Read Sukuma Bible 2015 – Bibilia Ilagano Lya Kale 2015 Luka 18 Bible Online

Luka 18 - Sukuma Bible 2015 – Bibilia Ilagano Lya Kale 2015 bible

Luka 18

¹Hūna ūbinha lūsumo lo kūbalanga gīkī shiigelile bakomeele ū kūlomba, yaya ū kūgwa ng'holò.

²Ūhaya gīkī, “Walīho namuji mu nzengo nebe, walī atang'ogohile Mulungu; na a banhū walī atabadīlīlaga.

³Hama ū mu nzengo gwenūyo walīmo na nkīma walī wachīlwa ngoshi; wikalaga ūja būlī gwa ū kūlī namuji okandayīīla alīhaya, ‘Nigunanhage baba nalī na ng'wanishi!’

⁴Gakabīta makanza atūdīlīlaga, alīyo nose wanoga wiyangūla wei ng'wenekīlī. Wiwīla gīkī, ‘Nūūlū īkī natang'ogohile ū Mulungu, na a banhū natabadīlīlaga,

⁵alīyo nahene īkūbeelela nangunanhe ū nchīlwa ng'wenūyū, nguno akūnikoyaga no; īkī nose waninojaga gete!’”

⁶Hūna lūūlū, ū Seeba ūhaya, “Ng'wabona ūmo akahayīla ū namuji ng'wenūyo nūūlū īkī walī atī ntūngīlīja?

⁷Angū, ū Mulungu hamò na wiyūmīlīja bokwe ū bose ūmo alī ng'wenūmo, atūdūla ū kūbagunanha a basolwa bakwe abo bakanīlīīlaga līīmi na būjikū?

⁸Nalīmuwīla akūbagunanha wangū. Alīyo ūlū ūshoka ū Ng'wana wa Munhū, angū, akūsanga kūlīho ū kūzunya ū mu sī?”

⁹Hama hangī ūbinha lūsumo abo bisanyaga gīkī a boi hū batūngīlīja no, kūnū būbadalaha pye a bangī. Ūbawīla gīkī,

¹⁰“Banhū babīlī bakaja mu hekalu kūlomba, ūmò walī Mfalisayo, ūngī ntobisha wa goodi.

¹¹Ū Mfalisayo wīmīīla wandya kūlomba alikumīlīja wei ng'wenekīlī gīkī, ‘Mulungu nalīkūlūmba, nguno natī gīt'ūmo balī a banhū a bangī pye: Banyeecha, bahūnga, bashihani; nūūlū natī gīt'ūmo alī ū ntobisha wa goodi ūyū!

¹²Ū nene nakafungaga ng'hangala ibīlī būlī nyuma, na hangī nakafunyaga īmò ya ng'wikūmi ya shikolo shose īsho nakapandīkaga!’

¹³Alīyo ū ntobisha wa goodi ū ng'wene wīmīīla ha mhūjo, ūduuma nūūlū kūbūūcha miso gakwe ng'wigūlū. Ūgelela kwiyinamīīla dūhū, ūyitūla tūla ha shikuba kūnū alīhaya gīkī, ‘Mulungu nikūlīlagwe, nalī munhū wa shibi ū nene!’

¹⁴Nalīmuwīla ū ng'wenūyo akaja ī kaya obalīlagwa būtūngīlīja, kūtinda ū ūngī ūyo; nguno būlī ng'wene ūyo wigūngūhya ng'wenekīlī akūdohelejiwa, alīyo ūyo widohya akūgūngūhiwa.”

¹⁵Būng'wenhela na baana gīkī abakuumye, kwike a bahemba aho bababona būbahama!

¹⁶Alīyo ū Yesu ūbitana bize a halī we; ūhaya gīkī, “Bazunīlījagi a baana bize a halī nene, mutabalemejage; nguno ū būtemi bo ng'wa Mulungu būlī wabo a ba mbika yenīyī.

¹⁷Nalīmuwīla gwa ng'hana gīkī ūyo atūwanukūla ū būtemi bo ng'wa Mulungu gītī ng'wana, atingīla mo na hado yaya!”

¹⁸Hūna nsugi nebe ūmūja gīkī, “Nangi wawiza, nīīte mhayo kī nabize ng'wingīji ū mu būpanga butashilaga?”

¹⁹Nang'hwe ū Yesu ūng'wīla, “Nibūlī ūlīnitana wawiza? Atīho wawiza nūūlū ūmò ūlū atī Mulungu wike!

