Read Sukuma Bible 2015 – Bibilia Ilagano Lya Kale 2015 Luka 6 Bible Online

Luka 6 - Sukuma Bible 2015 – Bibilia Ilagano Lya Kale 2015 bible

Luka 6

¹Lūshikū lūmò lwa sabato ū Yesu wabītīlaga mu migūnda ya būsīga, a bahemba bakwe būyūbīnza mangala banuka masha na makono gabo balya ī mbeke.

²Bamò ba Bafalisayo būbawīla gīkī, “Nibūlī mukwītaga mhayo ūyo gūlī ngilo kwītwa ha sabato?”

³Alīyo ū Yesu ūbashokeja ūbawīla gīkī. “A bing'we mutaalī ū kūsoma ūyo akagwīta ū Daūdi aho walī watuuba, hamò na a babo walī nabo?

⁴Ī gīkī akingīla mu numba ya ng'wa Mulungu, ūsola migatī ya kūtūūlwa kū būtongi bo ng'wa Mulungu, wīlya ūbinha na a babo walī nabo; alīyo yalī ngilo kūlyiwa ūlū ītī na bagabīji dūhū?”

⁵Hūna ūbawīla, “Ū Ng'wana o Munhū alī Seeba wayo nī sabato.”

⁶Ha sabato yīngī hangī ū Yesu akingīla ng'wisinagogi kūlanga. Walīmo na munhū ūyo nkono gwakwe gwa būlyo gwalī gūhaamalalile.

⁷A balangi ba shilagīlo na a Bafalisayo būyūnola mu kūng'witega tega, gīkī bamone ūlū akūpīja ha sabato, bapandīke nzīla ya kūnsola būbi.

⁸Alīyo akagamana a maganiko gabo, na ūng'wīla ū munhū ūyo walī na nkono gūhaamalalile gīkī, “Bebe alibūūkaga wīmīīle a ha gatī aho.” Nang'hwe ūbūūka wīmīīla.

⁹Hūna ū Yesu ūbawīla gīkī, “Gūyū mhayo namubūje, a ha sabato īzunīlīgije kūbeeja yawiza, nūūlū kūbeeja yabūbi? Kūpīja būpanga, nūūlū kūbūlaga?”

¹⁰Hūna ūyūbalola lola pye a bose ūmo baalī bampīndīlīgije; wanoga ūng'wīla ū munhū ng'wenūyo gīkī, “Gūgoloolage ū nkono gwako.” Ng'hana wīta chene, haho na haho ū nkono gakwe gūpīla.

¹¹Alīyo a bene būpelana no, bandya kūlomana ūmo balang'wītīle ū Yesu.

¹²Ū mu shikū jenījo, līkabiza ho ikanza ilebe, ū Yesu ūja mu lūgūlū ūūkakeyula akūnombaga Mulungu.

¹³Aho wela ūbitana abo banondeelaga, ūsolanhya ikūmi na babīlī kwīngīīla mubo, ūbitana batūng'wa.

¹⁴Baalī, Simoni, ūyo akang'witana Petelo, na Andulea ng'wanong'wawe, Yakobo na Yohana, Filipo na Batolomayo;

¹⁵Matayo na Tomaso, Yakobo ng'wana Alifayo, na Simoni witanagwa Zelote.

¹⁶Na Yuda ng'wana Yakobo; hamò na Yuda Isikaliote, ūyo akabiza nodeeji.

¹⁷Hūna wika nabo ūja ha mbūga halenganīzu, ūūkīmīīla henaho hamò n'ibita itaale lya bahemba bakwe. Gibilingīla ho na mabita mataale ga banhū kūfuma hose hose ū mu Būyudaya, nī Yelusalemu; na bangī bafumaga mhandī ja kū ng'hilimva ya nyanza, mu sī ja Tulo na Sidoni.

¹⁸Bizaga kūndegeleka na kūpījiwa būsaatu wabo; na a babo bakoyiagwa masamva, bakayūpīla.

¹⁹Pye a bose bakoobaga kūnkuumya, nguno bomfumaga būdūla bo kūpīja.

²⁰Hūna ūbūūcha a miso gakwe ūbalola a bahemba bakwe, ūbawīla gīkī, “Mulī na lubango a bing'we, abo mulī bahabī, nguno ū būtemi bo ng'wa Mulungu būlī wing'we.

²¹Mulī na lubango abo mutuubile ī haha, nguno mukwigūta. Mulī na lubango abo mukūlīlaga ī haha, nguno mukūyega.

²²Mulī na lubango a bing'we ūlū bayūmukolwa a banhū na kūmukīndīka, nūūlū kūmusondagūla na kūlīsūkīlīja ī lina ling'we gīkī lyabūbi kūlwa nguno ya Ng'wana wa Munhū.

²³Ū mu lūshikū lwa kwītīlwa gīko, yegagi na musangabale; managi gīkī ī mheela ying'we īlī nhaale ū ng'wigūlū, nguno na a basaabo babīītīlaga īlī gīko a bahangi.”

²⁴“Alīyo mulī mu kwihīga, a bing'we a basabi, nguno mulī nasho ī sha kūmulūngūja.

²⁵Mulī mu kwihīga abo mulī nasho ī sha kūng'wigela ī haha, nguno mukūtuuba. Mulī mu kwihīga abo mukūsekaga ī haha, nguno mukūpīnīhala na kūlīla!

²⁶Mulī mu kwihīga, ūlū bayūmuhaya chiza pye a banhū, nguno na a basaabo babīītīlaga gīko a bahangi a balomolomo.”

²⁷“Alīyo nalīmuwīla a bing'we abo mulī bigwi, batogagwi a banishi bing'we; ng'ūbīītīla yawiza abo bamukolilwe.

