Read Sukuma Bible 2015 – Bibilia Ilagano Lya Kale 2015 Luka 17 Bible Online

Luka 17 - Sukuma Bible 2015 – Bibilia Ilagano Lya Kale 2015 bible

Luka 17

¹Hūna ūbawīla hangī a bahemba bakwe gīkī, “Ītadūlīkanile ī sha kwipamya shileke ū kūbiza ho; kwike ū munhū wa kūshenheleja alī mu kwihīga kūtaale no!

²Īkūmeelela ūlū kūtungīlījiwa ū mu nhingo yakwe iwe lya kūshela, ūūkaponejiwa mu nyanza shimu, kūtinda kūng'wenheleja kwipama nūūlū ūmò wa bado bado aba.

³Bing'we, ilang'hanagi; ūlū ng'wiyo ūkūhūba ng'hūgūlage.

⁴Nūūlū akakūhūba ng'hangala mpungatī ū mu lūshikū, hama ūshisha ng'hangala mpungatī alikala ūkūshokeela kūkūwīla gīkī, ‘Nilekejage’; nekejage ng'hana!”

⁵Hūna a batūng'wa būng'wīla ū Seeba gīkī, “Tongejage ū kūzunya.”

⁶Nang'hwe ū Seeba ūbawīla, “Ūlū ng'ūbiza na kūzunya gītī gwa kabīyū ka haladali, mushikile nūūlū kūgūwīla nkūyū gīt'ūyū gīkī, ‘Dubbūkaga wīnge a henaho ūje ūkihambe mu nyanza.’ Ng'hana gūkūng'wigwa.”

⁷“Ī gīsī ng'hana, ūlū munhū alī na nsese, hūna ū nsese ng'wenūyo ūbiza wajaga kūlīma, nūūlū wachilūlaga mitugo; ūlū ūūkashoka a ha kaya, nani ū mu bing'we ūyo akūshikīla kūng'wīla gīkī, ‘Nzūgū wigashe aha ūlye?’

⁸Angū, atūng'wīla dūhū gīkī, ‘Bebe itungage ūkangīlīje ū kūnibeeja beegeja tame ū nene ī shilīwa ūnitengele naboneke; ūlū nalamale nang'ho ūkwigasha ūlye?’

⁹Akūnūmbīlīja ū nsese ng'wenūyo kūlwa kūshikīlīja īyo alagīlilwe kwīta?

¹⁰H'ūmo īlī nū kū bing'we, ūlū ng'ūlinda ng'ūmala ū kwīta pyī īyo mulagīlilwe, hayagi gīkī, ‘A bise tūtī na solobo yose yose, nguno tūlī basese dūhū; twabeejaga īyo ītwigeleelilwe kwībeeja!’”

¹¹Ū Yesu aho wabūūka kūja Yelusalemu ūbītīla nzīla ya mu lūbīmbī lo Samalia na Galilaya.

¹²Aho washika mu chalo shilebe, ūmanhya na banhū ikūmi basaatile mbiji. Bīmīīla ka kūle,

¹³hūna būng'hamukīla balīhaya, “Seeba Yesu, tūkūlīlagwe!”

¹⁴Aho wababona ūbawīla gīkī, “Jagi mukiyooleche kū bagabīji.” Na ng'hana bandya ū kūja; alīyo aho bataalī mu nzīla, bahayimanīla bapīla ī mbiji!

¹⁵Ūmò wabo aho wabona wapīla, ūshoka alīnkumīlīja Mulungu n'ilaka lya higūlya.

¹⁶Ūshikīla kūgwa mu magūlū ga ng'wa Yesu, winama ha sī ū būshū bokwe ūnūmba; nūwe walī Nsamalia.

¹⁷Hūna ū Yesu ūshosha ūhaya, “Batapīlile a bose ikūmi? Al'a bangī abo kenda balī halī?

¹⁸Baleka ū kwilonga a ba kwiza kūnūmba ū Mulungu, ūlū at'ū ngeni ūyū dūhū?”

¹⁹Hūna ūng'wīla, “Būūkaga ūje, ū kūzunya kwako kwakūpījaga.”

²⁰Bafalisayo bakamūja mhayo gw'ikanza lya kwiza kwa būtemi bo ng'wa Mulungu. Nang'hwe ūbashokeja ūbawīla gīkī, “Ū būtemi bo ng'wa Mulungu būtiza būkūloleelagwa!

²¹Batandya kwiwīla gīkī, ‘Būūb'aha;’ nūūlū gīkī, ‘Būūb'ūko;’ Nguno ū būtemi bo ng'wa Mulungu būlī hamò ning'we.”[6]

²²Hūna ūbawīla a bahemba gīkī, “Jikūshika shikū ja kwikūmva a bing'we kūlūbona nūūlū lūmò lwa shikū ja Ng'wana wa Munhū, alīyo mutūdūla ū kūlūbona.

²³Ali lūūlū, ūlū bandya kūmuwīla gīkī, ‘Lolagi ūko’, nūūlū gīkī, ‘Lolagi aha,’ yaya ū kūja, yaya nūūlū kūbakūūbīja.

²⁴Nguno ū mu lūshikū lo Ng'wana wa Munhū īkūbiza gīt'ūmo lūlabi lūkalabyaga ng'wilunde, kūfuma ipandī līmò; lwang'weka kūshisha ipandī līngī.

²⁵Kwike shiigelile aluhiwe tame mu mihayo mingī na kūleng'wa nī shibyalīlwe īshi.

²⁶Ūmo īkabizīla mu shikū ja ng'wa Noa, h'ūmo īkūbizīla nū mu shikū ja Ng'wana wa Munhū.

²⁷Ū mu shikū jenījo balyaga, bang'waga, batoolaga, na batoolagwa; kūshisha lūshikū ūlo Noa akingīla mu ngalaba. Ī lihūūma aho liza lyūbayagaja pye a bose!

²⁸H'ūmo yalī nū mu shikū ja ng'wa Lutu; balyaga, bang'waga, bagūlaga shikolo na kūjinja, balīmaga na bazengaga.

²⁹Aho lwashika ū lūshikū ūlo Lutu akafuma ū mu Sodoma, bidīkīlwa moto na būgota bo shibiliti, gītī kūtūlwa mbula kūfuma ng'wilunde, būshila pye!

³⁰H'ūmo īkūbizīla nū mu lūshikū lo kwilonga kwa Ng'wana wa Munhū.

³¹Ū mu lūshikū lwenūlo ūyo ūsangwa alī kwigūlya ya numba alīyo ī shikolo shakwe shilī mu kaya, atizika gīkī ashisole; nū yūyo alī kū malaale nang'hwe atizūshokela shikolo kū numa.

³²Ng'wizūkagwi ū nke o ng'wa Lutu!

³³Būlī ng'wene ū wa kwihamba kūlang'hana būpanga bokwe akūbūjimīīja, alīyo ū wa kūbūjimīīja, ū ng'wene akūbūpīja.

³⁴Nalīmuwīla ū mu būjikū wenūbo, banhū babīlī bakūsangwa balaalile ha būlīīlī būmò, ūmò akūtwalwa ūngī ūlekwa.

³⁵Bakīma babīlī bakūsangwa bakwishiishaga, ūmò akūtwalwa ūngī ūlekwa. [

³⁶Banhū babīlī bakūbiza balī mu ngūnda, ūmò akūtwalwa ūngī ūlekwa.]”

³⁷Bahayūmūja gīkī, “Seeba halī?” Nang'hwe ūbawīla, “Aho gūlī mimba hū hene aho jikwibilingīla nī mbeshi!”