Read Sukuma Bible 2015 – Bibilia Ilagano Lya Kale 2015 Luka 4 Bible Online

Luka 4 - Sukuma Bible 2015 – Bibilia Ilagano Lya Kale 2015 bible

Luka 4

¹Hūna lūūlū ū Yesu wīnga ī Yolodani okajiwe na Moyo Ng'wela; h'ūyo ūntongeela kūja kū matogolo,

²Ūūkamala ko shikū makūmi ane, akūgemagwa na Shetani. Ū mu shikū jenījo atalyile shose shose; aho jashila ūtuuba.

³Ī likanza lyenīlo, ū Shetani ūng'wīla, “Ūlū ūlī Ng'wana wa ng'wa Mulungu līlagīlage ī liwe īlī lībize shilīwa.”

⁴Nang'hwe ū Yesu ūnshokeja, “Yandīkilwe gīkī, ‘Ū munhū atūdūla kūbiza mpanga kūlwa shilīwa dūhū.’”

⁵Ha numa ū Shetani ūntongeela kūlinha kwigūlya, ūūkang'oolekeja pye a mabūsugi ga mu sī ng'wikanza ido.

⁶Hūna ūng'wīla gīkī, “Nakūkwinha bebe pyī ū būdūla wenūbū nī likūjo lyamo, nguno namala kwinhwa nene, nadūgije kūng'winha ose ose ūyo nūtogwa.

⁷Na lūūlū ū bebe ūlū ūnilamya, shikūbiza shako pye.”

⁸Nang'hwe ū Yesu ūnshokeja ūng'wīla, “Gwandīkilwe gīkī, ‘Namyage Seeba Mulungu wako, na ūntūmamīle wei dūhū!’”

⁹Hūna ūntongeela kūja Yelusalemu, ūūkantūūla higūlya ya hekalu; ūng'wīla, “Ūlū ūlī Ng'wana o ng'wa Mulungu iponejage ha sī kūfuma aha!

¹⁰Nguno gwandīkilwe gīkī, ‘Akūlagīla bamalaika bakwe kūlwako, bakūlang'hane.

¹¹Na bakūkūbūūcha mu makono gabo, Ūtizipama lūpambala lwako h'iwe.’”

¹²Nang'hwe ū Yesu ūnshokeja ūng'wīla, “Gūhayiwe gīkī, ‘Yaya ū kūngema ū Seeba Mulungu wako.’”

¹³Ū Shetani aho wamala pyī ū būgemi, ūneka kakanza ho.

¹⁴Ū Yesu ūshoka ī Galilaya alī mu būdūla bo ng'wa Moyo; ū lūkumo lokwe lūsambaala pye a mapandī genayo.

¹⁵Būyūnkumīlīja pye a banhū ūlū olanga ū mu masinagogi gabo.

¹⁶Nose ūshika nī Nazaleti ūko walī wakūlīla; a ha lūshikū lo sabato wingīla ū ng'wisinagogi gīt'ūmo wītīlaga na kale, wīmīīla kūsoma.

¹⁷Hūna winhwa shitabo sha ng'hangi Isaya, ūshikundūla ūkooba ipandī aho handīkilwe gīkī,

¹⁸“Ū Moyo wa ng'wa Seeba alī hamò nū nene, nguno wanibilile maguta gīkī nabalomeele a bahabī Ng'hūlū Jawiza. Wanitūmile kūbasomboolela batungwa mhola ja kūlekejiwa kwabo, na a babboku kūbinha kūbona; kūbinha kwiyagalūla abo basheedekejiwe makoye.

¹⁹Kūlomeela ng'waka go ng'wa Seeba ūyo gūzunīlījiwe.”

²⁰Hūna ūshikundīkīja ī shitabo ūng'winhīlīja ū ntūmami; ū wei wigasha. Pye abo baalīmo ū ng'wisinagogi būnkalalīla.

²¹Nang'hwe ūbawīla, “Lelo ī shandīkwa īshi shashikīlījiwa mudegelekile.”

²²Pye būyūng'haya chiza bakwīkumyaga ī mihayo īyo yafumaga ū mu nomo gokwe; būyiwīla gīkī, “Bing'we ū ng'wenūyū atī ng'witūnja wa ng'wa Yosefu?”

²³Nang'hwe ūbawīla, “Namanile ng'wigeleelagwa na kūniwīla lūsumo lwa gīkī, ‘Bebe mfumu, angū ū zūnzū atinunaga; al'ilagūlage bebe ng'wenekīlī shi. Īyo twigwile gīkī olūyītaga Kapelanaumu, yītage nū mu nzengo gwa ng'wing'we ūmu!’”

