Read Sukuma Bible 2015 – Bibilia Ilagano Lya Kale 2015 Kūshokeela 19 Bible Online

Kūshokeela 19 - Sukuma Bible 2015 – Bibilia Ilagano Lya Kale 2015 bible

Kūshokeela 19

¹Ū SEEBA Mulungu wako ūlū ūmala kūgakenaagūla a mahanga ga banhū abo sī yabo alīkwinha bebe, hūna ū bebe ūlū ūbapeeja a banhū benabo wigasha ū mu mizengo yabo nī numba jabo,

²Īkūkwigeleelwa kūsola mizengo idatū; ībize ha gatī gatī ya sī īyo SEEBA Mulungu wako alīkwinha kwīdima ībize yako.

³Hanuma ūkūbeeja nzīla ja kūja ū kū mizengo yenīyo; hūna ī sī īyo SEEBA Mulungu wako alīkwinha kūbiza wingīji wako ūkwīgabanhya hadatū, ībize gīkī ūyo ūbūlaga munhū adūle kūpeelela ko akapīle.

⁴Ī shilagīlo īsho shing'wigeleelilwe ūyo ūbūlaga munhū hūna ūpeelela kwenūko kūlwa kūpīja būpanga bokwe, shiishi: Ū wa kūmūlaga nzenganwa ng'wiye mu kūhūbīla, ūbiza walī atang'wikanilwe nūūlū kūng'wibandīīla,

⁵gīt'ūmo munhū adūgije kūja kwipoolu na ng'wiye kūtema mitī; hūna wa kūhayūhubenga ī mbasa, yūfubbūka ū mu mpīni yūntūla ū ng'wiye ūcha! Ū munhū ng'wenūyo adūgije ū kūpeelela kū nzengo gūmò gwa yenīyo ūūkapīlīla kwenūko.

⁶Nguno ūlū ītī chene, maji wa shiilī adūgije kūnkūūbīja; na lūūlū īkī ū kwipandī lya kūpīlīla halī kūle, ashikile kūmpandīkīla mu nzīla ūntūla ūmūlaga kūlwa būpelanu, alīyo hamo atigeleelilwe kūbūlagwa, nguno ū wei wamūlagaga ū ng'wiye kūlwa kūhūbīla, walī atang'wikanilwe.

⁷H'ī nguno yene nalīkūlagīla ūkomanye mizengo idatū kūlwa nguno yako.

⁸Ū SEEBA Mulungu wako ūlū alajigalīhyī ī mbīmbī jako gīt'ūmo wabisagīgīja mu kwilahīla a bakūlūgenji bako, hūna ūkwinha ī sī ī yose īyo wabisagīja,

⁹Īkī ūshidimile ī shilagīlo shose īshi nalīkwinha lelo; kūntogwa ū SEEBA Mulungu wako na kūshimīzīla mu nzīla jakwe shikū jose, ūlū yūja gīko ūkūsola mizengo yīngī idatū hangī.

¹⁰Na lūūlū ītaga gīko, gatizidīka mininga gatī na būbi ū mu sī yako īyo SEEBA Mulungu wako alīkwinha kūbiza ya wingīji wako. Ītaga gīko ūtizūgwa mu būhūbi wa kwita mininga gatī na būbi.

¹¹Alīyo ūlū munhū ankolilwe ng'wiye, hūna ūng'wibandīīla hanhū wiza ūntūla ūmūlaga, hanuma ya henaho ūpeela kūja kū nzengo gūmò gwayo ī mizengo yenīyo,

¹²a banamhala ba mu nzengo gwakwe bakūtūma ajīlwe ū kū nzengo gwenūyo wize atūūlwe mu makono ga maji wa shiilī abūlagwe.

¹³Yaya ū kū nchīla shigongo ū wa gīko; īng'wigeleelilwe muwīnje ū būbi wa kwita mininga gatī na shilingo ū mu Isilaeli, īmujīle chiza ī mihayo ying'we.

¹⁴Yaya ū kūlyīnja ī liwe lya ha lūbīmbī lwa kūkūlekanya na nzenganwa ng'wiyo, īlo lītūūlilwe na bataale bako, ū mu wingīji ūbo ūlanukūle ū mu sī īyo SEEBA Mulungu wako alīkwinha ībize yako.

¹⁵Ū būkaanīji bo munhū ūmò dūhū, būtigeleelilwe ū kūng'wenheleja munhū kūbalīlwa būhūbi kūlwa mhayo gwabūbi nūūlū būkenaagūji ūbo alībūūlwa gīkī owītile. Ū būng'hana bo mhayo shiigelile būmanwe mu nzīla ya būsombooji wa bakaanīji babīlī nūūlū badatū.

¹⁶Ūlū munhū wīmīīla kūmūūla ng'wiye hūna wandya kūtūmamīla būlomolomo ū mu kūnkaanīla,

¹⁷a banhū benabo būbīlī wabo īkūbigeleelwa kwīmīīla kūlī SEEBA, kū būtongi wa bagabīji na balamuji abo balī h'isumbī ū mu shikū jenījo.

¹⁸A balamuji bakūgīsīlīja chiza ūmo īlī ī mihayo yenīyo, ū nkaanīji ng'wenūyo ūlū ūbonwa nomolomo, yūmanīka hape gīkī alīnkaanīla būlomolomo ū ng'wiye,

¹⁹a henaho mukūng'wītīla gīt'ūmo walī atogilwe wītīlwe ū ng'wiye; īkūng'wigeleelwa muwīnje gete ū būbi ū mu bing'we.

²⁰Ū mu gīko a banhū bakwigwa ī yenīyī bogohe; na lūūlū ū mhayo gwa malofu gītī gwenūyo gūtīko kūshokeelwa hangī ū mu bing'we.

²¹Yaya ū kwīta shigongo; ū būpanga būlīpwe na būpanga, nī liso kūlwa liso, nī lino kūlwa lino, nū nkono kūlwa nkono, pyī nū kūgūlū kūlwa kūgūlū.