Read Sukuma Bible 2015 – Bibilia Ilagano Lya Kale 2015 Kūshokeela 24 Bible Online

Kūshokeela 24 - Sukuma Bible 2015 – Bibilia Ilagano Lya Kale 2015 bible

Kūshokeela 24

¹Ūlū munhū ūtoola nkīma, alīyo ūmbyeeda kūlwa kūmona alī na shilingo shilebe, hūna ūng'wandīkīla talaka ūmpeeja wīnga a ha ng'wakwe;

²hanuma ya henaho ū nkīma ng'wenūyo ūūkatoolwa na ngosha ūngī ipandī līngī,

³nū ngosha ng'wenūyo nang'hwe ūmbyeeda ūng'winha talaka, ūmpeeja a ha ng'wakwe; nūūlū hamo ū ngosha ng'wenūyo ūzumalīka,

⁴ū ngosha ūyo walī antoolile kwandya ū nkīma ng'wenūyo, ūyo akang'winha talaka ūmpeeja, atazunīlījiwe ū kūnshokela hangī ū nkīma ng'wenūyo; nguno wamala kūsosohajiwa. Ū mhayo gwenūyo gūkūbiza gwa malofu ū kūlī SEEBA. Yaya ū kūyenhela būbi ī sī īyo SEEBA Mulungu wako alīkwinha kūbiza ya wingīji wako.

⁵Ū munhū ūlū watoolile būhaha, atigeleelilwe kūtūng'wa kūja kū būlūgū, nūūlū kwinhwa milīmo midito yose yose. Shiigeleelilwe amale ng'waka ngima alī ha kaya akūnūngūjaga[13] ū nke wakwe ng'wenūyo.

⁶Ūlū munhū alī na būgasa kūlī bebe, yaya ū kūsola iwe lyakwe lya kūshela nūūlū ī sho yaho, gīkī ūshidimīīle kūshisha aho alakūlīpe ū būgasa wakwe; nguno ūlū wīta gīko ū būgasa ūbo alī nabo kūlī bebe būkūbiza bokwenheleja kūntaaja shikolo sha kwigunanhīla mu būpanga wakwe.

⁷Ūlū munhū ūding'wa wibaga ūmò wa baana ba ng'wawe a Baisilaeli, ūng'wīta kūbiza nsese wakwe nūūlū kūnjinja, ū ng'wibi wa munhū ng'wenūyo ni abūlagagwe. Shiigelile ūwīnje gete ū būbi ū mulī bebe.

⁸Ī mihayo ya būsaatu wa mbiji[14] shiigelile wīlole mu witegeleja būtaale; ītaga gīt'ūmo balakūwīlīle a bagabīji, a ba lūganda lwa Lawī.

⁹Izūkagwa ūmo SEEBA akang'wītīla Miliamu ū mu nzīla aho ng'wafumaga Misili.

¹⁰Ūlū ūnzunīlīja nzenganwa ng'wiyo kūsola shikolo shako abize na būgasa kūlī bebe, ūtizingīla ū mu kaya yakwe kwisolela bebe ng'wenekīlī ī ndiimīli[15] yakwe.

¹¹Ū bebe ikalaga hanze ūnindīīle akwenhele wei ng'wenekīlī ī shikolo īsho alīshifunya kūlwa būgasa ūbo alī nabo kūlī bebe.

¹²Ū munhū ng'wenūyo ūlū ūbiza ng'habī, yaya ū kūjūlaala nasho kū ng'wako īsho alīkwinha kūlwa koolecha gīkī akūkūlīpa ū būgasa.

¹³Ī līīmi ūlū lyūgwa nshokejage ī kache mbeho yakwe, alikumbe ī būjikū. Akūkūlūmba no, nīyo ū mu gīko ūkūbalīlwa būtūngīlīja ū kū būtongi bo ng'wa SEEBA Mulungu wako.

¹⁴Ūtizūng'wiboneela ū munhū ng'habī ūlū akūtūmamaga ha ng'wako gīkī apandīke shose shose,[16] abize Ng'wisilaeli ng'wiyo, nūūlū ūmò wa bageni abo bakwikalaga hamò nang'ho mu sī yako.

¹⁵Ng'winhage ī mheela yakwe ya būlī lūshikū aho līīmi lītaalī kūgwa, nguno ayisagīlilwe no īkī alī ng'habī; ūlū ītī chene akūnīlīīla SEEBA kūlwa nguno yako ūbalīlwe būkenaagūji.

¹⁶A babyaji[17] yaya ū kwinhwa nsango gwa kūbūlagwa kūlwa nguno ya būhūbi wa baana babo; na a baana batizinhwa nsango gwa kūbūlagwa kūlwa nguno ya būhūbi wa babyaji babo. Būlī munhū akūcha kūlwa nguno ya būhūbi bokwe wei ng'wenekīlī.

¹⁷Yaya ū kwīliganya ī ng'hana ū mu kalamulīle, ūlū ūlīnamula ngeni,[18] nūūlū munhū wamala bakwe. Nū nchīlwa yaya ū kūng'wīngīja kache mbeho yakwe kūlwa nguno ya būgasa ūbo alī nabo kūlī bebe.

¹⁸Izūkagwa gīkī ū bebe walī nsese u mu sī ya Misili, alīyo ū SEEBA Mulungu wako ūkūkomoola kūfuma ū mu sī yenīyo, h'ī nguno yene nalīkūlagīla kwīta ī mihayo yenīyī.

¹⁹Ūlū ūlīgesa mu ngūnda gwako, hūna ūkīlanhya lyangala, yaya ū kūlīshokela. Līlekage, ūnekele ngeni nū yūyo wamala bakwe, nūūlū ū nchīlwa. Ūlū wīta gīko ū SEEBA Mulungu wako akūkwīlūkīla ū mu milīmo yose ya makono gako.

²⁰Nūūlū ūlīhūlūla matwajo ga mizeituni yako, yaya ū kūshokeela lūkangala lwa kabīlī ū kūbīta ū mu matambī ga mitī yenīyo; nekelage ngeni nū yūyo wamala bakwe, na nchīlwa, alize apūmbīīle nang'hwe īsho alabone mo.

²¹Pyī nū mu ngūnda gwa mizabibu, ūlū ūlīhūlūla ī mizabibu yako, yaya ū kūshoka mo lwa kabīlī; īsho shilīsaagīīla nekelage ngeni nū yūyo wamala bakwe, na nchīlwa.

²²Izūkagwa gīkī nū bebe walī nsese u mu sī ya Misili; h'ī nguno yene nalīkūlagīla pyī ī yose yenīyī.