Read Sukuma Bible 2015 – Bibilia Ilagano Lya Kale 2015 Luka 16 Bible Online

Luka 16 - Sukuma Bible 2015 – Bibilia Ilagano Lya Kale 2015 bible

Luka 16

¹A bahemba bakwe nabo ūbawīla lūsumo; ūhaya gīkī, “Walīho munhū nsabi, walī na nang'hani o sabo jakwe. Ū nang'hani ng'wenūyo ūbūūlwa, gīkī akūjiponanjaga sagala ī sabo ja nsabi ng'wenūyo.

²Hūna ūng'witana ūmūja gīkī, ‘Bebe mhayo kī ū gwenūyū nandije kwigwa gūkūhayiagwa? Alinoolekejage ū nīmo gwa būlang'hani wako nagūlole ūmo gūlī. Nalībona ī gete ūkūgoya ū nīmo gwenūyū, ū go kūjilang'hana ī sabo jane!’

³Ū nang'hani o sabo ng'wenūyo wandya kwiwīla gīkī, ‘ī gīsī, nīīte ginehe īkī ū baba būgonzo alīnīnja a ha nīmo? Ū kūlīma nalemeelilwe, ū kwandya kwilombeleja nī chene nalīcha minala!

⁴Yū, ī gete namana ū gwa kwīta; ūyo gūkūbīīta bayūneegeleja ū mu kaya jabo ūlū nalīnjiwe a ha nīmo!’

⁵Hūna wandya kūbitana ūmò ūmò abo batondagwa magasa nū ise būgonzo. O kwandya ūng'wīla gīkī, ‘Ū bebe, ni ūlī na būgasa kī ng'hana ū kūlī namhala?’

⁶Nang'hwe ūhaya ‘Ngelekelo igana ja maguta.’ Ūng'wīla, ‘Anukūlaga jiiji aha mbapūla jako, wigashe wandīke makūmi atanò; nīyo kangīlījaga.’

⁷Na ūngī ūng'wīla, ‘Al'ū bebe ginehe, ūlī na būgasa kī?’ Ūhaya, ‘Matangwa igana ga būsīga?’ Ūng'wīla, ‘Solaga nang'ho ī mbapūla jako, andīkaga makūmi anaane!’

⁸Ū ise būgonzo o nang'hani ū nyeecha ng'wenūyo akankumīlīja, īkī akatūmamīla masala ū kwīyīta ī yenīyo. Nguno a baana ba mu sī bachagūku ū kū mihayo yabo, kūtinda a baana ba ng'wisana ū mu shibyalīlwe shabo.

⁹Nalīmuwīla ītūmamīlagi ī sabo ya būnyeecha kwibeegeja būnwani, ūlū yūshila bakūng'wanukūla ū mu wikalo bo welelo.

¹⁰Ū munhū ūyo alī ng'wishigwa mu shikolo shido ashikile kūsanyiwa nū mu shitaale; alīyo ūyo atī ntūngīlīja mu shido, nū mu shitaale atūbiza ntūngīlīja.

¹¹Nose lūūlū ūlū ng'ūbiza mutī bishigwa ū kū sabo ya mu sī, nani ūyo alamusanye ū kū sabo ya ng'hana?

¹²Na hangī ūlū ng'ūlemeelwa kūbiza bishigwa kū shikolo sha bangī, nani ūyo alang'winhe shikolo shibize shing'we benekīlī?

¹³Atīho ntūmami wa mu kaya ūyo adūgije kūbatūmamīla bataale babīlī, nguno adūgije kūnkolwa ūmò wabo, ūntogwa ū ūngī; nūūlū adūgije kwiyigwa nū ūmò, alīyo ū ūngī ūndalaha. Mutūdūla kūntūmamīla ū Mulungu hamò na sabo!”

¹⁴A Bafalisayo īkī baalī batogilwe sabo, aho bīyigwa pyī ī yenīyo bakandalaha; bandya kūng'wineenelegeja.

