Read Sukuma Bible 2015 – Bibilia Ilagano Lya Kale 2015 Kūshokeela 12 Bible Online

Kūshokeela 12 - Sukuma Bible 2015 – Bibilia Ilagano Lya Kale 2015 bible

Kūshokeela 12

¹A malange aya nī shilagīlo īshi, shidimagi mu welwa ng'holò; mushishikīlīje pyī ū mu shikū ja būlamu wing'we, ū ng'wikanza lya kwikala kwing'we ū mu sī īyo alīng'winha ū SEEBA Mulungu wa bakūlūgenji bing'we.

²Shiigelile mugakenaagūle pye gete a mapandī ga kūlamīja, ayo banhū ba mahanga abo mulīja kūbataaja sī yabo bakagatūmamīlaga kūbalamya bamulungu babo. A mapandī genayo galī mu ngūlū na mu sī ja magūlya, gangī galī mu mbeho ja mitī mitaale ya madūūtū madoto.

³Ī myalīlo yabo īsambaagūlagi gete, hama balī na mawe bakagalamyaga; nago gabelagūlagi. Na ng'hīngī ja Maashela balī najo, nī jene jipembagi mu moto, na a mashiikolile ga bamulungu babo gakambagūlagi, mugakenaagūle gete a mina gabo gīnge ū mu mapandī genayo.

⁴A bing'we yaya ū kūnamya gīko ū SEEBA Mulungu wing'we.

⁵Alīyo mukūlīkooba ī lipandī īlo SEEBA Mulungu wing'we alalīsole kūfuma ū mu ng'anda jing'we ī jose, kūbiza wikalo wakwe na kūtūūla ho lina lakwe. Ū kwipandī lyenīlo h'ūko mukūyūja;

⁶h'ūko mukūyūtwala nī shakwinha shing'we sha kūpemva mu moto, pyī nī shitambò shing'we. Nī zaka jing'we enhagi kwenūko, nī shakwinha shing'we īsho mushitūūlile kūlwa kūmfunīja SEEBA, nī shakwinha shing'we sha kūlahīla, nī sha wiyaabī, pye na a matwajo ging'we ga kwandya; nī shakwinha sha kūfuma mu madaale ging'we ga ng'ombe na ga ng'holo na mbūli.

⁷Ū kwipandī lyenīlo h'ūko mukūyūlya na kūyega kū būtongi bo ng'wa SEEBA Mulungu wing'we, a bing'we nī kaya jing'we. Shiyegelagi pyī īsho SEEBA Mulungu wing'we akūng'wīlūkīla kūshīta.

⁸Yaya ū kwīta gīt'ūmo tūkwītīlaga kūūnū ī lelo, ūmo būlī ng'wene akwītīlaga gīt'ūmo atogelilwe wei ng'wenekīlī.

⁹Nguno mutaalī ū kūshika ū kwipandī ī lya kwifuula na lya wingīji wing'we, īlo SEEBA Mulungu wing'we alīng'winha.

¹⁰Alīyo ūlū mulagūkīle ū mongo gwa Yolodani muje mukikale ū mu sī īyo SEEBA Mulungu wing'we alīng'winha kūbiza wingīji wing'we; akūng'wifuuja ū kū mahanga a gose ayo gakūbiza gamupīndije, galeke ū kūmukoya ng'wikale mu mhola.

¹¹Na lūūlū ū kwipandī īlo SEEBA Mulungu wing'we akūlīsola kūlwa kwikala lina lyakwe, ū kwenūko h'ūko mukūyūshenha pyī ī shikolo īsho nalīmukomeleja; ī shakwinha shing'we sha kūpemva mu moto, nī shitambò shing'we; nī zaka jing'we, nī shakwinha shing'we īsho mushitūūlile kūlwa kūmfunīja SEEBA, nī shingī pyī ī shawiza īsho mukūyūlahīla kūmfunīja we.

¹²Na lūūlū ū kwipandī lyenīlo h'ūko mukūnyegela ū SEEBA Mulungu wing'we; a bing'we na a bitūnja bing'we na abashīke bing'we, na a basese bing'we bagosha na bakīma, hamò na a Balawī abo balī ū mu mizengo ying'we, abo batī na ngabo nūūlū wingīji wabo boi benekīlī.

¹³Ilang'hanage ūtizūfunya shitambò shako sha kūpemva mu moto kwipandī lyose lyose īlo bebe ng'wenekīlī ūtogwa.

¹⁴Ī shitambò shako shifunyage ū kwipandī īlo SEEBA Mulungu wako alakūsolele kūfuma ū mu lūganda lwa ng'wing'we; h'ūko ūkwīyītīla pyī īyo nalīkūlagīla.

¹⁵Kwike a hene ūdūgije kūgūsīnzīla ū ntugo gwako nūūlū ūlī aho ūzengile, ūlya ī nyama gīt'ūmo ūtogelilwe; ūmo mukalīīlaga sūbūya nūūlū mhala, gīt'ūmo SEEBA Mulungu wako alakwīlūkīle mbango. Pye a banhū, a beela na a babo batī beela, bazunīlījiwe ū kwīlya ī nyama yenīyo.

¹⁶Alīyo a mininga a gene yaya gete ū kūgalya; shiigelile ūgiite hasī gītī minzī.