²⁴Hūna ūbawīla, “Nalīmuwīla gwa ng'hana gīkī, atīho ng'hangi ūyo akanukūlagwa mu nzengo go ng'wawe.

²⁵Nīyo nalīmuwīla gwa ng'hana gīkī baalīho bachīlwa bingī ū mu Isiraeli ū mu shikū ja ng'wa Eliya, aho ilunde līkalugalwa myaka idatū na myeji ītandatū, yūgwa nzala nhaale hose pyī ū mu sī.

²⁶Alīyo ū Eliya atatūmilwe nūūlū kūlī ūmò wabo, ūlū ītī kūlī nchīlwa o Saleputa, mu sī ya Sidoni.

²⁷Hama nū mu shikū ja ng'hangi Elisha, baalīmo bingī a ba mbiji ū mu Isiraeli, alīyo ateejiwe nūūlū ūmò wabo, ūlū atī Naamani muna Sulia dūhū!”

²⁸Aho bīyigwa ī yenīyo, pye abo baalīmo ū ng'wisinagogi būpelana no.

²⁹Būbūūka, būmfunya hanze ya nzengo, būja nang'hwe kū lūgegu lo h'ing'ong'ho aho golī gūzengelilwe ū nzengo gwabo, gīkī bakanshindīke witaalīke ha sī.

³⁰Alīyo ū wei ūbīta ha gatī gatī yabo, ūbīngīla, ūja.

³¹Hūna ūtulumenha ajile, ūūkashika Kapelanaumu, nzengo gūmò gwaho gwa mu Galilaya; a ha sabato ūbalanga.

³²Būyūbūkumya ū būlangi bokwe, nguno ū mhayo gwakwe gwalī na būdūla.

³³Ū ng'wisinagogi ng'wenūmo walīmo na munhū wa moyo nsoso gw'isamva; wandya kūlīla n'ilaka lya higūlya alīhaya,

³⁴“Yesu wa Nazaleti, gūlīho mhayo kī a ha gatī yise nū bebe? Wizaga kūtūyagaja? Nakūmanile ūlī nani ū bebe, ūlī Ng'wela wa ng'wa Mulungu!”

³⁵Ū Yesu ūlīhama alīhaya, “Huumūlaga nīyo ūmfume!” Ī lisamva lyūngalagaja haho gatī gatī, lyūmfuma ng'hana, lyūneka lītaaminije nūūlū hado.

³⁶Pye būjinjimala, bandya kwiwīla boi benekīlī na benekīlī gīkī, “Mhayo kī nago ū gwenūyū hangī? Na a masamva alīyūgahama bo nguzu gafuma!”

³⁷Haho na haho ū lūkumo lokwe lūsambaala pye a hose ū mu mapandī ayo gaalī gabīmbīghanilwe nalyo ī lipandī lyenīlo.

³⁸Hūna ūbūūka wīnga ū ng'wisinagogi ūūkingīla mu numba ya ng'wa Simoni. Nina būkwi wa ng'wa Simoni walī mu ndīlī adadīlilwe nswiza nkalī, būng'wīla ū Yesu ī mhola jakwe.

³⁹Ūng'wegeela, wīmīīla hihī nang'hwe, ūgūhama ū nswiza gūnekela; haho na haho ūbūūka ūbabeegeja shilīwa.

⁴⁰Aho lyayūjīlīīla kūgwa ī līīmi, bandya kūng'wenhela pye abo baalī na būsaatu bo mbika na mbika. Būlī ng'wene ūyo ontūūlīlaga makono opīlaga.

⁴¹Banhū bingī gakayūbafuma masamva kūnū galīlīla gūhaya, “Ū bebe ūlī Ng'wana wa ng'wa Mulungu!” Kwike ū wei wagahamaga, wagalemeja ū kūyomba, nguno gaalī gandeebile gīkī Kilisito.

⁴²Aho wela ī dilū, ūfuma ūja hanhū iyene, a mabita ga banhū gandya kūnkooba, nose būmpandīka būnemeja atizīnga akabaleka.

⁴³Nang'hwe ūbawīla, “Shinigeleelilwe naje na kū mizengo yīngī, nū kwene nakajilomeele ī Ng'hūlū Jawiza ja būtemi bo ng'wa Mulungu; nguno natūmilwe kūlwa mhayo gwenūyū.”

⁴⁴Hūna ūja akūlomeelaga mu masinagogi ga mu sī ya Būyudaya.