²⁰Ū bebe ūshimanile ī shilagīlo ūmo shihayīlile; ī gīkī, ‘Yaya ū kūshihya, Yaya ū kūbūlaga, Yaya ū kwiba, Yaya ū kūkaanīla būlomolomo, Nkūjage so na noko.’”

²¹Nang'hwe ūhaya, “Pyī ī yenīyī nīdimile kūfuma ha būyanda!”

²²Alīyo ū Yesu aho wigwa gīko ūng'wīla, “Ūlīleba ho mhayo gūmò, shijinjage pyī ī shikolo īsho ūlī nasho ūbinhe bahabī, ūkūbiza na wibīkīja wa sabo ng'wigūlū, hūna wize ūnilondeele.”

²³Aho wigwa ī yenīyo akapīnīhala no, nguno walī nsabi ntaale.

²⁴Ū Yesu ūnkalalīla; hūna ūhaya, “Īlī shilambu no abo balī na sabo ū kwingīla ū mu būtemi bo ng'wa Mulungu!

²⁵Nīyo īlī shinogu ī ngamīla ū kūbīta mu kapūndū ka lūshinge, kūtinda ū nsabi ū kwingīla mu būtemi bo ng'wa Mulungu!”

²⁶Abo badegelekaga būkumya no, bandya kwibūja gīkī, “Yee! Alīyo lūūlū nani ūyo adūgije ū kūpīla?”

²⁷Nang'hwe ūhaya, “Īyo ītadūlīkanile ū kū banhū, īdūlīkanile ū kūlī Mulungu.”

²⁸Hūna ū Petelo ūhaya, “Ī gīsī angū ūlībona gīkī a bise twaleka ī shikolo shise kūlwa kūkūlondeela bebe!”

²⁹Nang'hwe ū Yesu ūbawīla, “Nalīmuwīla gwa ng'hana gīkī, atīho nūūlū ūmò ūyo waleka numba nūūlū nke, nūūlū baana ba ng'wawe, nūūlū babyaji, nūūlū baana bakwe kūlwa nguno ya būtemi bo ng'wa Mulungu,

³⁰Ūyo atanukūla ng'hangala ningī ū ng'wikanza lya haha īlī, hama ū ng'wikanza īlo līliza būpanga butashilaga.”

³¹Ūbasola abo ikūmi na babīlī, hūna ūbawīla; “Ī haha tūlīlinha kūja Yelusalemu, managi gīkī īkūjūshikīlījiwa pyī īyo yandīkilwe mu bahangi kūlwa Ng'wana wa Munhū.

³²Nguno akūtūūlwa mu makono ga banhū ba mahanga bangīmbe nyachilū na kūnsondagūla na kūnswīla mate.

³³Hūna ūlū būmala kūntūla bakūmūlaga, alīyo akuhimbuka ha lūshikū lo kadatū lwaho.”

³⁴Kwike batitegelegije nūūlū gūmò ū mu yenīyo, baalī bataalī babisīlilwe; hama batamūgije na a makūlū gayo īyo akīhaya.

³⁵Aho wegeela ī Yeliko, ūsangwa alīho mboku nebe igashije hihī na nzīla, akwilombelejaga.

³⁶Wahayigwa ibita lya banhū balībīta, ūbūja ni mhayo kī ū gwenūyo.

³⁷Būng'wīla, “Yesu wa Nazaleti alībīta.”

³⁸Hūna wandya kūhamuka alīhaya gīkī, “Yesu Ng'wana wa ng'wa Daūdi, nikūlīlagwe!”

³⁹Abo baalī kū būtongi būyūng'hama gīkī ahuumūle, alīyo ū wei hū ongeja gete ū kūhamuka; alīhaya, “Ng'wana wa ng'wa Daūdi, ka nikūlīlagwe!”

⁴⁰Ū Yesu wīmīīla ūlagīla enhwe aho walī; aho wegeela ūmūja,

⁴¹“Ūtogilwe nakwītīle mhayo kī?” Nang'hwe ūhaya; “Seeba ka nayūbona nane!”

⁴²Nang'hwe ū Yesu ūng'wīla, “Bizagūbona ū kūzunya kwako kwakūpījaga.”

⁴³Na ng'hana haho na haho wandya kūbona, ūnondeela ū Yesu kūnū akūnkumīlījaga Mulungu. Na a banhū abo bakabona būngongoola ū Mulungu.