Read Sukuma Bible 2015 – Bibilia Ilagano Lya Kale 2015 Kūshokeela 28 Bible Online

Kūshokeela 28 - Sukuma Bible 2015 – Bibilia Ilagano Lya Kale 2015 bible

Kūshokeela 28

¹Ūlū ūliigwa mu wishigwa ī lilaka lya ng'wa SEEBA Mulungu wako, ūbiza nshikanu nū mu kūshimīzīla mu shilagīlo shakwe īsho nalīkūlagīla lelo īyī, ū SEEBA Mulungu wako akūkūgūngūhya higūlya ya mahanga gose ayo galī mu sī.

²Nīyo ūlū ūliigwa ī lilaka lya ng'wa SEEBA Mulungu wako, ī jose īji jikūkwidīkīla, jikookalīīle.

³Ūkūbiza na ū mu mizengo yako, nū kū malaale.

⁴Ī nda yako ya būbyīle īkūbiza na mbango, na matwajo ga mu migūnda yako, pye nī mbyalwa ja mu madaale gako, ī ndama ja ng'ombe jako na a baana ba ng'holo jako.

⁵Ī shigabbu shako shikūbiza na mbango, nī shiseme shako ī sha kūzugīla.

⁶Ūkūbiza na ūlū ūlī mu kaya, n'ūkūbiza na nūūlū ūlī hanze.

⁷A banishi bako abo balize kwilwisha nang'ho mu būlūgū ūkūbapyena, ū SEEBA akūbatūūla mu makono gako. Bakwiza ū kūkūūbūkīla balī hamò kūfuma ipandī līmò, alīyo bakūkūpeela babbalasanile kūja hose hose.[21]

⁸Ū SEEBA akūtūūla ū mu maluuli gako, nū mu milīmo yako yose īyo ūkwītūmama na makono gako. Ū SEEBA Mulungu wako akūkwīlūkīla ū mu sī īyo alīkwinha.

⁹Ūlū ūshidima ī shilagīlo sha ng'wa SEEBA Mulungu wako, na kūshimīzīla mu nzīla jakwe, akūkwīta ūbize ihanga lya banhū bakwe beela, gīt'ūmo wakwilahīlīla.

¹⁰Ū mu gīko pye a banhū ba mu sī bakwībona ī nguno ya kūkwenheleja witanīlwe kū lina lya ng'wa SEEBA; na lūūlū bakūkogoha.

¹¹Ū SEEBA akūkwinha ū mu sī īyo wabilahīlīla bakūlūgenji bako gīkī akūkwinha. Akūgīīlūkīla a matwajo gako ga nda ya būbyīle, nī mitugo jako, na a matwajo ga mu malaale gako.

¹²Ū SEEBA akūlīlugūla ī ligūlū, ī libīkīlo lya shawiza shakwe, ūyūpandīka mbula ū mu sī yako mu makanza ayo gigeleelilwe, akūkwinha nū mu milīmo yose ya makono gako. Mahanga mingī gakūyūlanda kūfuma ū kūlī bebe, alīyo ū bebe ūtīko kūlanda kūlī ose ose.

¹³Ū SEEBA akūkwīta ūbize ntwe, ūtūbiza nkīla na hado yaya. Ūlū ūshidīlīla ī shilagīlo sha ng'wa SEEBA Mulungu wako īsho nalīkwinha ī lelo īyī, kūshimiizīla musho mu welwa ng'holò, ūkūbiza higūlya gwa, ūtiika na hado yaya.

¹⁴Na lūlū ūtizūgema kūgalūka ūshileke ī shilagīlo īsho nalīkwinha lelo; yaya ū kūbiza na mbyūla miso ya kūlola ūko na ūko, kūlondeela bamulungu bangī na kūbatūmamīla.

¹⁵Alīyo ūlū ūleka ū kūbiza ng'wigwi ū kūlī SEEBA Mulungu wako, ūleka ū kūshilondeela mu welwa ng'holò pyī ī shilagīlo shakwe na a malange gakwe, ayo nalīkwinha lelo īyī, a mazumo gose aya gakūkwidīkīla, gakookalīīle:

¹⁶Ūkūzung'wa ū mu mizengo yako, nū kū malaale gako.