¹⁷Ī zaka ya shakwinha shako sha būsu nī ya divai, nī ya maguta, yaya ū kwīlīīla ū mu nzengo ūyo ūkwikalaga; pyī nī mbyalwa ja kwandya ja mu madaale gako ga ng'ombe na ga ng'holo na mbūli. Nūūlū shose shose īsho wilahīla kūshifunya kūbiza shakwinha, nī shakwinha sha wiyaabī, nūūlū īsho mushitūūlile kūlwa kūmfunīja SEEBA, nūūlū shakwinha shingī īsho mulīshifunya kūlwa nguno ya ng'wa SEEBA.

¹⁸Ī shose shenīshi ūkūshilya ūlī kū būtongi bo ng'wa SEEBA Mulungu wako, kwipandī īlo alalīsole ū SEEBA Mulungu wako. Ūkūshilya ū bebe nū ng'witūnja wako nū nshīke wako, nū nsese wako ngosha na nkīma, hamò na a Balawī abo balī ū mu mizengo ying'we. Ūkūyega kū būtongi bo ng'wa SEEBA Mulungu wako, ūshilūmbe pyī īsho akūkwīlūkīlaga kūshīta.

¹⁹Ilang'hanage ūtizūbīība a Balawī ū mu būlamu wako ū bose ū mu sī yako.

²⁰Ū SEEBA Mulungu wako ūlū wīgalīhya ī sī yako gīt'ūmo wakwisagīgīja, hūna ū bebe wandya kwikūmva nyama ūhaya, “Nakūmbūlaga kūlya nyama;” ūdūgije kūlya ī nyama gīt'ūmo ūtogelilwe.

²¹Ī lipandī īlo SEEBA Mulungu wako akūlīsola kūlwa kūtūūla mo lina lyakwe ūlū lyūbiza līlīkūle ū kūfuma a ha ng'wako, ūdūgije kūsīnza ntugo gwa ng'widaale lyako lya ng'ombe nūūlū lya ng'holo na mbūli, ūmo SEEBA alakwinhīle; hūna wīta ūmo nalīkūlagīīlīla, ī nyama wīlīīla mu nzengo gwako gīt'ūmo ūlatogelwe bebe ng'wenekīlī.

²²Lyaga gīt'ūmo ūkalīīlaga sūbūya nūūlū mhala; nīyo pye a banhū, a beela na a babo batī beela, bazunīlījiwe ū kwīlya ī nyama yenīyo.

²³Kwike ilang'hanage, yaya ū kūgalya a mininga gayo; nguno a mininga hū ū būpanga, na lūūlū ilang'hanage ūtizūbūlīīlanīja mu nyama ū būpanga.

²⁴Yaya ū kūgalya a mininga nūūlū hado, gitage hasī gītī minzī.

²⁵Ūtizūgima gete ū kūgalya, ī mihayo īkūjīle chiza ū bebe ng'wenekīlī na a baana bako a hanuma yako; nguno ū mu gīko ūkūbiza ūlīīta ītūngīlīgije ū kū būtongi bo ng'wa SEEBA.

²⁶Alīyo ī shikolo shako ī sheela, nī shisho walahīla gīkī ūkūshifunya shibize shakwinha, ī shenīsho shisolage ūje nasho ū kwipandī īlo SEEBA alalīsole.

²⁷Ī shakwinha shako sha kūpemva mu moto shifunyage ha ng'walīlo go ng'wa SEEBA Mulungu wako; ī nyama ī yose na a mininga. A mininga ga shitambò shako shiigelile giitwe hasī haho nū ng'walīlo go ng'wa SEEBA Mulungu wako, ī nyama ī yene ūdūgije kwīlya.

²⁸Na lūūlū ilang'hanage wīshikīlīje pyī īyo nalīkūlagīla yenīyī, īje chiza ī mihayo yako būl'ikanza; ū bebe na a baana bako abo bakūbyalwa hanuma yako. Nguno ūlū wīta gīko ūkūbiza ūlīīta ītūngīlīgije ū kū būtongi bo ng'wa SEEBA Mulungu wako.

²⁹Ū SEEBA Mulungu wako akūgakenaagūla a mahanga gakwīngīle, ayo sī yago ūlīja kwīdima ībize yako. Alīyo ū bebe ūlū ūmala ū kūgapeeja a mahanga genayo, hūna ūkwikala ū mu sī yabo.

³⁰Hama a banhū benabo ūlū būshila, ilang'hanage lūūlū ū bebe, ūtizūgwa mu nhūngwa ja kūbūūgīlīja mihayo ya bamulungu babo, ūkūhayaga; “Ī gete a banhū ba mahanga genaya baabatūmamīlaga kinehe a bamulungu babo? Nane nageme wa!”

³¹Yaya ū bebe ū kūnamya gīko ū SEEBA Mulungu wako; nguno a boi ū mu kūbalamya a bamulungu babo, bakīītaga mihayo ya malofu ya būlī mbika, īyo ayīkolilwe ū SEEBA; bakabapembaga na mu moto bitūnja na bashīke babo, kūlwa kūbafunya shitambò kū bamulungu babo.

³²Na lūūlū, yītage pyī īyo nalīkūlagīla; yaya ū kongeleleja ho, nūūlū kwīnja ho shose shose yaya.