¹⁵Nang'hwe ūbawīla, “A bing'we angū mukiyoolechaga ū kū banhū gīkī mulī batūngīlīja, alīyo ū Mulungu ajideebile īng'holò jing'we; nguno īsho shikakumīlījiagwa na banhū shilī sha malofu ū kūlī Mulungu.

¹⁶Ī shilagīlo na a bahangi, bagelelile halī Yohana; ū kwīngīīla a h'ikanza lyenīlo ū būtemi bo ng'wa Mulungu būkūlomeelagwa, na būlī ng'wene akwigaganījaga ū kwingīla moi.

¹⁷Alīyo īlī shinogu ī ligūlū nī sī ū kūbīta, kūtinda kwīnga ho nūūlū kanuguta kadoololo ka shilagīlo.

¹⁸Munhū ose ose ūlū ūneka nke ūtoola ūngī, akūbiza alīshihya. Nū yūyo alantoole ū nkīma ūyo alekilwe na ngoshi, nang'hwe akūbiza akūshihyaga.

¹⁹“Ali lūūlū, walīho ngosha nsabi, wikalaga azwalile ng'hanjo ya nyasabi ya nzulunge, na shikoye shisoga; walī mu kikalīle ka kūyegela būpanga pyī ī shikū ja būlamu bokwe.

²⁰Hama walīho na kunese nebe witanagwa Lazalo: Walī okalile malonda pyī ū mīlī. Ū munhū ng'wenūyo wenhagwa wiza watūūlwa ha mita go nsabi ng'wenūyo,

²¹gīkī ayūpandīka nūūlū malagalīkwa kūfuma a ha meza ya nsabi walya; na mva jizaga ho jayūgalambīla a malonda gakwe!

²²Nose ū kunese ng'wenūyo ūcha, ūbūūchiwa na bamalaika; ūūkatūūlwa kū wikalo bo ng'wa Abulahamu. Ū nsabi ng'wenūyo nang'hwe ūcha, ūjīkwa.

²³Aho alī mu kūlimu ūyūluha no, wahayūponya a miso gakwe ūnoleela kūle ū Abulahamu, alī nū Lazalo bigashije dege.

²⁴Ūlīla n'ilaka; ūhaya, ‘Baba Abulahamu, nichīlage shigongo, ūntūme ū Lazalo asombye nūūlū lwala lokwe mu minzī alūtwinīje ū lūlīmi lone alūpoje; nguno nalī na makoye no ū mu moto gwenūyū!’

²⁵Nang'hwe ū Abulahamu ūnshokeja gīkī, ‘Bebe ng'wana, izūkagwa gīkī ū bebe ū mu būpanga wako wapandīkaga ī yako ī misoga. Ū Lazalo nang'hwe wapandīkaga yabūbi, alīyo ī haha nang'hwe alī mu būyegi; ū bebe ūlī mu būluhi.

²⁶Nīyo hangī a higūlya ya yose yenīyī, a ha gatī ying'we na a bise lītūūlilwe ho ishimayenze, nose abo batogilwe kwīnga ū kū lwandī lwise kwiza kū bing'we batūdūla; na a babo batogilwe kwiza kūūnū kūfuma ūko mulī nabo batūdūla.’

²⁷Ūng'wīla hangī gīkī, ‘Nahene shi lūūlū baba nalīkwikūmbīlīja, nūūlū ūntūme ū kū kaya ya ng'wa baba.

²⁸Nguno nalī na baana bang'wise batanò; aje akabahūgūle batiziza nabo ū kūūnū; kūbi no!’

²⁹Ū Abulahamu ūng'wīla hangī gīkī, ‘Balī nang'hwe ū Musa na a bahangi, ni babigwage benabo.’

³⁰Nang'hwe ūnshokeja ūhaya, ‘ītī chene baba Abulahamu, alīyo ūlū wigela munhū wa kūfuma mu bafu aje ūko balī, badūgije ū kūgalūka.’

³¹Ū Abulahamu ūng'wīla hangī gīkī, ‘Ūlū būlinda būlemeelwa kūng'wigwa ū Musa na a bahangi, batīko ū kūhūgūka na hado yaya nūūlū akilonga ose ose wa kūfuma mu bafu!’”