Read Sukuma Bible 2015 – Bibilia Ilagano Lya Kale 2015 Kūshokeela 18 Bible Online

Kūshokeela 18 - Sukuma Bible 2015 – Bibilia Ilagano Lya Kale 2015 bible

Kūshokeela 18

¹A bagabīji a Balawī, hū kūhaya pye a ba shibyalīlwe sha ng'wa Lawī, a benabo yaya ū kūpandīka ngabo nūūlū wingīji hamò na a Baisilaeli. A bene bakūpandīka ī shilīwa shabo kūfuma mu shakwinha īsho Baisilaeli bakamfunījaga SEEBA mu nzīla ya moto, nguno ū wenūbo hū wene ū wingīji wabo.

²A boi batūbiza na wingīji hamò na a baana ba ng'wabo; ū SEEBA hū ng'wene ūyo alī wingīji wabo, gīt'ūmo wabisagīīgīja.

³Ū ngabo gwa bagabīji ū gwa kūfuma kū banhū abo bakafunyaga nzagamba nūūlū ng'holo kūbiza shitambò, gūkūbiza ūyū, gūkono, na nambo na masaya būbīlī wago, nī sha munda.

⁴Mukūyūbinha na a matwajo ga kwandya a ga shilīwa shing'we, nī divai ī mhya na a maguta, hamò nū booya wa ng'holo jing'we ījo jilandya kūmoogwa.

⁵Nguno ū SEEBA Mulungu wing'we wabasola a benabo, hamò nī shibyalīlwe shabo kūfuma ū mu ng'anda jing'we jose, gīkī būlī lūshikū bīmīīle na kūtūmama milīmo mu lina lya ng'wa SEEBA.

⁶Ūlū Nawī ūsaama kūfuma mu nzengo gūmò gwaho ū mu Isilaeli ūmo akwikalaga, wiza ū kwipandī īlo SEEBA alalīsole, wikala mu kwifunya kwa ng'hana,

⁷a henaho akūtūmama ū mu lina lya ng'wa SEEBA Mulungu wakwe, gīt'ūmo bakwītīlaga pye a Balawī biye, abo bakūtūmamaga ko ū kū būtongi bo ng'wa SEEBA.

⁸Nū wei akwanukūla ū ngabo gwakwe gīt'ūmo bakwanukūlīlaga a biye, nūūlū ūbiza wapandīkile hela kūfuma mu kūjinja malaale ga mu kaya ya ng'wawe.

⁹Ūlū ūshika ū mu sī īyo SEEBA Mulungu wako alīkwinha, yaya ū kwilanga kwīta ī ya malofu īyo bakwīyītaga mo.

¹⁰Atizūbiza ho nūūlū ūmò wing'we wa kūmpemba mu moto ng'witūnja wakwe nūūlū nshīke wakwe gīkī abize shitambò; nūūlū wa kwilanga mihayo ya būchūūja, nūūlū kūbeeja mbika ndebe ja mihayo ya mu giiti, nūūlū kūchemba ngoko, nūūlū būlogi.

¹¹Atizilonga wa kwitana masamva, nūūlū wa kūsoma mu shiganza sha banhū, nūūlū kūtūmamīla myoyo misoso ya mbika jose jose, nūūlū wa kūbūūja mihayo kū banhū bamala kūcha.

¹²Nguno būlī ng'wene ūyo wīta mihayo īlī gīko ū kūlī SEEBA alī wa malofu; na īlī kūlwa nguno ya mihayo ya malofu gītī yenīyī hī chene ū SEEBA Mulungu wing'we alīgapeeja a mahanga genayo gang'wīngīle.

¹³A bing'we īng'wigeleelilwe mubize mutī na shilingo ū kū būtongi bo ng'wa SEEBA Mulungu wing'we.

¹⁴A mahanga ayo ūlīja kūgataaja sī yago gakabadegelekaga abo bakatūmamīlaga nguzu ja giiti hamò na būchūūja. Alīyo ū bebe, ū SEEBA Mulungu wako atakūzunīlīgije ū kwīta ī yenīyo.

¹⁵Ū SEEBA Mulungu wako akūkūbūūkīja ng'hangi wa kūbiza gītī nene, kūfuma mu baana ba ng'wing'we, ūyo shikwigeleelilwe ūng'wigwe.

¹⁶Nguno ū mhayo gwenūyū h'ūyo ūkanomba ū SEEBA Mulungu wako aho ūlī kū lūgūlū lwa Holebu, ū mu lūshikū lwa kwibilinga, aho ūkahaya, “Natizongeja kūliigwa ī lilaka lya ng'wa SEEBA Mulungu wane, nū kwikala nakūgūbonaga ū moto ū ntaale gwenūyū, nguno numho nakūcha!”

¹⁷A henaho ū SEEBA akaniwīla, “Ū mhayo ūyo bagūhaya gūtūngīlīgije;

¹⁸na lūūlū nakūbabūūkīja ng'hangi wa kūbiza gītī bebe kūfuma mu baana ba ng'wabo. Nakūtūūla ī mihayo yane mu nomo gwakwe, hūna ū wei akūyūbawīla īyo nakūnagīla.

¹⁹Ūlū munhū ose ose ūlema ū kwīyiigwa ī mihayo yane īyo alīyīhaya ū ng'hangi ng'wenūyo mu lina lyane, nene ng'wenekīlī nakūndīlīla.

²⁰Alīyo ū ng'hangi ūyo witūma wei ng'wenekīlī kūhaya mu lina lyane mihayo īyo natanagīlile nene kwīhaya, ū ng'wenūyo shing'wigeleelilwe abūlagwe; pyī nū ng'hangi wa kūgima kūhanga mihayo mu lina lya bamulungu bangī.”

²¹Mushikile kūbūūja mulīhaya, “Ī gīsī tūkūmana kinehe ī gīkī ū mhayo ū nebe gūtahayiwe na SEEBA?”

²²Ū mhayo ūyo alagūhaye ng'hangi mu lina lya ng'wa SEEBA alīyo gūūleka ū kūshikīīla, ū gwenūyo atagūhayile SEEBA. Ū ng'hangi ng'wenūyo wihayīlaga dūhū wei ng'wenekīlī; yaya ū kūng'ogoha.