Read Sukuma Bible 2015 – Bibilia Ilagano Lya Kale 2015 Luka 8 Bible Online

Luka 8 - Sukuma Bible 2015 – Bibilia Ilagano Lya Kale 2015 bible

Luka 8

¹Ha numa ya henaho, ū Yesu ūja akūlomeelaga Ng'hūlū ja būtemi bo ng'wa Mulungu hose pye ū mu mizengo ī mitaale nī mido. Na a bahemba bakwe abo ikūmi na babīlī walī hamò nabo.

²Baalīmo na bakīma balebe, bangī baalī bīngījiwa masamva na bangī būpījiwa būsaatu; ūmò wa bakīma benabo walī Malia ūyo witanagwa Magadalena, ū ng'wene gaalī gang'wīnga masamva mpungatī.

³Ūngī walī Yoana nke wa ng'wa Kūza, ūyo walī nang'hani wa sabo ja ng'wa Helode. Walīmo na Susana, na bangī bingī dūhū, abo babagunanhaga kūfuma mu sabo jabo benekīlī.

⁴Hūna ibita itaale libilinga, banhū bingī kūfuma mu būlī nzengo būng'wikuunūkīla ū Yesu. Wandya kūbalomeela bo kūtūmamīla shigemeng'hejo; ūhaya gīkī,

⁵“Mībi akaja kūbība mbīyū jakwe. Aho alībība jingī jūgwīla mu nzīla, jūpandagīlwa na kūlyiwa na noni ja kūlala.

⁶Jingī jūgwīla mu sī ya mawe mawe; aho jazwa jūcha nguno jikagayiwa ū būdoto.

⁷Jingī jūgwīla mu ming'hwa, a ming'hwa gūkūlanīja najo gūjishiteleja.

⁸Alīyo jimò jikagwīla mu sī yawiza, jūkūla jūtwaja mbeke igana igana.” Aho wamala ū kūhaya ī mihayo yenīyī ūbakomeleja; ūhaya gīkī, “Ūyo alī na matū gakigwaga ni igwage.”

⁹A bahemba bakwe būmūja a makūlū ga shigemeng'hejo shenīsho.

¹⁰Nang'hwe ūbawīla gīkī, “A bing'we ng'winhilwe būmani, mujimane ī mbisīla ja būtemi bo ng'wa Mulungu, alīyo ū kū bangī shilī shigemeng'hejo dūhū; ībize gīkī, ‘Ū kūlola balole, alīyo batizūbona; nū kwigwa bigwe, alīyo batizitegeleja.’”

¹¹“Hūna lūūlū, a makūlū ga shigemeng'hejo shenīshi galī gīkī, ī mbīyū gūlī mhayo go ng'wa Mulungu.

¹²Alīyo ījo jilī mu nzīla, balī abo bakagwigwaga ū mhayo; kwike ū Ng'wanishi wiza wagūpula ū mhayo wagwīnja ū mung'holò jabo, batizūzunya bakapījiwa.

¹³Lelo ījo jilī mu sī ya mawe mawe, a bene balī abo bakagwigwaga ū mhayo bagwanukūla mu būyegi, kwike gwabiza gūtī na miji. Balī ba kūzunya kwa kakanza dūhū, alīyo ū mu makanza ga kūgeng'wa bakashokaga kū numa.

¹⁴Hama ījo jigwīlile mu sī ya ming'hwa, a bene balī abo bakagwigwaga ū mhayo; kwike ū mu shimīzīle yabo bakashitelejiagwa na myatīla ya mu sī, hamò na būsabi wamo na kūdoosela būpanga, nose bakalemeelagwa nūūlū kūtwaja matwajo mashikanu.

¹⁵Alīyo ījo jilī mu sī yawiza, a bene h'abo bakagwigwaga ū mhayo mung'holò yawiza na ya logohano, bagūdima; bayūtwaja matwajo mu wiyūmīlīja.”

¹⁶“Hūna lūūlū managi gīkī atīho ūyo akabachaga tala wīkundīkīja itangwa, nūūlū wībisa ng'wizungu lya būlīīlī. Ī tala īkabachiagwa yatūūlwa h'ikīndīkīlo lyayo, gīkī pye abo bakwingīlaga ū mu kaya bayūlībona ī lisana lyayo.

¹⁷Nguno gūtīho mhayo gwibisile nūūlū gūmò, ūyo gūtalafunījiwa ha ng'wape! Na hangī ītīho mbisīla īyo ītalitenda īkamanwa.

