Read Sukuma Bible 2015 – Bibilia Ilagano Lya Kale 2015 Kūshokeela 14 Bible Online

Kūshokeela 14 - Sukuma Bible 2015 – Bibilia Ilagano Lya Kale 2015 bible

Kūshokeela 14

¹A bing'we mulī baana ba ng'wa SEEBA Mulungu wing'we; yaya ū kūteng'wa salago kūlwa nguno ya bafu, yaya nūūlū kwimooga makumbīīso;[9] nūūlū kwiyīngīja ngohe jing'we kūlwa mhayo gwenūyo.

²Nguno ū bebe ūl'ihanga lya banhū beela kūlī SEEBA Mulungu wako. Ū kūfuma ū mu banhū bose abo balī mu sī, ū SEEBA wakūsola ū bebe gīkī ūbize ihanga lya banhū bakwe ba wikomangīle.

³Na lūūlū yaya ū kūlya shose shose ī sha malofu.

⁴Ī ndimu īji hū jene mudūgije ū kūjilya, ng'ombe, ng'holo, mbūli,

⁵saala, laala, nja, sūbūya, mboku, mhala na ngūlūgūlū;

⁶nī ndimu ī jingī ī ja chūūga shigabanhīkile shūlekana habīlī, ījo jikashoshaga būdīīma.

⁷Gwike ū mu ndimu ījo jikashoshaga būdīīma, nī ja chūūga shigabanhīkile shūlekana, īji yaya ū kūjilya, ī ngamīla nī sayayi nī mhīmbī. Nguno ī jenījo nūūlū īkī jikashoshaga būdīīma, alīyo jitī na chūūga shigabanhīkile; ū kū bing'we jilī ja malofu.

⁸Nī ngulubī nayo ya malofu nguno nūūlū īkī īlī na chūūga shigabanhīkile, alīyo ītashoshaga būdīīma. Yaya ū kwīlya ī nyama yayo, nūūlū ūkūgūkuumya ū mimba gwayo.

⁹Ū mu shiseng'wa pyī ī sha mu minzī, mudūgije kūlya ī ja masandà[10] na magambala.

¹⁰Alīyo pyī īsho shitī na masandà na magambala, yaya ū kūshilya ī shenīsho; shilī sha malofu ū kū bing'we.

¹¹Mudūgije kūlya ī noni jose ī neela.

¹²Alīyo īji yaya ū kūjilya; ng'hoonà, mbeeshi, nanda,

¹³kasunguseelya, nke o būshū, lūbala,

¹⁴mbika jose ja ng'hūngūūlū,

¹⁵ging'hi ya mapembe, ging'hi ya kūhiimīla, nzubi, fungwe,

¹⁶ging'hi ndo, ging'hi nhaale, nzooyo,

¹⁷lūbundaaji, ng'hūyūgū, choogihīnga,

¹⁸ng'ong'ooli, shimila nzoka, guleegule na tūnge.

¹⁹Pyī ī shiinū ī ndo do do ījo jilī na manana, alīyo jikashimīzīlaga magūlū, jilī ja malofu ū kū bing'we; yaya ū kūjilya.

²⁰Alīyo pyī ī ja manana ījo jilī neela mudūgije ū kūjilya.

²¹Yaya ū kūlya ī shikolo sha kūcha shoi dūhū; ūdūgije kūng'winha ngeni ose ose ūyo akwikalaga ū mu mizengo ying'we; ū ng'wenūyo adūgije ū kūlya, nūūlū ūdūgije kūnjingīja nobeji; alīyo ū bebe yaya, nguno ūl'ihanga lya banhū beela kūlī SEEBA Mulungu wako. Yaya ū kūzuga ng'wana wa mbūli mu mabeelè ga ng'wa nina.

²²Mukūyūfunya zaka ya shose īsho mukūpandīka kūfuma mu malaale ging'we būlī ng'waka.

²³Ī zaka ja shilīwa shako nī divai yako, na a maguta, nī mbyalwa ja kwandya ja mu madaale gako ga ng'ombe na ga ng'holo na mbūli, ūkūlīīla kū būtongi bo ng'wa SEEBA Mulungu wako ū kwipandī īlo alalīsole kūlwa kūtūūla ho lina lyakwe, wilange kūnkūja ū SEEBA Mulungu wako būl'ikanza.

²⁴Kwike ī lipandī lyenīlo ūlū līlī kūle no, nose ūtūdūla kwībūūcha ī zaka yako (nguno ī lipandī īlo SEEBA Mulungu wako walīsola kūtūūla lina lyakwe līlī kūle ū kūfuma ū kū ng'wako), alīyo ū SEEBA Mulungu wako ūbiza wakwīlūkīlile mbango,

²⁵ūlū gūlīchene īkaabanyage ī zaka yako ūpandīke hela, hūna ūjibūūche ī hela ūje najo ū kwipandī īlo SEEBA Mulungu wako walīsola.

²⁶Ī hela jenījo ūkūjitūmamīla kūgūla shikolo shose shose īsho ūlatogwe, ng'ombe, ng'holo, divai nūūlū sha kūng'wa shingī shose shose, nūūlū shikolo shingī īsho wikūmva. Na lūūlū ū bebe nī kaya yako mukūlya kwenūko kū būtongi bo ng'wa SEEBA Mulungu wako muyege na kūlūmba.

²⁷Ilang'hanage ūtizūng'wība nū Nawī ūyo akwikalaga mu mizengo yako, nguno ū wei atī na ngabo nūūlū atī na wingīji hamò nag'ho.

²⁸Būlī ng'waka gwa kadatū ūlū gūūshika kū būkalīkījo wago, ī zaka ya shikolo ī shose īsho mukūpandīka ū mu ng'waka gwenūyo yenhagi mu nzengo gwing'we ng'wize ng'wībīke ng'wenūmo.

²⁹Na lūūlū ū Nawī (īkī atī na ngabo nūūlū wingīji wakwe wei ng'wenekīlī), nū ngeni nū mpīna, nū nchīlwa[11] ūyo akikalaga mu mizengo yako, akūdūla kwiza kūlya nang'hwe igūte mu gīko; ū SEEBA Mulungu wako akwīlūkīle ū mu milīmo yako yose īyo ūkūtūmama na makono gako.