Read Sukuma Bible 2015 – Bibilia Ilagano Lya Kale 2015 Luka 14 Bible Online

Luka 14 - Sukuma Bible 2015 – Bibilia Ilagano Lya Kale 2015 bible

Luka 14

¹Īkabiza ho sabato ndebe, ū Yesu ūja ha ng'wa ntaale ūmò wa Bafalisayo, ūūkingīla mu kaya kūlya shilīwa. A boi bandya kūng'witega tega gīkī bamone ūmo alīītīle.

²Nguno a ha būtongi bokwe olīho munhū asaatile būsaatu bo kūduduma mīlī.

³Hūna ū Yesu ūbawīla a balangi ba shilagīlo na a Bafalisayo, ūhaya gīkī, “Bing'we a ha sabato īzunīlīgije ū kūpīja nūūlū yaya?”

⁴Būgayiwa ū gwa kūnshokeja. Hūna ūndima ū nsaatu ūmpīja, ūnaga ūja.

⁵Hanuma ūbawīla a boi gīkī, “Ī gīsī, a bing'we ūlū ūmò wing'we alī na ng'wana nūūlū ng'ombe, hūna yūgwīla ng'wichongo ha lūshikū lo sabato, nani ūyo atūkalagana kwīfunya mo haho na haho?”

⁶Nahene batanshokegije mhayo ū mu yenīyī.

⁷Aho wababona balīyisolela masumbī ga makūjo abo baalī balaalīkwa, ūbawīla mu shigemeng'hejo gīkī,

⁸“Ūlū ūlaalīkwa na munhū kūja kū būyegi bo būkombe, ūtizūshikīla kwigasīja isumbī ly'ikūjo, atizūbiza na munhū ūngī alaalīkilwe, ūyo hamo nīyo akūjiwe kūtinda ū bebe.

⁹Hūna ūyo wamulaalīkile būbīlī wing'we ashikile kwiza ūkūwīla gīkī, ‘Bebe īngaga a henaho igashe ū baba ūyū!’ A henaho ūkūgooka no, nguno ūkūshoka ha wigasho bo ha sīlīlī.

¹⁰Alīyo ūlū ūlaalīkwa shikīlaga ha wigasho bo ha sīlīlī, hūna ūlū wiza ūyo wamulaalīkile, akūkūwīla gīkī, ‘Ong'wise jaga ūkigasīje līlo a higūlya aho.’ Ū mu gīko ūkūbonekana ūlī na shingilima ū kū būtongi wa bose abo wigashaga nabo.

¹¹Nguno būlī ng'wene ūyo wigūngūhya wei ng'wenekīlī akūdohelejiwa, alīyo ūyo widohya akūgūngūhiwa.”

¹²Ūyo walī wang'wegeleja kūlya shilīwa nang'hwe ūng'wīla gīkī, “Ū bebe nang'ho ūlū ūbeeja shilīwa sha kūyega na banhū, yaya ū kūsolanhya banwani biyo dūhū ū mu kalaalīkīle, nūūlū hamo ba mu kaya ya ng'wing'we dūhū. Nūūlū badūgūyo na bazenganwa biyo a basabi dūhū, abo ūmanile gīkī bashikile kūkūlaalīka nū bebe; nang'ho ūpandīke mheela mu gīko.

¹³Alīyo ūlū ūbeeja shilīwa sha kūyega na banhū, bitanage a bahabī na a bagokolo, na a balemehazu, na a babboku.

¹⁴Ū mu kwīta gīko ūkūbiza na lubango; nguno a boi batī na mheela ya kūkwinha, alīyo ūkwinhwa ng'wikanza lya būjūūko wa batūngīlīja.”

¹⁵Ūmò wa babo baalī bigasha nang'hwe ū Yesu aho wigwa ī yenīyo ūhaya gīkī, “Alī na lubango būlī ng'wene ūyo akūlya shilīwa ū mu būtemi bo ng'wa Mulungu.”

¹⁶Nang'hwe ūng'wīla gīkī, “Munhū nebe akabeeja shigukulu shitaale, ūlaalīka banhū bingī.

¹⁷Aho lyashika ī likanza lya shilīwa ūtūma nsese wakwe kūjūbitana abo baalī balaalīkwa. Kūbawīla gīkī, ‘Bing'we nzūgi lūūlū, nguno ī haha pyī ī shose shalonjiagwa.’

