije kūng'winha ng'homi?

¹³Ali lūūlū, manīlagi henaho; a bing'we nūūlū īkī mulī babūbi, nahene mumanile ū kūbinha a baana bing'we shikolo shawiza. Ū Sīng'we ūyo alī ng'wigūlū, atīīta yawiza kūtinda a bing'we? Nguno ū ng'wene akūbinha Moyo Ng'wela abo bakūnombaga.”

¹⁴Lūshikū lūngī akang'wīngīja munhū isamva lya būshimuumu; aho lyamfuma ū munhū ng'wenūyo ūdūla ū kūyomba. A banhū abo baalīho būkumya no.

¹⁵Kwike bamò babo bandya kūhaya gīkī, “A masamva akūgapeejaga kūlwa būdūla bo Lībelizebuli, ī litaale lya masamva.”

¹⁶Bangī būyūngema, kūnū balīkooba shimanīkījo sha kūfuma ng'wigūlū kwīngīīla kūlī we.

¹⁷Alīyo ū Yesu īkī walī agamanile a maganiko gabo, ūbawīla gīkī, “Būlī būtemi ūlū būgabanīka hūna wandya kwilwisha boi wenekīlī na wenekīlī, būkwimala. Nūūlū kaya ūlū yandya kwiyūbūkīla yoi yenekīlī īkūgwa.

¹⁸A bing'we mulīhaya gīkī ū nene nakūgapeejaga a masamva mu būdūla bo ng'wa Belizebuli, angū numho hū kūhaya ū Shetani ogabanīkile. Hama būkwīmīīla ginehe lūūlū ū būtemi bokwe?

¹⁹Nīyo hangī, ū nene ūlū nakūgapeejaga a masamva mu būdūla bo ng'wa Belizebuli, al'a baana bing'we, a bene bakagapeejaga mu būdūla kī? Na lūūlū managi gīkī, a benabo bakūbiza balamuji bing'we!

²⁰Alīyo ūlū nakūgapeejaga a masamva mu būdūla bo nkono go ng'wa Mulungu, managi gīkī ū būtemi bo ng'wa Mulungu bong'wizīīlile!

²¹Ū munhū o nguzu ūlū adimile shilanga akūlang'hanaga kaya yakwe, ī shikolo shakwe shilī mhola.

²²Alīyo ūlū wiza munhū o nguzu kūtinda ū wei, hūna ūndumīla ūng'heeba, akūntaaja pyī ī shilanga shakwe īsho ashisanije, hanuma ī shikolo shakwe ūshisola ūshigabanhya.

²³Ali lūūlū, ūyo atī hamò na nene alī ng'wilwisha wane, nū yūyo atūkumingaga hamò nane akūbbalasanyaga!”

²⁴“Ū moyo nsoso ūlū gūmfuma munhū, gūkajaga ūko na ūko gūkūhūhūūlījaga mu matogolo makalamuku gatī na minzī, gūlīkooba ha kwifuulīla. Ūlū gūgayiwa gūkahayaga gīkī, ‘ī gete nashoke ū kū numba yane ūmo naafumile!’

²⁵Gwakūhayiza, gwīsanga īpyagūlilwe, na kūgaliilwa chiza.

²⁶Hūna gūja kūjūsoleleja myoyo yīngī mpungatī misoso kūgūheeba ū goyi, gwiza nayo; pyī yingīla yikala mo. Ī ng'halīlo ya ng'wa munhū ng'wenūyo īkabizaga yabūbi no, kūtinda ūmo walī ī kwandya!”

²⁷Aho wakalīcha ū kūhaya pyī ī yose īyī, nkīma nebe ū ng'wibita ūhamuka n'ilaka lya higūlya ūng'wīla gīkī “Īlī na lubango ī nda īyo īkakūbūūcha, nī mbeele ījo ūkajong'ha najo jilī na lubango!”

²⁸Nang'hwe ū Yesu ūhaya, “Ūlītūngīlīja alīyo ī no no no abo balī na lubango, balī abo bakūgwigwaga ū mhayo go ng'wa Mulungu bagūdīlīla.”

²⁹A mabita aho gongeja kūng'okalīīla, ūhaya gīkī, “Ī shibyalīlwe īshi shabūbi no; shikūkoobaga shimanīkījo, alīyo shitinhwa shimanīkījo, ūlū ītī sha ng'wa Yona dūhū!

³⁰Nguno gīt'ūmo Yona walī shimanīkījo kū banhū ba Ninawi, h'ūmo akūbizīla nū Ng'wana wa Munhū ū kū banhū ba shibyalīlwe īshi.

³¹Ū ng'wikanza lya kūlamulwa, ū ntemi nkīma wa sī ya dakama akwīmīīla nabo a banhū ba shibyalīlwe īshi abenheleje kwinhwa nsango. Nguno ū ng'wene akafuma kū sī ya kūle wiza kūlī Solomoni kūdegeleka mihayo yakwe ya masala, alīyo ī haha ūyo alīho aha ng'wene ntaale kūtinda Solomoni.

³²Na a banhū ba Ninawi bakwīmīīla nabo a banhū ba shibyalīlwe īshi, ū ng'wikanza lya kūlamulwa, babenheleje kwinhwa nsango. Nguno a bene aho bawigwa ū būlomeeji bo ng'wa Yona bakagalūka; alīyo ī haha ūyo alīho aha ng'wene ntaale kūtinda Yona.”

