Read Sukuma Bible 2015 – Bibilia Ilagano Lya Kale 2015 Luka 20 Bible Online

Luka 20 - Sukuma Bible 2015 – Bibilia Ilagano Lya Kale 2015 bible

Luka 20

¹Lūshikū lūmò ū Yesu aho alī mu hekalu akūbalangaga a banhū na kūbasomboolela Ng'hūlū Jawiza, kwimanīla bansanga bagabīji bataale na balangi ba shilagīlo, hamò na banamhala.

²Būng'wīla gīkī, “Bebe tūwīlage, īyo ūkwīyītaga yenīyī ūkwīyītaga mu būdūla kī, nīyo hangī nani ūyo wakwinhile ū būdūla wene?”

³Nang'hwe ūbashokeja gīkī, “Nane namubūje gūyū mhayo niwīlagi.

⁴Ū būbatīīja bo ng'wa Yohana boolī būfumile ng'wigūlū, nūūlū kū banhū?”

⁵Bandya kwilūnjalūnja baliwīla, “Ūlū tūlahaye boolī būfumile ng'wigūlū, akūtūbūja gīkī, ‘Nibūlī lūūlū mutīzunije ī mihayo yakwe?’

⁶Hama hangī ūlū tūlahaye gīkī, ‘Boolī būfumile kū banhū,’ a banhū bakūtūponda mawe; nguno pye bazunije gīkī ū Yohana walī ng'hangi.”

⁷Hūna būkalīla kūnshokeja dūhū gīkī, “Tūtamanile ūko boolī būfumile!”

⁸Nang'hwe ū Yesu ūbawīla, “Nū nene natūmuwīlaga ī yenīyī nakwīyītaga mu būdūla kī.”

⁹Ha numa ya henaho ūbawīla a banhū lūsumo lūūlū; ūhaya gīkī, “Munhū akalīma ngūnda ūgūhamba mizabibu. Hūna ūgūleka mu makono ga balīmi; ū wei wīnga ho, ūdīla ikanza ilīhu atīho.

¹⁰Ū ng'wikanza lyenīlo ūtūma nsese, aje ū kū balīmi benabo bakang'winhe matwajo kūfuma ū mu ngūnda. Alīyo a balīmi benabo būntūla, būmpeeja wīnga koi makono dalali.

¹¹Ūtūma nsese ūngī, nū ng'wene būūkantūla būng'wītīla yabūbi no; nang'hwe būmpeeja wīnga makono dalali.

¹²Wahayūtūma na wa kadatū, ū ng'wene būūkamelagūla nguma, būmponya hanze.

¹³Nose ū ng'wenekīlī ngūnda wiwīla gīkī, ‘ī gete nīīte mhayo kī shi? Nantūme ū ng'wana wane ū ntogwa, hamo ū ng'wene bakūjūnkūja!’

¹⁴Alīyo a balīmi benabo aho bamona biwīla gīkī, ‘Ūyū angū hū ng'wingīji gete, tūmūlagagi būbize wise ū wingīji!’

¹⁵Būmponya hanze ya ngūnda būūkamūlagīla kwenūko! Ī gīsī lūūlū ū ng'wenekīlī ngūnda akūbīīta ginehe a banhū benabo?

¹⁶Angū akwiza abakenaagūle a balīmi benabo, nū ngūnda agūtūūle mu makono ga bangī!” Aho bigwa gīko būhaya, “Ū gwenūyū gūtūdūlīkana!”

¹⁷Ūbakalalīla; hūna ūbawīla, “Ī gīsī shilī na makūlū kī ī shandīkwa īsho shihayile gīkī, ‘ī liwe īlo bakalīlema bazengi, h'īlo lyabizile lya kwīgoloolela ī numba?

¹⁸Būlī ng'wene ūyo ūlīgwīla ī liwe lyenīlo akūpaanagūka paza paza; lelo ūyo lyūngwīla, ū ng'wene līkūntobagūla tobo tobo!’”

¹⁹Ī likanza lyenīlo, a balangi ba shilagīlo na a bagabīji bataale būhaya kūndima, nguno bakamana gīkī ū lūsumo lwenūlo akalūhaya kūlwa nguno yabo; alīyo būbogoha a banhū!

²⁰Hūna bandya kūkooba nzīla ya kūndima mu nyasala sala ū Yesu; būntūmīla badati, būja mu kwigīmbīja gītī gīkī balī batūngīlīja. Baalī batogilwe kūngwasha mu kalūngalūngīle, bapandīke nguno ya kūndima, na kūntūūla mu makono ga nsugi alamulwe.

²¹Bahayūshika būng'wīla, “Nangi tūmanile gīkī ūkalūngalūngaga na kūlanga mu būtūngīlīja, na gīkī ūtadīlīlaga banhū mu kūlola būshū, alīyo ī nzīla ya ng'wa Mulungu ūkīlangaga mu ng'hana.