¹⁸Hū kūhaya ilang'hanagi ūmo mukūdegelekelaga; nguno būlī ng'wene ūyo alī na shikolo akwinhwa, lelo ūyo atī na shikolo, akūtaajiwa nī shisho akwiganikaga gīkī alī nasho.”

¹⁹Hūna ū nina wiza hamò na a baana ba ng'wawe ū Yesu, baalī batogilwe kūshika aho walī, alīyo būlemeelwa kūlwa nguno y'ibita lya banhū.

²⁰Ūwīlwa gīkī, “Ū noko alī hanze wīmīīlaga na a bazunayo; balītogwa kūkūbona.”

²¹Alīyo ū wei ūbashokeja ūbawīla gīkī, “Ū nene ū mayū na a bazuna bane, balī abo bakagwigwaga ū mhayo go ng'wa Mulungu bagwīta.”

²²Lūshikū lūngī ū Yesu akingīla mu lyato hamò nabo a bahemba bakwe; ūbawīla gīkī, “Tūjagi kū nkīlo gwa nyanza;” na ng'hana būbuga bajile.

²³Aho balīja, ū Yesu ūlaala tūlo. Kūhayimanīla gwabūūka nyaga ntaale bataalī ū mu nyanza. Ī lyato lyūyūdaha minzī, bibona babiza mu nhabaala ya kūyagala.

²⁴Būmisha balīhaya gīkī, “Seeba Seeba, twashila!” Aho wamisha, ūgūhama ū nyaga na a mahuuli ga minzī, shūlembeela, hūbiza sele sele.

²⁵Hūna ūbawīla, “A bing'we ni kūlī halī ū kūzunya kwing'we?” Bakogoha no, būyūkumya dūhū ū kūnū baliwīla gīkī, “Ū munhū ng'wenūyū ī gete ni nani o kūyūhama na miyaga, būyaga na minzī pye shayūng'wigwa!”

²⁶Hūna būbuga bajile, būūkashika kū sī ya Bagelasi, yalī yilolile nī Galilaya.

²⁷Aho wika ha sī nyūmu ūshimīza ajile, munhū nebe walī na masamva ūmanhya nang'hwe afumile kū nzengo. Ū munhū ng'wenūyo walī dūūhū, na walī wakwīja ī shikū atikalaga mu kaya, wikalaga kū mashigila.

²⁸Aho wamona ū Yesu ūlīla n'ilaka itaale; ūgwa kū būtongi bokwe kūnū alīhaya gīkī, “Bebe Yesu Ng'wana wa ng'wa Mulungu ūyo alī higūlya no, ūlī na mhayo kī nū nene? Nalīkwikūmbīlīja ūtizūniluhya!”

²⁹Akahaya gīko nguno ū Yesu akalīlagīla ī lisamva līmfume ū munhū ng'wenūyo. Wikalaga abohiwe minyololo na nhendele, alīyo ng'hangala ningī ī lisamva lyandimaga wagatīnagūla a mabohejo, lyampeeja kūja kū matogolo.

³⁰Ū Yesu ūmūja ū munhū ng'wenūyo gīkī, “Ī lina lyako ūlī nani?” Nang'hwe ūshosha, “Nalī Mabita,” nguno a masamva ayo gaalī gang'wingīlīīla gaalī mingī.

³¹Hūna gūndayīīla gīkī atizūgalagīla gaje ng'wishimayenze.

³²Līkasangwa lyalīho idale lya ngulubī ningī jadīīmaga mu lūgūlū, gūndayīīla gīkī agazunīlīje gaje gakingīle mu jene; ūgazunīlīja.

³³A masamva aho gīnga ū mulī munhū ng'wenūyo, gūkingīla ū mu ngulubī jenījo; ī lidale ī lyose liyita nhambo kūjīlīīla kū lūgegu lo nyanza, jūkagwīla mu minzī, jūng'wa nhuli, jūcha!

³⁴A badīīmi bajo aho babona yabiza gīko, būpeela nhambo, būja būūkagūkumūcha ū mhayo gwenūyo mu nzengo, nū kū magūngūli.

³⁵Banhū būfuma kūja kūgūlola ūyo gūkilonga, aho bashika a halī Yesu būnsanga ū munhū ūyo gakamfuma masamva igashije hihī na mhambala ja ng'wa Yesu azwalile shizwalo, nīyo alī na masala madeekanu. Bakogoha no!

