Read Sukuma Bible 2015 – Bibilia Ilagano Lya Kale 2015 Kūshokeela 11 Bible Online

Kūshokeela 11 - Sukuma Bible 2015 – Bibilia Ilagano Lya Kale 2015 bible

Kūshokeela 11

¹Na lūūlū shikwigelile kūntogwa ū SEEBA Mulungu wako shikū jose; na kwīdima pyī īyo ayīlagīlile, na a malange gakwe, nī shilagīlo shakwe.

²Ideedeng'hanyagi chiza ī lelo nguno natūlūngalūngaga na bana bing'we, a boi batībonile, nūūlū ītītilwe mu shikū jabo ī milīmo ya ng'wa SEEBA Mulungu wing'we, īyo wītūmamīlaga mu kahūgūlīle[7] kakwe; nī likūjo lyakwe batalībonile, nū būdūla wa nkono gwakwe, nūūlū ūmo akagūgoloolela ū nkono gwakwe batabonile.

³Batashibonile nī shimanīkījo īsho washibeejaga mu sī ya Misili kū būtongi bo ng'wa Falao, ū ntemi wa Misili, nū mu sī yakwe ī yose.

⁴A benabo batabonile nūūlū ūmo akalyītīla ū SEEBA ī libità lya bashilikale ba Bamisili nī falasa jabo, na a magogoteni gabo, ū ng'wikanza īlo baamukūūbījaga; aho akabalibīja mu minzī ga Nyanza Yaza, pyī būshila fu, ūbayagaja ilalī.

⁵A bana bing'we batayībonile īyo wang'wītīla ū ng'witogolo kūshisha ng'ūshika a hipandī lyenīlī mulī ī haha.

⁶Batīībonile nī yīyo akabīītīla ba Dasani na Abilamu, a bitūnja ba ng'wa Eliabu wa lūganda lwa Lubeni; aho sī īkalugūka ha gatī gatī ya Baisilaeli, yūbamila a banhū benabo nī kaya jabo, na a maheema gabo, nī shikolo shabo shose ī shipanga īsho baalī nasho.

⁷Miso ging'we benekīlī ayo gayībona ī mihayo ī mitaale yenīyī, īyo SEEBA wayīta.

⁸Na lūūlū shidimagi ī shilagīlo ī shose īsho nalīng'winha lelo, hū mukūbiza na nguzu ja kwīdima ībize ying'we ī sī īyo mulīkīla mongo gwa Yolodani kūja kwīsola.

⁹Ū mu gīko hū mukūbiza na būlamu būlīhu ū mu sī īyo SEEBA wabilahīlīla bakūlūgenji bing'we nī shibyalīlwe shabo gīkī, akūbinha ī sī ya būhondo.

¹⁰Ī sī īyo mulīkīla kūja kwīsola yenīyo ītabizile gīt'ūmo īlī sī ya Misili ūko mulīfuma, ūko ng'wajihambaga ī mbīyū jing'we hū ng'walinhya kūshaadūūka lwa magūlū mukūjitīīlaga minzī gītī shisasīla[8] sha makūbī.

¹¹Alīyo ī sī īyo mulīkīla mongo gwa Yolodani kūja kwīsola, ī yene īpīndiwe ngūlū, hama īlī na malago gawiza no; nīyo īkang'waga minzī ga mbula kwīnga kwigūlū.

¹²Ū SEEBA Mulungu wako īdīlīlile no ī sī yenīyo; a miso ga ng'wa SEEBA Mulungu wako galolelile ho pye a makanza, kūfuma wandījo wa ng'waka kūshisha kū būkalīkījo wago.

¹³Na lūūlū ūlū ng'ūbiza bigwi na bakalalwa ū kūshishikīlīja ī shilagīlo īsho nalīng'winha lelo īyī, kūntogwa ū SEEBA Mulungu wing'we, na kūntūmamīla we na ng'holò yose na būpanga bose,

¹⁴a henaho hū nakūmutūmīla mbula ū mu sī ying'we ng'wikanza lyayo; ī mbula ya wandījo wa shidikū nī ya kū būkalīkījo wa ng'waka, ūdūle kūyūpandīka chiza ī shilīwa nī divai, na a maguta.

¹⁵Nū mu madīīmīlo gako nakūkūzwisīja maswa ga kūyūlya ī mitugo jako jigeja; nū bebe ng'wenekīlī ūkūyūlya ī shilīwa wigūta.

