Read Sukuma Bible 2015 – Bibilia Ilagano Lya Kale 2015 Kūshokeela 25 Bible Online

Kūshokeela 25 - Sukuma Bible 2015 – Bibilia Ilagano Lya Kale 2015 bible

Kūshokeela 25

¹Ūlū banhū bilemeelwa mu mhayo gose gose, shibigelile bashike kwibanza, bakalojiwe na balamuji ū mhayo gwabo, gūgoloolwe; ū ntūngīlīja alekelwe, ū ng'hūbi inhwe nsango.

²Ū ng'hūbi ūlū wigeleelwa nsango gwa kūtūlwa, akūlagīlwa abundaale hasī mu būtongi bo namuji, atūlwe mbooko ījo jilahamīlwe; kūlenganīla nū būhūbi bokwe.

³Kwike yaya ū kūtūlwa mbooko ja kūkīla ha makūmi anè; nguno ū ng'wana wa ng'wing'we ūlū ūtūlwa jikīlile a henaho, akūdalahwa no ū mu miso gako.

⁴Ī ng'ombe ūlū īlīīta nīmo gwa kūtūla[19] būsīga, yaya ū kwītunga ū kū nomo gwayo.

⁵Ūlū bagosha ba myaji ūmò bakwikalaga hamò, hūna ūmò wabo ūcha alīyo atabyalile ng'wana ngosha, ū nkīma ūyo walī nke shitigelile akatoolwe hanze ya kaya yenīyo, kū babisa. Ndūgūye wa ngoshi akūng'wingīla, abize ngoshi ang'wītīle īyo yigelile kwītwa na nkwelaye.

⁶Ū ng'wana ngosha ūyo alabyalwe kwandya akwinhwa ī lina lyakwe ūyo wazumalīkile; lītizūjimīīla ī lina lyakwe ū mu Isilaeli.

⁷Alīyo ū munhū ng'wenūyo ūlū atatogilwe kūnsola ūyo walī nke wa ng'wana wa ng'wawe, ū nkīma ng'wenūyo akūja kū banamhala kū mita gwa nzengo akabawīle, “Ū ng'wana wa ng'wawe wa ngoshi wane atūhayaga ū kūlīgūngūmūla ī lina lya ndūgūye ū mu Isilaeli. Atatogilwe ū kūnīītīla īyo yigelile anīītīle kūlwa nguno ya ng'wana wa ng'wawe.”

⁸A banhamhala ba mu nzengo gwakwe bakūng'witana ū ngosha ng'wenūyo bahooye nang'hwe. Ūlū ongeja kūlema alīhaya, “Ū nene natatogilwe ū kūng'wingīla ū nkīma ng'wenūyo;”

⁹ū nkīma ng'wenūyo, ū nchīlwa akūbūūka aho igashije, aje a halī nkwelaye akang'wīngīje shilatū ū kū gūgūlū ū gūmò, hūna ūnswīla na mate ga kū būshū kūnū alīng'wīla, “Akīītagwa gīkī ū munhū ūyo atatogilwe kūzenga kaya ya ng'wanong'wawe.”

¹⁰Ī kaya yakwe ū munhū ng'wenūyo ū mu Isilaeli īkūmanīka mu lina lya “Kaya ya ntaajiwa shilatū.”

¹¹Ūlū banhū babīlī bikenyaga, hūna nke wa ūmò wabo wiza kūngunanha ū ngoshi ū mu wikenya nū ng'wilwisha okwe, ūlū ūshika ūnduta ū ng'wilwisha ng'wenūyo kū wīma mbele,

¹²ū nkīma ng'wenūyo ntīnage gete ū nkono gwakwe, yaya ū kūnsaatwa nūūlū hado.

¹³Yaya ū kūtūūla mu fuko gwako mawe ga kūpimīla ga mbika ibīlī, ibbūūpu n'idito.

¹⁴Na a mapimīlo ga būlīhu yaya ū kūbiza nago ga mbika ibīlī, līmò itaale līngī ido, yaya ū kwikala nago ū mu kaya yako.

¹⁵A mapimīlo gako ga būdito nūūlū būlīhu shiigelile gabize gatūngīlīgije gete; ū mu gīko ūkūbiza na būlamu būlīhu ū mu sī īyo SEEBA Mulungu wako alīkwinha.

¹⁶Nguno a bīīti ba mihayo īlī gīko, abo batatūngīlījaga, pye a bose ba malofu ū kūlī SEEBA Mulungu wako.

¹⁷Izūkagwa ūmo akakwītīla ū Amaleki aho walī mu nzīla ūfumile Misili.

¹⁸Nguno ī likanza lyenīlo ū bebe aho walī wanoga na kūseedeeka no no no, ū wei akakūūbūkīla; ūbabūlaga pye abo walī wabaleka kū numa, abo baalī banojiwa lūgendo, atang'ogohile Mulungu.

¹⁹Na lūūlū, ū SEEBA Mulungu wako ūlū ūkwifuuja kūfuma ū kū banishi pye abo bakūpīndije ū mu sī īyo alīkwinha ībize ya wingīji wako, ūkūbamala pye a Baamaleki bashile gete a ha sīlīlī y'igūlū, yaya ū kwība.