³³“Atīho munhū wa kūbacha tala hūna wakītūūla kwibisu, nūūlū wīkundīkīja itangwa. Īkatūūlagwa h'ikīndīkīlo lya tala, gīkī bayūlībona ī lisana lyayo abo balingīla ū mu numba.

³⁴Ī tala ya mīlī līlī liso lyako; ī liso lyako ūlū līlī mhola, numho pyī ū mīlī gwako gūlī n'isana. Alīyo ī liso lyako ūlū lyūpandīka kaagede, ū mīlī gwako gūkūbiza mu giiti.

³⁵Ali lūūlū, ilang'hanage, ī lisana īlo ūlī nalyo lītizūgalūka kūbiza giiti.

³⁶Nīyo ū mīlī gwako ūlū gūlī ng'wisana, gūbiza gūtī na giiti nūūlū hado, pyī ū gose gūkūbiza n'isana gīt'ūmo īkabizīlaga tala ūlū īlīkūtiimīla.”

³⁷Ū Yesu aho wamala ū kūsomboola ī yenīyo, Mfalisayo nebe ūng'wegeleja gīkī ize alye nang'hwe shilīwa ha ng'wakwe; na ng'hana wingīla wigasha.

³⁸Alīyo ū Mfalisayo ng'wenūyo akakumya no ū kūbona gīkī ū Yesu oleka ū kūkalaba tame aho ataalī kwandya ū kūlya.

³⁹Nang'hwe ū Seeba ūng'wīla gīkī, “A bing'we Bafalisayo mulī na makoye, nguno mukiyoogelelejaga higūlya gūlya, gītī kooja shikombe na mabakuli, alīyo ū mu gatī ng'okalile wibi na būnyeecha.

⁴⁰Bing'we bachilū chilū, ū meeja washo ī sha hanze atī hū ng'wene ū meeja washo nī sha mu gatī?

⁴¹Shifunyagi tame ī sha mu gatī shibize manong'ho, hū shikūmubeelela pyī ī shikolo.

⁴²Hangī nīyo mulī mu kwihīga a bing'we Bafalisayo, nguno mukafunyaga īmò ya ng'wikūmi ya shikolo shido do do, gītī shisanjo sha mu shilīwa na madūūtū ga mbika ījo na ījo! Alīyo ī mihayo ya būtūngīlīja na būtogwa bo ng'wa Mulungu mukīkīlanhyaga! Shing'wigeleelilwe kwīshikīlīja ī yenīyī, alīyo nī yīngī yaya ū kwīleka.

⁴³Bing'we Bafalisayo mulī mu kwihīga, nguno mutogilwe kwigasīja masumbī g'ikūjo mu masinagogi, na kwikala mulīgīshiwa mu magūlilū.

⁴⁴Mulī mu kwihīga, nguno mubizile gītī shigila īsho shijimīlīkanile, īsho banhū bakabītaga higūlya yasho nū kūdeeba yaya!”

⁴⁵Kūhayimanīla ūmò wa balangi ba shilagīlo wanshokeja alīhaya gīkī, “Nangi īyo ūkwīhayaga yenīyo na a bise ūlītūdūkanīja mo!”

⁴⁶Nang'hwe ū Yesu ūnshokeja ūng'wīla, “Angū na a bing'we balangi ba shilagīlo mulī mu kwihīga, nguno mukasesejaga banhū miligo midito kū mabega, alīyo a bing'we benekīlī mutagemaga ū kūtūūla ho nūūlū lwala lwing'we lūmò kūbagunanha.

⁴⁷Mulī mu kwihīga, nguno mukazengeelaga shigila sha bahangi; abo babūlagwa na bakūlūgenji bing'we.

⁴⁸Hū kūhaya mukikaanīlaga bing'we benekīlī, na kwizunīlīja nī shītwa sha bakūlūgenji bing'we, nguno a bene bababūlaga, lelo a bing'we mukūshizengeelaga ī shigila shabo!

⁴⁹H'ī nguno yene ū Mulungu nang'hwe ū mu masala gakwe ahayile gīkī, ‘Nakūbatūmīla bahangi na batūng'wa; bakūyūbabūlaga bamò babo, na bangī bakūbaluhya.

⁵⁰Ū mu gīko gakūkoowa kūfuma mu shibyalīlwe īshi pye a mininga ga bahangi ayo gidīka; kwīngīīla ikanza lya kūseeng'wa kwa sī.

⁵¹Kwandīja mininga ga ng'wa Abeli kwiza kūkaja kū ga ng'wa Zakalia ūyo akabūlagīlwa mu hekalu kū būtongi bo ng'walīlo. Alichene, nalīmuwīla gakūkoowa ū mu shibyalīlwe īshi.’

⁵²Mulī mu kwihīga a bing'we balangi ba shilagīlo, nguno mulūdimile ū lūfungūlo lwa būmani. A bing'we mulemeelilwe ū kwingīla, alīyo na a babo batogilwe ū kwingīla mukabahangījaga!”

⁵³Aho alīnga a henaho a balangi ba shilagīlo na a Bafalisayo bandya kūmūgīlīja mihayo mingī, koolecha hape gīkī baalī bapelana no;

⁵⁴kūnū bang'witegeelaga bapandīkīle ho nzīla ya kūngwasha mu kalūngalūngīle kakwe.