¹⁶Ilang'hanagi gete, ī ng'holò jing'we jitizūhūmbūūlwa mugalūke ng'wandye kūlamya bamulungu bangī, na kūbinamīla.

¹⁷Ūlū ng'wīta gīko ū būpelanu bo ng'wa SEEBA būkūmupembekela alīlugale ī ligūlū yooye ū kūtūla ī mbula, nī sī yooye ū kūtwaja a matwajo gayo. Ū mu gīko mutūdīla ū kūyagaala na kūshila ū mu sī yawiza īyo SEEBA alīng'winha.

¹⁸Ī mihayo yane yenīyī īdimagi na būkalalwa ū mu ng'holò nū mu maganiko ging'we; ng'wītunge ū kū nkono nū kū būshū wing'we, ībize būmanīkījo.

¹⁹Muyūbalanga mu welwa ng'holò a bana bing'we; ūlū ng'wigashaga mu kaya ng'wīhooyela, nūūlū mukūyeelaga mu nzīla, nūūlū mulaalile; nūūlū ng'wikanza lya kūbūūka.

²⁰Ūyandīke a ha nyango na a ha mita gwako,

²¹Ī shikū jing'we nī shikū ja bana bing'we ī ja kwikala ū mu sī īyo SEEBA Mulungu wing'we walahīla kūbinha bakūlūgenji bing'we, jongejiwe ū ng'wikanza ī lyose aho sī ītaalī ha sīlīlī y'igūlū.

²²Nguno ūlū ng'wilang'hana, ng'ūshidima chiza pyī ī shilagalo īsho nalīng'winha, ng'ūntogwa ū SEEBA Mulungu wing'we, ng'ūshimīzīla ū mu nzīla jakwe ī jose, na kūdimana nang'hwe mu welwa ng'holò;

²³a henaho lūūlū nang'hwe ū SEEBA akūgapeeja pye a mahanga genaya gang'wīngīle. Mukūbiza na būdūla wa kūgataaja ī sī a mahanga genayo nūūlū īkī a goi mataale na galī na nguzu kūmutinda a bing'we.

²⁴Būlī hene aho mukūpanda na mhambala ja magūlū ging'we, ī lipandī lyenīlo līkūbiza ling'we; kwandīja ū kwitogolo īlo lītī na banhū kūshisha Lebanoni, na kūfuma kū mongo gwa Flati kūshisha kū nyanza ya ng'weli.

²⁵Atīho munhū wa kūdūla kwilwisha ning'we; ū SEEBA Mulungu wing'we akūtūūla lyogohya ling'we n'idetemya hose pyī ū mu sī būlī kwene ūko mulaaje.

²⁶Managi gīkī, ī lelo nalītūūla ū kū būtongi wing'we n'izumo kūlwa nguno ying'we.

²⁷Ī jilī mu kūzunya kwing'we ū kūshidima ī shilagīlo sha ng'wa SEEBA Mulungu wing'we, īsho nalīng'winha lelo īyī.

²⁸Alīyo izumo ūlū ng'ūlema ū kūshidima ī shilagīlo sha ng'wa SEEBA Mulungu wing'we, ūlū ng'ūgalūka ng'wīleka ī nzīla īyo nalīmulanga lelo, ng'wandya kūlondeela bamulungu bangī abo mutabamanile kwīngīīla ikanza lyose lyose.

²⁹Na lūūlū ū SEEBA Mulungu wako ūlū ūkūshisha ū mu sī īyo ūlīja kwīdima ībize yako, ī ūkūjitūūla kū lūgūlū lwa Gelizimu; alīyo ī lizumo ī lyene kū lūgūlū lwa Ebali.

³⁰Ī ngūlū jenījo jilī kū nkīlo gwa mongo gwa Yolodani, kūūko n'ikūūwa īlo līlī kū lwande lwa ng'weli kū būgwa līīmi; mu sī ya Bakanani abo bakikalaga bbihī na mitī mitaale ya Moole, ng'witogolo lya Alaba kūūko na Giligali.

³¹Na lūūlū, ī haha yenīyī mulī hihī kūgūkīla ū mongo gwa Yolodani, muje kwīdima ī sī īyo SEEBA Mulungu wing'we alīng'winha ībize ying'we. Ūlū ng'wīsola na kwandya kwikala mo,

³²ilang'hanagi gete mugadime pye a malange, nī shilagīlo īsho nalīng'winha lelo yenīyī.