Read Sukuma Bible 2015 – Bibilia Ilagano Lya Kale 2015 Kūshokeela 26 Bible Online

Kūshokeela 26 - Sukuma Bible 2015 – Bibilia Ilagano Lya Kale 2015 bible

Kūshokeela 26

¹Nīyo ūlū ūshika ū mu sī yenīyo, īyo SEEBA Mulungu wako alīkwinha kūbiza ya wingīji wako, ūbiza wīdima wigasha mo ūlembeela,

²ūkūsola matwajo gamò ga kwandya kūfuma ū mu matwajo ga mu sī īyo SEEBA Mulungu wako alīkwinha, ūgatūūle mu shigabbu. Hanuma ūje ū kwipandī īlo SEEBA Mulungu wako alalīsole kūlwa wikalo wa lina lyakwe.

³Ū ngabīji ūyo alī h'isumbī ū mu shikū jenījo ūkūshika ūng'wīle, “Ī lelo nalīhaya hape ū kūlī SEEBA Mulungu wako gīkī, naashikile lūūlū ī haha ū mu sī īyo SEEBA walī wabilahīlīla bakūlūgenji bise gīkī akūtwinha.”

⁴Ū ngabīji akūshisola ī shigabbu kūfuma ū mu makono gako ashitūūle hasī kū būtongi wa ng'walīlo go ng'wa SEEBA Mulungu wako.

⁵Hanuma ya henaho ūkūhaya hape ū kū būtongi bo ng'wa SEEBA Mulungu wako, “Ū nkūlūgenji wane walī muna Alaamu wa kwikala akūsaamaga; akīīta ūsaamīla Misili, ūja ko na banhū bagehu dūhū, ūkikala kwenūko, ūbiza ihanga itaale lya nguzu na lya banhū bingī.

⁶Alīyo a Bamisili bakatūluhya no, būtwītīla mihayo mingī ya kūminya, būtūtūmamya milīmo midito no.

⁷Aho twanīlīīla ū SEEBA, ū Mulungu wa bakūlūgenji bise, ū SEEBA ūtwigwa ū kūlīla kwise, ūgabona na a makoye gise nū būluhi, pyī nū wiboneelwa wise.

⁸Na lūūlū ū SEEBA ūgoloola nkono gwakwe gwa būdūla, ūtūfunya ū mu sī ya Misili na lyogohya itaale na shimanīkījo sha kūkumya, na mihayo ya kūdedebaja;

⁹ūtwenha ū kwipandī īlī, ūtwinha ī sī yenīyī; sī ya būhondo.

¹⁰Na lūūlū ī haha nenha a matwajo ga kwandya ga mu sī īyo bebe SEEBA waninha.” Hanuma ūkūshitūūla ī shigabbu kū būtongi bo ng'wa SEEBA Mulungu wako, hūna winama kū būtongi wakwe.

¹¹Ū bebe nū Nawī hamò nū ngeni ūyo akikalaga nang'ho, mukūshiyegela ī shizeeze shose īsho alīkwinha ū SEEBA Mulungu wako, hamò nī kaya yako.

¹²Ūlū ūmala kūtūūla ha mhelo pyī ī zaka ya matwajo gose a ga mu ng'waka gwa kadatū, ūyo gūlī ng'waka gwa zaka, ī zaka yenīyo ūkūng'winha Nawī, na ngeni, nū yūyo atī na bakwe hamò na nchīlwa; nabo balye ū mu mizengo yako bigūte.

¹³Hanuma ya henaho ūkūng'wīla ū SEEBA Mulungu wako, “Ū ngabo ng'wela nagwīnjaga ū mu ng'wane, nang'winhaga Nawī na ngeni, nū yūyo wamala bakwe, hamò na nchīlwa, kūlenganīla nī shilagīlo shako ī shose. Natagalūkile gīkī nashileke ī shilagīlo shako, nūūlū natashībile na hado yaya.

¹⁴Nūūlū aho naalī ng'wikanza lya būpīna nataliile shose shose kūfuma ū mu ngabo gwa shikolo ī sheela. Nūūlū aho nalī mu shikū ja būsoso natagemile kūkuumya shose shose ū mu shikolo shenīsho; nūūlū natashifunije shimò shaho kūlwa nguno ya bafu. Naabizile ng'wigwi ū kūlī SEEBA Mulungu wane, nīītile pyī ī yose gīt'ūmo wanilagīīlīla.

¹⁵Bebe ūyo ūlī ng'wigūlū, lolaga ū kūfuma ū kū wikalo wako wela, ūbīīlūkīle a banhū bako a Baisilaeli, nī sī īyo watwinha, ī sī ya būhondo ī ya kūsūlūka būkī na mabeele, kūlenganīla nū kwisagīja kwako gīt'ūmo ūkabilahīlīla bakūlūgenji bise.”

¹⁶Na lūūlū, ū SEEBA Mulungu wako alīkūlagīla ī lelo īyī kūshimīzīla ū mu malange nī shilagīlo shenīshi; ilang'hanage ūshidime na ng'holò yako yose, na būpanga wako bose.

¹⁷Ī lelo īyī wahabūlaga na nomo gwako gīkī ū SEEBA alī Mulungu wako, na gīkī ūkūshimīzīla ū mu nzīla jakwe na kūgadima a malange gakwe na a kahelele kakwe, nī shilagīlo shakwe; na gīkī ūkūbiza ng'wigwi ū kūlī we.

¹⁸Ī lelo yenīyī ū SEEBA nang'hwe wahayaga hape gīkī mulī banhū bakwe ba wikomangīle, gīt'ūmo kūlī kwisagīja kwakwe, na gīkī īkūng'wigeleelwa kūshidima pyī ī shilagīlo shakwe.

¹⁹Wahayaga gīkī akūng'wīta mubize ba kūkumīlījiwa na ba lūkumo lwawiza n'ikūjo, kūtinda pye a mahanga ga banhū abo wababeeja, na gīkī mukūbiza banhū beela kūlwa ng'wa SEEBA Mulungu wing'we, gīt'ūmo kūlī kwisagīja kwakwe.