Read Sukuma Bible 2015 – Bibilia Ilagano Lya Kale 2015 Luka 15 Bible Online

Luka 15 - Sukuma Bible 2015 – Bibilia Ilagano Lya Kale 2015 bible

Luka 15

¹Pye a batobisha ba goodi na a banhū a bangī a ba shibi, bang'wegeelaga kūndegeleka.

²A Bafalisayo na a balangi ba shilagīlo bandya kūng'ung'uula balīhaya gīkī, “Ū munhū ng'wenūyū akwanukūlaga banhū ba shibi; nīyo nī shilīwa akūlyaga nabo!”

³Hūna ū Yesu ūbawīla lūsumo ūlū ūhaya gīkī,

⁴“Ī gīsī nani ū mu bing'we ūlū ūbiza alī na ng'holo igana hūna ūjimīīja īmò yajo, ūyo atūjileka ījo makūmi kenda na kenda kū matogolo, ūja akwīkoobaga īyo yatagalījaga, kūshisha aho alayīpandīkīle?

⁵Ūlū wīpandīka akūyega no; nīyo hangī akwīsesela ha mabega,

⁶Ītwale kaya. Wa kūhayīshisha ū kū kaya, ūbakuminga banwani biye na bazenganwa; ūbawīla gīkī, ‘Bing'we nzūgi tūyege, nguno nīpandīka ī ng'holo yane īyo yalī yajimīīlile!’

⁷Nalīmuwīla h'ūmo būlī nū būyegi bo ng'wigūlū kūlwa nguno ya ng'wa munhū nkenaagūji ūmò ūlū ūgalūka; kūtinda batūngīlīja makūmi kenda na kenda abo batī na nguno ya kūgalūka!”

⁸“Nūūlū hangī, alīho nkīma kī ūlū alī na hela jakwe ikūmi, hūna ūjimīīja īmò yajo, ūyo atīko kūbacha tala nūūlū na kūpyagūla ū mu kaya akwīkoobaga mu welwa ng'holò, kūshisha aho alayīpandīkīle?[5]

⁹Ūlū wīpandīka ū būyegi bokwe būkūbiza būtaale no, kūshisha nose akwitana binhya biye na bazenganwa biye abawīle gīkī, ‘ī hela yane īyī yalī yajimīīlaga nīpandīka; nzūgi tūyege hamò!’

¹⁰Nalīmuwīla h'ūmo būkabizīlaga ū būyegi nū kū bamalaika ba ng'wa Mulungu, kūlwa nguno ya ng'wa munhū ūmò nkenaagūji ūlū ūgalūka.”

¹¹Hangī ūhaya, “Munhū nebe walī na bitūnja babīlī.

¹²Ū ndo wabo ūng'wīla ū ise gīkī, ‘Baba ninhage ū nene ū ngabo go wingīji bone.’ Ū namhala ūbagabanhya ī sabo yakwe.

¹³Jitabītile shikū ningī, ū ndo ūkumingīja pyī ī shikolo shakwe, ūhūlūja ajile kū masī ga kūle. Ūūkajimala ī sabo jakwe kūjiponanja mu nzīla ja sagala sagala.

¹⁴Aho wamala pyī ī shikolo shakwe, kwimanīla yagwa nzala nhaale pye a hose ū mu sī yenīyo, ūbiza na makoye mataale no!

¹⁵Hūna ūja ha ling'wana ijigajiga lya mu sī yenīyo, lyūkang'winha nīmo gwa kūyūdīīma ngulubī.

¹⁶Nang'hwe ūyikūmva kūlya a mūūla ayo jalyaga ī ngulubī, kwike walī atīho nūūlū ūmò wa kūng'winha shose shose!

¹⁷Alīyo aho giyegeela a masala, wiwīla gīkī, ‘Ū baba alī na bitūmamīja ba mheela banga abo bakūlyaga shilīwa bigūta bashileka na kūshileka, alīyo ū nene ūūyū nalībūlagwa nzala aha!

¹⁸Ī gete naje ū kūlī baba nakangwīle mu magūlū nang'wīle gīkī, “Baba naahūbile ū ng'wigūlū nū kūlī bebe.

¹⁹Natigeleelilwe ū kwitanwa gīkī nalī ng'wana wako hangī; nīītage kūbiza ūmò wa batūmami bako!”

²⁰Na ng'hana ūbūūka ūja ū kūlī ise, alīyo aho ataalī kūle, ū ise ūnoleela, ūnsaatwa. Ūnsūng'wanha bo nhambo. Ūūkashikīla kūngwīla ūnkumbatīla mu nhingo, kūnū akūmbipaga.

²¹Ū wei ū nyanda wandya kūng'wibūūlīla ū ise alīhaya gīkī, ‘Baba nalī ng'hūbi no, ū ng'wigūlū nū kūlī bebe; natigeleelilwe ū kwitanwa gīkī nalī ng'wana wako!’

²²Alīyo ū ise ūbawīla a batūmami gīkī, ‘Bing'we enhagi wangū shizwalo shawiza ng'wize munzwalīkīje; ng'wenhe na pete munzwalīkīje ū kū lwala lokwe, na shilatū sha kūzwala ū kū mhambala jakwe.

²³Ī mūūga ya ng'ombe, ī ng'īnu, yenhagi nayo ng'wīsīnze; tūlye tūyege!

²⁴Nguno ū ng'witūnja wane ng'wenūyū wapūlūgūkaga kwīnga mu kūcha, wilongaga kwīnga mu kūjimīīla!’ Bandya ng'hana kūyega.

²⁵Kwike ū ng'witūnja wakwe ū ntaale akasangwa olī kū ngūnda, aho aliza wahayegeela a ha kaya, ūyigwa ī mbina, nī mhūndū jilīzīlīng'hanya.

²⁶Ūng'witana ūmò wa badinha a batūmami, ūmūja a makūlū ga mihayo yenīyo.

²⁷Nang'hwe ūng'wīla gīkī, ‘Wizaga ū nzunayo, ū namhala wamūlagīlaga ī mūūga ya ng'ombe ī ng'īnu, nguno wampandīkaga alī mhola o gīlī gīlī!’

²⁸Alīyo ū wei akapelana no, wisukūla; ūlema nū kwingīla ū mu kaya. Ūfuma ū ise kūng'wikūmbīlīja ingīle.

²⁹Nang'hwe ūshosha alīng'wīla ū ise gīkī, ‘Ū bebe ng'wenekīlī ūmanile gete, gīkī ī myaka na myaka pyī ī yose īyī, nalīho aha nakūkūtūmamīlaga, nataalī kūkenaagūla nūūlū shilagīlo shako shimò na hado yaya; ī gīsī oninha kī ū nene? Angū ndūhū nūūlū ni kabūli kamò dūhū, gīkī nane nalye nayege na basūmba bichane.

³⁰Lelo aho wiza ū ng'wana wako, ū ng'wene wantona ing'ombe gete; alīyo hū wakajiponangije ī sabo jako sagala sagala, akūlyaga na mamalahya!’

³¹Nang'hwe ū ise ūnshokeja ūng'wīla, ‘Ng'wana wane, ū bebe ūlī ha kaya aha pyī ī shikū; pyī ī shikolo shane shilī shako.

³²Na ng'hana shitwigeleelilwe tūyege na kūtambīīla, nguno ū nzunayo ng'wenūyū wapūlūgūkaga kwīnga mu kūcha, wilongaga kūfuma mu kūjimīīla.’”