Read Sukuma Bible 2015 – Bibilia Ilagano Lya Kale 2015 Kūshokeela 21 Bible Online

Kūshokeela 21 - Sukuma Bible 2015 – Bibilia Ilagano Lya Kale 2015 bible

Kūshokeela 21

¹Ūlū munhū ūbonwa achile ng'wilaale ū mu sī īyo SEEBA Muluingu wako alīkwinha ībize yako, alīyo ū mūlagi ūbiza atamanīkile,

²a banamhala bing'we na a balamuji bakūja ū kwipandī lyenīlo bakabūlole ū būkūle wa kūfuma a ha mimba gwenūyo kūja ū kū mizengo īyo īlī kūūko kwenūko.

³Hanuma a banamhala ba mu mizengo īyo īlī hihī hihī henaho bakūsola ndogoosa ya ng'ombe īyo ītaalī kwandya milīmo nūūlū kūzwalīkījiwa ijoki.

⁴Ī ndogoosa yenīyo bakwīswaga būja nayo kwilago īlo lītaalī kūlīng'wa, ūko gūlīko na mongo gwa minzī gakūselaga. Ūlū būshika ū ng'wilago lyenīlo bīmyoola ī nhingo yayo ī ndogoosa yenīyo bībīnza.

⁵Hūna a bagabīji, a ba lūganda lwa Lawī bakwegeela hihī, nguno abenabo ū SEEBA Mulungu wako abasolile kūtūmama nīmo gwakwe na kūbalombela a banhū mu lina lya ng'wa SEEBA, na kūlamula mihayo yose nūūlū wilemeelwa.

⁶Hanuma ya henaho pye a banamhala ba mu mizengo īyo īlī hihī nū mimba gwenūyo, bakūkalaba mu minzī a makono gabo, bakīngīlīgije a higūlya ya ndogoosa īyo yabūlagīlagwa ng'wilago bo kūbīnzwa nhingo.

⁷Hūna bakūhaya hape, “A makono gise gatagiitile a mininga geneya; na a miso gise gatagūbonile ū mhayo gwenūyū aho gūlīītwa.

⁸SEEBA, balekejage a banhū bako a Baisilaeli abo wabakomoola; nū būhūbi wa kwitwa miniga gatī na kabi ūtiūzūbūbalīla kū banhū bako a Baisilaeli; ni balekejiagwe ū būbi wa mininga genayo.”

⁹Na lūūlū ū mu gīko mukūwīnja, būng'wīngīle ū būbi wa kwitwa mininga gatī na shilingo, nguno mukūbiza ng'wītaga ya būtūngīlīja ū mu miso ga ng'wa SEEBA.

¹⁰Ūlū ūja kwilwisha būlūgū na banishi bako, hūna ū SEEBA Mulungu wako ūbatūūla mu makono gako ūdima nding'wa,

¹¹ū mu bading'wa benabo ūlū ūbona mo nkīma wawiza ūūkūtoga, ūdūgije kūnsola abize nke wako.

¹²Ng'wenhage ū mu ng'wako, ashike amooge ī nzwīlī jakwe, na maala gakwe agabbute;

¹³nī shizwalo īsho walī azwalile aho alīding'wa ashizuule. Ūlū wikala ū mu kaya yako ikanza lya ng'weji ngima akūbalīlaga a ba ise nū nina, a henaho lūūlū ūdūgije kūntoola ūbize ngoshi wakwe, nū wei abize nke wako.

¹⁴Alīyo ūlū lyūshika ikanza ooya ū kūkūyeja, nekage aje ūko alatogwe wei ng'wenekīlī. Kwike yaya ū kūnjinja, nūūlū kūntūūla mu būsese, nguno wamalile kūntūūla mu kūdalahwa.

¹⁵Ūlū munhū alī na mhalī ja bakīma babīlī, hūna ūntogwa ūmò wabo, alīyo ū ūngī ūhenwa, ūlū ū mu būbīlī wabo būmyalīla bitūnja, ū ng'witūnja wa kūbyalwa kwandya ūbiza wa nkīma ūyo ahenilwe,

¹⁶na lūūlū ūlū lyūshika ikanza lya kūbagabanhya wingīji a bitūnja bakwe, ni ilang'hanage atizūntonja kū būtongi ū ng'witūnja wa nkīma ūyo antogilwe, gītī gīkī alī wa kwandya kūbyalwa, ū ng'witūnja wa kwandya kūbyalwa, ū wa ng'henwa ūntūūla kū numa.

¹⁷Shing'wigelile kūzunya gīkī ū ng'witūnja wa kūbyalwa nū nkīma ū ng'henwa hū ng'wene ū ntaale, na lūūlū ang'winhe ng'hangala ibīlī ū ngabo gwa wingīji, gīt'ūmo īng'wigelilwe myalwa wa kwandya. Nguno ū ng'wenūyo hū ng'wene ū lūmeng'ho lwa nguzu ja ng'wa ise. Ū ngabo gwa wingīji gwa myalwa wa kwandya gūng'wigeleelilwe wei.

¹⁸Ūlū munhū alī na ng'witūnja ngūnu na shitiigwa, hama nambu ū kū ba ise nū nina, nīyo atabigwaga nū mu būhūgūji wabo,

¹⁹a ba ise nū nina bakūndima bantwale kū mita gwa nzengo gwabo, kū būtongi wa banamhala.

²⁰Ūlū būshika a ha mita būbawīla a banamhala, “Ū ng'witūnja wise ng'wenūyū shitiigwa, nīyo hangī atī na būhamīle; alemile gete ū kūtwigwa ūlū tūlīng'hūgūla. Nīyo nkenaagūji no, na ng'wi wa mawalwa.”

²¹A henaho pye a bagosha ba mu nzengo gwenūyo bakūmponda mawe kūshisha ache. Shiigelile ūwīnje gete ū būbi ū mu bing'we; a Baisilaeli a bose bigwe bogohe.

²²Ūlū munhū ūhūba mhayo gwigeleelilwe kūbūlagwa, hūna ū mīlī gwakwe gūūnungelejiwa ha līntī,

²³yaya ū kūgūleka ū mīlī gwakwe gūnungeele kūshisha būjikū pe. Shiigelile ajīkwe ū lūshikū lwenūlo, nguno būlī ng'wene ū wa kūnungelejiwa azumilwe na Mulungu. Yaya ū kwīsosohaja ī sī yako īyo SEEBA Mulungu wako alīkwinha kūbiza ya wingīji wako.