³⁶Hūna a bambona būbasomboolela ūmo akapīgījiwa ūyo walī na masamva.

³⁷Pye a banhū ba mu sī ya Gelasi būng'wikūmbīlīja ū Yesu abīngīle, nguno bakagwīlwa booba būtaale no; ng'hana wingīla mu lyato ūshoka.

³⁸Ū munhū ūyo akīngījiwa masamva ūng'wikūmbīlīja gīkī nū ng'wene adimane nang'hwe. Alīyo ū Yesu ūnaga aje; ūng'wīla gīkī,

³⁹“Shokaga kaya ūkabawīle īyo Mulungu wakwītīlaga.” Ng'hana ūja hose pye ū mu nzengo gwenūyo, akwīkumūchaga īyo akīītīlwa na Yesu.

⁴⁰Hūna ū Yesu aho washoka, ibita lya banhū lyūnsūng'wanha, nguno pye baalī banindīīla.

⁴¹Kūhayimanīla wiza ngosha ūmò, ntaale w'isinagogi; lina lyakwe Yailo. Aho washika ūngwīla mu magūlū ū Yesu, ūng'wikūmbīlīja ashike ha ng'wakwe.

⁴²Nguno nshīke wakwe, ng'wanikī wa myaka gītī ikūmi n'ībīlī, walī nsaatu no; nīyo hihī na kūcha. Hama walī nang'hwe ūmò ng'wenūyo dūhū. Ū Yesu aho wabūūka ajile, na mabita ga banhū gūnondeela, gūja gang'wishitelegije.

⁴³Walīho nkīma nebe wakoyiagwa būsaatu bo ngeji, nose ūmala myaka ikūmi n'ībīlī; alīyo walī atīho nūūlū ūmò wa kūdūla kūmpīja.[3]

⁴⁴Ū nkīma ng'wenūyo ūng'wizīīla ū Yesu kū numa, ūshika ūnkuumya kwipīndo lya ng'hanjo yakwe; haho na haho a mininga gakwe goya ū kūzwa.

⁴⁵Ū Yesu ūbūja, “Nani wanikuumya?” Aho bahuumūla pye a banhū, ū Petelo ūhaya, “Seeba a banhū balīkūkuumya nguno bakwishitelejaga!”

⁴⁶Alīyo ū Yesu ūhaya, “Munhū nebe wanikuumya, nguno niyigwa nguzu janīnga.”

⁴⁷Ū nkīma ng'wenūyo aho wabona gīkī atūdūla ū kwibisa, wiza a halī Yesu alīdetema, ūshika ūntugīja mazwi ūnsomboolela hape hape kū būtongi wa banhū bose, ī nguno īyo īkang'wenheleja kūnkuumya, nū mumo akapīlīla haho na haho.

⁴⁸Nang'hwe ū Yesu ūng'wīla, “Nshīke wane, ū kūzunya kwako kwakūpījaga; jaga mu mhola.”

⁴⁹Aho ataalī ūyomba nabo gīko, kūhayimanīla wiza munhū afumile ū kū ng'wa ntaale w'isinagogi; ūshikīla kūhaya gīkī, “Ū nshīke wako wazumalīka, nose ītīho nguno ya kūnkoya ū Nangi!”

⁵⁰Alīyo ū Yesu aho wigwa ūng'wīla gīkī “Ūtogohage bebe ng'wene sanyaga, akūpīla dūhū.”

⁵¹Aho washika a ha kaya, atanzunīlīgije ose ose ū kwingīla, ūlū atī Petelo na Yohana na Yakobo; hamò na ise nū nina wa ng'wanikī.

⁵²Pye a banhū balīlaga, balīnīla ū ng'wanikī! ū Yesu ūbawīla gīkī, “Mutalīlage nguno atachile, alaalile dūhū.”

⁵³Būnseka nyachilū chilū kūlwa kūndalaha, nguno baalī bamanile gīkī ū ng'wanikī walī wamala kūcha.

⁵⁴Alīyo ū wei ūndima nkono; hūna witana alīhaya, “Ng'wanikī būūkaga!”

⁵⁵Ū moyo gokwe gūnshokela, ūbūūka haho na haho. Ū Seeba ūbalagīla bang'winhe shilīwa.

⁵⁶A babyaji bakwe bakakumya no; alīyo ū wei ūbalemeja batizūng'wīla munhū nūūlū ūmò ūyo gūkilonga.