²²Angū, a bise tūzunīlījiwe ū kūtoba ī goodi ya ng'wa Kaisali, nūūlū yaya?”

²³Alīyo īkī akabitegeleja ī nyasala sala yabo, ūbawīla gīkī,

²⁴“Noolekejagi denali īmò. Ī suso īyī nū wandīke ūbū, sha ng'wa nani?” Būhaya, “Sha ng'wa Kaisali.”

²⁵Nang'hwe ūbawīla, “Hū kūhaya ī sha ng'wa Kaisali ng'winhagi Kaisali, ni sha ng'wa Mulungu nasho ng'winhagi Mulungu.”

²⁶Būlemeelwa ū kūngwasha ū mu kalūngalūngīle ū kū būtongi wa banhū, būgelela kūlīkumya dūhū ī lishosho lyakwe, būhuumūla sele!

²⁷Bamò ba Basadukayo abo bahayile gīkī būtīho būjūūko, bakiza ū kūlī Yesu; būmūja

²⁸balīhaya, “Nangi ū Musa atwandīkīlile gīkī, ūlū ndūgū atoolile hūna ūzumalīka ūleka nke, alīyo atī na ng'wana, shiigelile ng'wanong'wawe ang'wingīle ū nkīma ng'wenūyo amyalīle baana ū ndūgūye.

²⁹Ali lūūlū, baalīho bagosha mpungatī ba shikūlū na shizuna; ū tangi wabo ūtoola, alīyo ūcha atalekile būbyīle.

³⁰Ū wa kabīlī ūng'wingīla ū nkīma ng'wenūyo,

³¹nū wa kadatū; kūshisha pye a bose mpungatī būshila kūcha batalekile nūūlū baana!

³²Nose ū kū ng'halīlo yaho nū nkīma ūcha.

³³Ī gīsī lūūlū, ū ng'wikanza lya būjūūko, ū nkīma ng'wenūyo akūbiza nke wa ng'wa nani; īkī pye a bose mpungatī baalī bantoola?”

³⁴Ū Yesu ūbawīla gīkī, “A baana b'ikanza īlī h'abo bakatoolaga na kūtoolwa.

³⁵Alīyo abo babalilwe gīkī bigeleelilwe kūbiza mo ū ng'wikanza lyenīlo na kwanukūla būjūūko kūfuma mu bafu, a bene batī ba kūyūtoola nūūlū kūtoolwa yaya.

³⁶Nguno bakūbiza gītī bamalaika, batīko nūūlū kūcha; a boi balī baana ba ng'wa Mulungu, īkī balī baana ba būjūūko.

³⁷Nīyo ū mhayo gwa kūjūūchiwa bafu gwenūyū, nū Musa akoolekejiwa a h'isaka; gīt'ūmo alīhayīla gīkī, ‘Ū Seeba alī Mulungu wa ng'wa Abulahamu, na Mulungu wa ng'wa Isaka, na Mulungu wa ng'wa Yakobo.’

³⁸Ū Mulungu atī wa bafu, alī wa bapanga; nguno pye a bose balī bapanga ū kūlī wei.”

³⁹Bamò ba balangi ba shilagīlo bakizunīlīja nang'hwe būhaya, “Nangi watūngīlīja a kayombele.”

⁴⁰Batagemile kūmūja hangī mhayo gose gose.

⁴¹Hūna ū Yesu ūbabūja, “Nibūlī bakahayaga gīkī ū Kilisito ng'wana o ng'wa Daūdi?

⁴²Īkī ū Daūdi ng'wenekīlī ū mu shitabo sha Zabuli alīhaya, ‘Ū Seeba akang'wīla ū Seeba wane gīkī, Igashaga kū nkono gwane gwa būlyo,

⁴³kūshisha nabatūūle a banishi bako ha sīlīlī ya mhambala jako.’

⁴⁴Ī gīsī, ū Daūdi ūlū alīng'haya gīkī ‘Seeba,’ nose adūgije kūbiza ng'wana wakwe ginehe hangī?”

⁴⁵Aho bataalī būdegeleka pye a banhū, ū Yesu wandya kūbawīla a bahemba bakwe gīkī,

⁴⁶“Bilang'hanagi a balangi ba shilagīlo abo batogilwe kūgīshiwa na kūja būyeela mu magūlilū bazwalile ng'hanjo. Nū mu masinagogi batogilwe kwigasīja masumbī g'ikūjo; hangī nūūlū būlaalīkwa kūja kū shigukulu, nū kwene bakakūūbīlījaga ha magele ga bakūjiwa.

⁴⁷Balyi ba sabo ja bakīma bachīlwa, banhū ba kalombele kalīhu ka kwiyoolecha. A benabo bakūpandīka nsango ntaale kūtinda!”