²⁸Abo bakūmuzumaga ng'ūbalombela lubango, na a babo bakūmusondagūlaga ng'ūbalombela.

²⁹Ū wa kūkūpaala ipī kū lūsaya ngalūkījage nī lipandī ī līngī; nū yūyo ūkūtaaja ng'hanjo yako ūtizūnemeja nī lishati.

³⁰Būlī ng'wene ūyo ūkūlomba shikolo ng'winhage, nūūlū munhū ūsola shikolo shako ūtizūnomba akūshokeje.

³¹Ūmo mutogelilwe bayūng'wītīla a banhū, na a bing'we bīītīlagi gīko.

³²Ī gīsī mukūlūmbīlījiwa ginehe ūlū muyūgelela kūbatogwa dūhū abo bamutogilwe a bing'we? Nguno na a ba shibi nabo babatogilwe abo babatogilwe a boi dūhū!

³³Nūūlū hangī ūlū ng'ūgelela kūbīītīla yawiza abo bakang'wītīlaga yawiza dūhū a bing'we, numho mukūlūmbīlījiwa ginehe? Nguno na a ba shibi nabo bakīītaga gīko!

³⁴Nūūlū muyūgelela kūbinha a balandi abo mulī na kwisagīlwa gīkī bakūmushokeja, numho mukūlūmbīlījiwa ginehe? Īkī na a ba shibi nabo bakinhaga balī mu kwisagīlwa gīkī bakūshokejiwa kūlenganīla nū mumo būlī ū winhi wabo!

³⁵Alīyo a bing'we batogagwi a banishi bing'we, hangī ng'ūbabeegeja yawiza. Na bizagi binhi abo batī ba kwikala bisagīlagwa solobo, ū mu gīko ī linong'ho ling'we līkūbiza itaale. Hūna mukūbiza baana bakwe ūyo alī higūlya no, nguno ū wei alī na shigongo kū banhū bose; abo batalūmbaga na a babūbi.”

³⁶Bizagi na shigongo, gīt'ūmo Sīng'we alī na shigongo.

³⁷“Mutabalamulage a biching'wi, ning'we mutūlamulwa, mutasolage banhū būbi, ning'we mutūsolwa būbi; lekejagi ning'we mukūlekejiwa.

³⁸Inhagi, ning'we mukwinhwa; bakūng'winha ngelekelo yawiza, yokalile yūtindagīlwa yidīkīla na kwandīkīla. Nguno ī ngelekelo īyo mukūtūmamīlaga kūgelekela bangī, h'īyo īkūtūmamīlwa kūmugelekela na a bing'we.”

³⁹Ūbawīla hangī lūsumo gīkī, “Ū mboku wadūla kūntongeela ginehe ū mboku ng'wiye? Angū, batūgwīla ng'wichongo pyī būbīlī wabo?

⁴⁰Ū ng'hemba atūdūla kūbiza higūlya ya nangi, alīyo būlī ng'wene ūlū ūmala ū būlangwa akalenganīlaga nū nangi wakwe.

⁴¹Nibūlī ūkūnojaga ng'wiyo kasasala ka kapalala ako kalī mu liso lyakwe, alīyo ū ngamba ūyo gūlīmo ū mu liso lyako ū bebe ūtūgūlonjaga?

⁴²Ūkūdūla ginehe ū kūng'wīla ū ndūgūyo gīkī, ‘Bebe ong'wise, alilembeelaga nakwīngīje kasasala ka kapalala, kalīmo ū mu liso lyako,’ alīyo ū mu liso lyako ū bebe gūlīmo ngamba ūyo ūtūgūbonaga? Bebe ng'wibeeleja, gwīnjage tame ū ngamba ūyo gūlīmo ū mu liso lyako, hū ūdūle ū kūbona chiza, ūng'wīngīje nū ng'wiyo a kasasala ka kapalala ako kalī mu liso lyakwe!”

⁴³“Nguno gūtīho ntī gwawiza ūyo gūkatwajaga matwajo gabūbi; hangī gūtīho ntī gwabūbi ūyo gūkatwajaga matwajo gawiza.

⁴⁴Būlī ntī gūkamanīlagwa kū matwajo gago; nguno a banhū batayobaga shisuumo sha ntini kwīngīīla mu malūla; nūūlū batayobaga mizabibu kwīngīīla mu magwata!

⁴⁵Ū munhū wawiza, akafunyaga shikolo shawiza kwīnga ū mu shikolo shawiza īsho abīkile mu moyo gokwe. Nū wa malofu akafunyaga sha malofu kwīnga ū mu sha malofu īsho abīkile; nguno ū nomo go ng'wa munhū gūkahayaga kwīngīīla mu yose īyo yokalile mu moyo gokwe.”

⁴⁶“Nibūlī mukūnitanaga Seeba, Seeba, alīyo mutītaga īyo nakwīlangaga?

⁴⁷Nakūng'oolekeja ūmo alī būlī ng'wene ūyo akwizaga kūlī nene wadegeleka īyo nakwīlangaga, hūna wīshikīlīja.

⁴⁸Alī gītī nzengibo numba ūyo akandya ūsīmba tame ūshimya, hūna ūgūtūūla ū nsingi gwayo h'iwe. Na lūūlū nūūlū aho yahūmīīlwa ihūūma ī numba yenīyo, ītatinginile. Nguno yalī īzengilwe chiza.

⁴⁹Alīyo ū wa kwigwa hūna ūleka ū kwīta, ū ng'wene atikīlile na munhū ūyo akazenga numba yakwe ha sī, ūbiza atīsīmbīlile nsingi gose gose. Aho yahūmīīlwa na mihūūmo ya minzī, yūgwa haho na haho; a kagwīle kayo ī numba yenīyo kakabiza kabūbi no!”