Read Sukuma Bible 2015 – Bibilia Ilagano Lya Kale 2015 Kūshokeela 15 Bible Online

Kūshokeela 15 - Sukuma Bible 2015 – Bibilia Ilagano Lya Kale 2015 bible

Kūshokeela 15

¹Būlī ng'waka gwa mpungatī ū kū būkalīkījo wago, mukūbalekeja a banhū abo mukūbatondaga būgasa.

²Ū būlekeja wenūbū mukūwīta mu nzīla yīyī, būlī ntondi ūyo akūntondaga Ng'wisilaeli ng'wiye būgasa bo shikolo, akūnekeja; aleke ū kūntonda ū būgasa wenūbo ū Ng'wisilaeli ng'wiye, nūūlū nzenganwa ng'wiye. Nguno ī likanza lya ng'wa SEEBA lyahamīlagwa, īlo alītūūlile kūlwa kūbalekeja banhū būgasa wabo.

³Ūdūgije kūsola ī shikolo ū kūfuma ū kūlī nobeji, ūyo atī Ng'wisilaeli ng'wiyo; alīyo ū ndūgūyo ū ng'wene nekejage gete pyī ū būgasa wakwe.

⁴Kwike nahene ītīho nguno ya kūbiza ho bahabī ū mu bing'we; nguno ū mu sī īyo SEEBA Mulungu wako alīkwinha ībize yako ya wingīji wako, akūkwīlūkīla ningī no.

⁵Ū bebe bizaga ng'wigwi dūhū ū kūlī SEEBA Mulungu wako, ūbiza ng'welwa ng'holò ū kūshimīzīla ū mu shilagīlo īsho nalīkwinha lelo.

⁶Nguno ū SEEBA Mulungu wako akūkwīlūkīla gīt'ūmo kūlī kwisagīja kwakwe; na lūūlū banhū ba mahanga mingī bakūyiza ū kūlī bebe kūlanda shikolo, alīyo ū bebe ūtūlanda kūfuma kūlī ose ose; hama ūkūsuga mahanga mingī, alīyo lītigela ihanga nūūlū līmò lya kūkūsuga ū bebe.

⁷Kwike ūlū ng'habī wilonga ū mu baana ba ng'wing'we mu nzengo gūmò gwaho ū mu sī īyo SEEBA Mulungu wako īyo alīkwinha, ūtizūbiza mi ng'holò, nūūlū ngugu ū kūlī ndūgūyo ūyo alī na makoye ga būhabī.

⁸Alīyo bizaga ng'wiza ng'holò, nzunīlījage ū ng'wiyo akūlande īsho atī nasho.

⁹Ilang'hanage ūtizūbiza n'iganiko lyabūbi ū mu ng'holò yako lya kwiwīla, “Yaya nguno gwegeelaga no ū ng'waka gwa mpungatī, ū gwa kūbalekeja banhū būgasa wabo.” Na lūūlū kūlwa mhayo gwenūyo ūtizūmipīja ng'holò ū ndūgūyo, ūkaleka kūngunanha ūlū alī mu makoye. Nguno ū ndūgūyo ūlū ūnīlīīla SEEBA ū mu mhayo gwenūyo, ū bebe ūkūbalīlwa būbi.

¹⁰Hū kūhaya īkwigelile ūngunaane ū ndūgūyo, nīyo wīte mu wiza ng'holò. Ūlū wīta gīko ū SEEBA Mulungu wako akūkwīlūkīla ū mu milīmo yako yose, nū mu yose īyo ūkwīyīta na makono gako.

¹¹Managa gīkī a bahabī batūleka ū kwilonga ū mu sī, na lūūlū nalīkūlagīla ūbize ng'wiza ng'holò ū kūlī ndūgūyo, ū kū banhū abo balī na makoye na a bahabī abo balīmo ū mu sī yako.

¹²Hama ūlū Ng'hebulania ng'wiyo, ngosha nūūlū nkīma, ūjinjiwa kūlī bebe ūbiza nsese wako, hūna ūkūtūmamīla kūshisha ikanza lya myaka ītandatū, ū mu ng'waka gwa mpungatī ūkūng'winha wiyaabī.

¹³Nīyo ūlū ūng'winha ū wiyaabī, ūtizūneka aje makono dalali.

¹⁴Ng'wītīlage wiza ng'holò ūngabūlīle nang'hwe nūūlū tūgeehu kūfuma ū ng'widaale lyako, na a ha lūbūūga lwako, nū ng'wikamīlo lyako lya divai. Ng'winhage kūlenganīla nī ījo SEEBA Mulungu wako wakwīlūkīla.

¹⁵Shikwigelile kwizūkwa gīkī, ū bebe walī nsese mu sī ya Misili; alīyo ū SEEBA Mulungu wako ūūkūkomoola, h'ī nguno yene ī lelo nalīkwinha ī shilagīlo shenīshi.

¹⁶Alīyo ū ndūgūyo ūlū ūkūwīla, “Natatogilwe ū kwīnga a ha ng'wako,” īkī wakūtogilwe no pyī nī kaya yako, nīyo hangī alībona gīkī a ha ng'wako abeegije no.

¹⁷Ūlū gūja chene solaga līmeelo, hūna ūng'wenhe ha nyango, ūgūkandīkīje ū gūtū gwakwe ha nyango ūgūchibūlīle henaho nī līmeelo lyenīlo; na lūūlū kūfuma ikanza lyenīlo akūbiza nsese wako ilalī. Nū nsese wako ū nkīma ūkūng'wītīla gīko.

¹⁸Ūtizūbona gīkī ū kūng'winha wiyaabī ū nsese wako gūlī mhayo ndito no, nguno ī solobo ya kūkūtūmamila ikanza lya myaka ītandatū dalali, īlī nhaale no; īkīlile ng'hangala ibīlī a ha solobo ya kūfuma mu milīmo ya kūbeejiwa na bitūmamīja ba mheela. Na lūūlū ū SEEBA Mulungu wako akūkwinha ū mu yose īyo ūlayīte.

¹⁹Ū mu madaale gako ga ng'ombe na ga ng'holo na mbūli, ī mbyalwa ja kwandya ī ng'hosha pyī ī jose jisolanhyage kūlwa ng'wa SEEBA Mulungu wako. Ī mbyalwa ja kwandya ja ng'ombe jako yaya ū kujitunga ijoki gīkī jibize ja kūtūmama milīmo, nī mbyalwa ja kwandya ja ng'holo jako ūtizūjileka gīkī ūyūpandīka solobo nguno ya booya wajo.

²⁰Ū bebe hamò nī kaya yako mukūyūjilya ī mitugo jenījo būlī ng'waka, kū būtongi bo ng'wa SEEBA Mulungu wako, ū kwipandī īlo alalīsole wei.

²¹Ū ntugo gwa mbika yenīyo ūlū gūlī na būlemehazu būlebe; gītī kūgigīla, būbboku, nūūlū būlemehazu būngī bose bose wabūbi, yaya ū kūgūfunya kūbiza shitambò kūlwa ng'wa SEEBA Mulungu wako.

²²Ū gwenūyo ūkūgūlya ūlī mu nzengo gwa ng'wing'we; banhū bose badūgije kūlya ī nyama yenīyo, babize beela na a babo batī beela; lyagi gīt'ūmo mukalīīlaga laala nūūlū saala.

²³Kwike yaya ū kūgalya a mininga gayo, gitage hasī gītī minzī.