¹⁸Alīyo bakabiza gītī baalī balagana pye a bose, būlī ng'wene ūlomba kūlekejiwa. Ūmò ūng'wīla gīkī, ‘Baba naagūlile ilaale, nalīja kūlīlola, nalīkūlomba ūnilekeje nguno natūdūla ū kwiza.’

¹⁹Ūngī ūhaya, ‘Baba naagūlile tūyīkū ikūmi twa kūlīma, nalīja kūtūgema; na lūūlū nalīkūlomba ūnilekeje, nguno natūdūla ū kwiza.’

²⁰Na ūngī hangī nang'hwe ūhaya, ‘Yee baba ka naatoolile haha no, na lūūlū natūdūla ū kwiza!’

²¹Ū nsese ng'wenūyo wiza wīhaya pyī ī yenīyo ū kūlī ise būgonzo. Ū ng'wenekīlī kaya akapelana no, ūng'wīla ū nsese wakwe gīkī. ‘Jaga wangū pye a hose ū mu nzengo; ūbīta bīta ū mu nzīla ī nhaale nī ndo; ūbenhe aha a bahabī na a bagokolo, na a babboku, na a balema.’

²²Nang'hwe ū nsese ūhaya, ‘Baba ūyo ūlīgūhaya gwenūyo gwamalaga kwītwa, alīyo ī numba ītaalī ū kokala!’

²³Ū ise būgonzo ūng'wīla ū nsese ng'wenūyo gīkī, ‘Jaga na kū mapanda, pyī nū kū mayīla a mataale, ūūbakomeleja na nguzu bize, kūshisha yokale ī numba yane!

²⁴Nguno nalīmuwīla gīkī, pye abo baalī balaalīkilwe atīho nūūlū ūmò wabo ūyo akūshiloja nūūlū hado ī shilīwa sha ha ng'wane!’”

²⁵Mabita na mabita ga banhū gankūūbījaga ū Yesu, nang'hwe aho wabagalūkīla ūbawīla gīkī,

²⁶“Ose ose ūlū wiza kūlī nene alīyo atankolilwe ise nūūlū nina, nūūlū nke, nūūlū baana bakwe, nūūlū baana ba ng'wawe bagosha na bakīma; pyī nūūlū būpanga bokwe wei ng'wenekīlī, atūdūla ū kūbiza ng'hemba wane.

²⁷Nūūlū ūyo alīnilondeela alīyo atibūūkīgije nsalaba gokwe wei ng'wenekīlī, nū ng'wene atūdūla ū kūbiza ng'hemba wane.

²⁸Angū, alīho munhū kī ū mu bing'we ūyo adūgije kwandya nzenga aho ataalī kwigasha tame na kūbūlola ū būdito bo nzenga yenīyo, abone ūlū alī najo ī sabo ja kūdūla kwīmala?

²⁹Nguno atizūgelela kūtūūla nsingi dūhū, hūna ūlemeelwa ū kwīshikīlīja. A henaho abo bakūbonaga bakwandya kūyūnseka

³⁰balīhaya gīkī, ‘Mulīmona ū ng'wing'wana ūyū; olī wihamba hambile nzenga, yanemeelile ū kwīmalīja!’

³¹Nūūlū hangī, ntemi kī ūlū alī na bashilikale shihūmbī ikūmi, ūyo atandya igashe tame kwiganika chiza ūlū adūgije kwamba būlūgū kwilwisha na ntemi ng'wiye, ūyo aliza kūndumīla na bashilikale shihūmbī makūmi abīlī?

³²Ūlū ūbona gīkī atūdūla, akūtūma nhūng'wa wangū ū kūlī ng'wanishi kūko ataalī kūle, amane ūlū shilīho shose shose īsho shidūgije kwenha mhola.

³³Nose lūūlū na a bing'we, būlī ng'wene ūyo atūdūla kūlekana gete najo ī sabo jakwe pyī ī jose, atūdūla ū kūbiza ng'hemba wane!

³⁴Ū munhu ng'hana gūlī gwawiza, alīyo ū munhu ūlū gūlinda gūsūūka, angū, gūdūgije kūsandūchiwa kī hangī?

³⁵Gūtūdūla nūūlū kūgunanha sī, pyī nūūlū ni kūtūmama gītī mboleela; gūkūbiza gwa kūponyiwa hanze dūhū! Ūyo alī na matū gakigwaga ni igwage.”