Read Sukuma Bible 2015 – Bibilia Ilagano Lya Kale 2015 Kūshokeela 23 Bible Online

Kūshokeela 23 - Sukuma Bible 2015 – Bibilia Ilagano Lya Kale 2015 bible

Kūshokeela 23

¹Ū ngosha ūyo asoloolilwe nūūlū atīnīkile kū wīma mbele atigeleelilwe kwisangīja ū mu kwibilinga kwa banhū ba ng'wa SEEBA.

²Nū munhū wa nda ya bū hamò būbyīle bokwe kūshisha kū shibyalīlwe sh'ikūmi, atigeleelilwe kwisangīja ū mu kwibilinga kwa banhū ba ng'wa SEEBA.

³A Baamoni na a Bamoabu pye a bose nī shibyalīlwe shabo batazunīlījiwe ū kwingīla ū mu kwibilinga kwa banhū ba ng'wa SEEBA, kūshisha kū shibyalīlwe sh'ikūmi.

⁴Nguno aho ng'walī mu lūgendo kūfuma kū sī ya Misili batamusūng'wanhile na kūng'winha minzī; ha ng'wanya gwaho bakang'honga hela Balaamu ng'witūnja o ng'wa Beoli muna Petooli ya Alamu-nahalaimu, gīkī amuzume.

⁵Kwike ū SEEBA Mulungu wako ūlema ūkūndegeleka ū Balaamu, ī lizumo lyakwe ūlīgalūcha kūbiza ū kūlī bebe, nguno ū SEEBA Mulungu wako akūtogilwe.

⁶Ū mu būpanga wako bose yaya gete ū kūbalombela mhola nūūlū a benabo.

⁷Alīyo ū muna Edomu, ū ng'wenūyo yaya ū kūndalaha nguno ndūgūyo; nūūlū ū muna Misili yaya ū kūndalaha, nguno ū bebe wikala ū mu sī yakwe nyageni.

⁸A baana babo a bakūbyalwa mu shibyalīlwe sha kadatū badūgije ū kwingīla ū mu kwibilinga kwa banhū ba ng'wa SEEBA.

⁹Ūlū ūfuma ū mu ng'hambī yako kūja kwilwisha būlūgū na banishi bako, ilang'hanage ūtizikuumya na shikolo shisoso shose shose.

¹⁰Ūlū ūmò wa bagosha ba mu bing'we ūsosohala kūlwa nguno ya kwiloteela būjikū, īkūng'wigeleelwa kūja hanze ya ng'hambī akikale kwenūko.

¹¹Ūlū lyūheeha ī līīmi, ooga mu minzī ū mīlī gwakwe, hūna ūlū līlīshilīlīkīīla ī līīmi ūshoka ū mu ng'hambī.

¹²Ūkūsola ipandī, ī hanze ya ng'hambī, ūko ūkūyūja kwigunanha.

¹³Ū mu shikolo sha kūtūmamīla, bizaga na kagembe kado na kado ū mu kaya, ka kūyūsīmbīla. Ūlū ūja kwigunanha, sīmbaga kachongo; hama ūlū ūmala ū kwigunanha galūkaga ūbūfukīīle ū būsoso wako.

¹⁴Nguno ū SEEBA Mulungu wako akūyeelaga hamò nang'ho ū mu ng'hambī yako kūlwa kūkūlang'hana, na kūbatūūla mu makono gako a banishi bako. Na lūūlū ī ng'hambī yako shiigelile ībize neela, atizūbona būsoso ū mulī bebe agalūke īnge akūleke.

¹⁵Ūlū nsese ūpeela kūfuma kūlī ise būgonzo wiza kwibisa ha ng'wako, yaya ū kūmfunya gīkī ashoke ko hangī.

¹⁶Nekage wigashe hamò ning'we hose hose aho alatogwe wei ng'wenekīlī, mu nzengo ūyo alasole we; nīyo yaya nū kūng'wiboneela.

¹⁷Atizilonga munhū ose ose ū mu Baisilaeli, ngosha nūūlū nkīma, wa kwītīla mihayo ya būjingi na wīmīlīzu mu numba ya ng'wa SEEBA Mulungu wako.

¹⁸Sabo jose jose ījo jilonga kūfuma mu būjingī nūūlū wīmīlīzu wa bakīma na bagosha, yaya ū kūjenha mu numba ya ng'wa SEEBA Mulungu wako kwiza kūfunya shakwinha sha kūlahīla kwa mbika yose yose. Nguno ī shose shenīshi shilī sha malofu ū kūlī SEEBA Mulungu wako.

¹⁹Ūlū ūngunanha ndūgūyo mu mhayo gose gose yaya kūnomba solobo; ūbize wangunanhile hela nūūlū shilīwa, nūūlū shikolo shingī shose shose, īsho ūshikile kūpandīka solobo kūfuma musho.

²⁰Ūlū munhū w'ihanga līngī ūdūgije ūkūnsoja solobo, alīyo ū ndūgūyo, ū Ng'wisilaeli, ū ng'wenūyo yaya gete. Ū mu gīko ū SEEBA Mulungu wako akūkwīlūkīla ningī ū mu yose īyo ūkwīyīta ū mu sī īyo ūlīja kwīdima ībize yako.

²¹Ūlū ūlahīla mhayo gose gose kūlī SEEBA Mulungu wako, yaya ū kūdīla ū kūgūshikīlīja. Nguno ū mhayo gwenūyo akūkūbūūja ū SEEBA Mulungu wako ūgayiwe ū gwa kūhaya, ūbize ng'hūbi.

²²Alīyo ūlū wikala ūtalahīlile, ūtūūgwa ū mu būhūbi.

²³Būlī mhayo ūyo ūlagūhaye na nomo gwako managa gīkī īkwigeleelilwe kūgūshikīlīja, nguno ī shilahīlo shenīsho wabeejaga bebe ng'wenekīlī na nomo gwako kūlī SEEBA Mulungu wako.

²⁴Ūlū wingīla mu ngūnda gwa mizabibu gwa ndūgūyo, ūdūgije kūlya ī mizabibu gīt'ūmo ūlatogelwe, alīyo ūtizūtūūla na mu shigabbu.

²⁵Ūlū ūbīta mu ngūnda gwa ndūgūyo, ūdūgije kūhūlūla a mangala ūlya ī mbeke, alīyo ūtizūsola lūshū wandye kūbūgesa ū būsīga ūbo wīmīīlile.