Read Sukuma Bible 2015 – Bibilia Ilagano Lya Kale 2015 Kūshokeela 20 Bible Online

Kūshokeela 20 - Sukuma Bible 2015 – Bibilia Ilagano Lya Kale 2015 bible

Kūshokeela 20

¹Ūlū ūbūūka kūja kū būlūgū kwilwisha na banishi bako, ūbona gīkī balī na falasa na magogoteni mingī ga būlūgū, nī libità lyabo līl'itaale kūtinda ī lyako, yaya ū kūbogoha; nguno ū SEEBA Mulungu wako, ūyo wakwenha kūfuma sī ya Misili akūbiza hamò nang'ho.

²Ūlū lyegeela kūshika ikanza lya kūja kū būlūgū, ū ngabīji ize ū kū bashilikale ahooye nabo;

³abawīle, “Igwagi gete Baisilaeli, ī lelo mulīfuma kūja kwilwisha būlūgū na banishi bing'we. Mutizūhaahūūka nūūlū kogoha, yaya ū kūdetema nūūlū kūbbaha ū kūbūtongi wabo.

⁴Nguno ū SEEBA Mulungu wing'we alīja hamò ning'we; hū ng'wene ūyo akūmulwīlīīla ū kū banishi bing'we ang'winhe būpyeni.”

⁵Hanuma a batongeeji ba mabità ga bashilikale bakūhooya nabo babawīle, “Alīho nani ūyo wazengile numba haha ītaalī mhya, ataalī nūūlū kwītūūla mu makono ga ng'wa SEEBA? Ni ashokage kaya atizūchīla kū būlūgū ī numba yenīyo īkatūūlwa na ūngī ū kūlī SEEBA.

⁶Nūūlū alīho nani a henaha ūyo walīmile ngūnda gwa mizabibu haha, alīyo ataalī kwandya ū kūgalūmba a matwajo gaamo? Ni ashokage kaya, atizūchīla kū būlūgū a matwajo ga mu ngūnda gwakwe gakalūmva na ūngī.

⁷Nūūlū hamo alīho munhū a henaha walūngije nkīma haha, kwike ataalī ū kū ntoola? Ni ashokage kaya atizūchīla kū būlūgū ū nkīma ng'wenūyo akatoolwa na ūngī.”

⁸Hanuma ya henaho a batongeeji ba bashilikale bakongeja kūhaya, “Hamo alīho ose ose ogohaga? Ni ajage kaya atizūbenheleja na biye kogoha.”

⁹A batongeeji ba bashilikale ūlū būmala ū kūhooya na a mabità, bakūbakomanya bamò babo babatūūle kūbiza bataale ba mabità.

¹⁰Ūlū ūbūūka kūja kūbadumīla banhū mu nzengo nebe, gīkī ūlwe nabo būlūgū, binhage tame ng'wanya gwa kūhooya nang'ho mihayo ya kūtūūla mhola.

¹¹Ūlū būzunya, būkūlekela wingīla ū mu nzengo gwabo, pye a banhū ba ng'wene bakūbiza batūmami bako, bakūbeeja pyī ī milīmo yako īyo ūlabatūme kūbeeja.

¹²Alīyo ūlū būlema ū kūhooya, bandya kūkūdumīla kwilwisha nang'ho būlūgū, ū nzengo gwabo gūtūūlīlage mabità ga bashilikale gagūpīndīlīje.

¹³Hūna ū SEEBA ūlū ūgūtūūla mu makono gako ū nzengo gwenūyo, pye a bagoosha ūkūbabūlaga na līlūshū.

¹⁴Lelo a bakīma na a baana nī mitugo, pyī nī shingī ī sha mu nzengo gwenūyo, ūkūsola ūpandīke nding'wa. Ī shose īsho alakwinhe ū SEEBA Mulungu wako kūfuma ū mu banishi bako ūdūgije kūtūmamīla gīt'ūmo ūtogelilwe.

¹⁵Ūkwīyītīla gīko pyī ī mizengo īyo īlī ka kūle nang'ho, ī mizengo ya mahanga ayo gatī bbihī nang'ho.

¹⁶Alīyo ū mu mizengo ya mahanga ayo SEEBA Mulungu wako alīkwinha kūbiza wingīji wako, ūtizūlekeela mo shose shose īsho shikesheemaga.

¹⁷Yagajaga pye pye pye gete; a Bahītī, Baamoli, Bakanani, Bapelizi, Bahīvī, na a Bayebusi, gīt'ūmo SEEBA Mulungu wako wakūlagīīlīla.

¹⁸Batizūbiza ba kūkūlanga kūshimīzīla mu mihayo ya malofu yose yose, īyo bakītūmamīlaga mu kūbalamya bamulungu babo. Ūlū wīta gīko ūkūng'hūba no ū SEEBA Mulungu wako.

¹⁹Ūlū ng'ūgūpīndīlīja nzengo gose gose n'ibità mukūlwaga nago gīkī mugūsole, hūna ng'ūkwīja ī shikū mulīho a h'ipandī lyenīlo, yaya ū kwīkenaagūla ī mitī mukwībbutagūlaga na mbasa, nguno mukūyūūlya; mutizīgwisanja. Ī gīsī, ī mitī ya mu makūngū yabizaga banhū nose ng'wilwishe nayo a bing'we?

²⁰Kwike ahene mudūgije ū kūbbuta ī mitī īyo ng'wīdeebile gīkī ītī na matwajo ga kūlyiwa. Ī yenīyo mudūgije ū kūzengela ī nhala ja būlūgū ūlū mugūpīndīlīgije ū nzengo gwenūyo kūshisha mugūgwishe.