¹⁷Ī nda yako ya būbyīle īkūzung'wa, na a matwajo ga mu migūnda yako, pye nī mbyalwa ja mu madaale gako, ī ndama ja ng'ombe jako na a baana ba ng'holo jako.

¹⁸Ī shigabbu shako shikūzung'wa, nī shiseme shako ī sha kūzugīla.

¹⁹Ūkūzung'wa ūlū ūlī mu kaya, nūūlū ūlī hanze ūkūbiza ūzumilwe.

²⁰Ū SEEBA akūkūtūmīla mazumo na būlemeelwa, na būdalahwa ū mu yose īyo ūkūgema kwīta; ūkūhayimanīla wakenaagūka ūshila ho gete, nguno ya būhūbi ūbo ūlawīte kūlwa kūnileka.

²¹Ū SEEBA akūkūtūla na mahūūya na mabūsaatu kūshisha akūkenaagūle gete, ūshile ū mu sī īyo ūjile kwīdima.

²²Ū SEEBA akūkūtūmīla na mabūsaatu gatī ga kūpīla, na miswiza na mabimbà; na būsebu būtaale bo līīmi, na būgaya mbula, na lūguukule,[22] na lūgogà; ī shose shenīshi shikūkūkūūbīlīja kūshisha ūshile gete.

²³Ī ligūlū īlo līlī higūlya yako līkūbiza ibbaadi, ī sī yako nayo īkūbiza chūūma.

²⁴Ū SEEBA akwīgalūcha ī mbula ya mu sī yako ībize lūbuubu na būfuufu; a genayo gakūyidīka kūfuma ū kwilunde, kūshisha ūyagaale gete.

²⁵Ū SEEBA akūkwīta ūbize mpyenwa ū kū banishi bako. Ū ng'wikanza lya kūja kwilwisha būlūgū nabo ūkūbizīīla kūfuma ipandī līmò, alīyo bakūkūpeeja ūbbalasane kūja hose hose.[23] Hama ūkūbiza shiilolelo sha kūkamaaja hose pyī ū mu mahanga ga mu sī.

²⁶Ī mibimba ya banhū bako īkūbiza shilīwa sha noni jose ī ja kūlala, nī shiinū pyī ī ja mu makūngū; nīyo atigela nūūlū ūmò wa kūjilecha.

²⁷Ū SEEBA akūkūtūla na mabute gītī ga Misili, na mabaale, mabūhele, na mabūbabū gabūbi; mabūsaatu ayo ūtūdūla kūpīla.

²⁸Ū SEEBA akūkūtūmīla makoye ga lūsalo, na būbboku, na kūhuugana maganiko.

²⁹Ūkūbiza wa kūja ūkūbbabbasha bbabbashaga nūūlū makanza ga līīmi, gītī mu giiti sha nyaboku. Būlī mhayo ūyo ūlaagwīte gūtūbiza na matwajo gose gose; hama būlī makanza ūkūbiza wa kwiboneelwa na kūtaagījiwa shikolo, alīyo atigela wa kūkūgunanha.

³⁰Nūūlū ūlūnja nkīma ūtūntoola, nguno munhū ūngī akūkwiboneela ansole alaale nang'hwe. Nūūlū numba ūkūzenga, alīyo ūtikala mo; ngūnda gwa mizabibu ūkūlīma, alīyo ūtūgalya a matwajo gaamo.

³¹Nī ng'ombe jako jikūyūsīnzwa ūlolile, alīyo ūtīlya nūūlū īmò yajo; nī nzobe jako jikūyūsolwa bo nguzu yaya ū kūshokejiwa. Ī ng'holo jako bakwinhwa banishi, na atilonga wa kūkūgunanha.

³²Bitūnja bako na bashīke bako bakūtwalwa kwihanga līngī, ū bebe ūkūlekwa ūlolile kūshisha ūminyiwe ng'hūmbū, alīyo ūtūbiza na gwa kwīta.

³³Ihanga lya banhū abo ūtabamanile bakūgalya a matwajo ga mu sī yako, ayo ūkūganoga nogelaga na nkono gwako; nīyo ūkūbiza wa kūluha na kwiboneelwa sagala dūhū pyī ī shikū jako.

³⁴Ī mihayo īyo ūkwikala ūkwībonaga būlī makanza ntondo na ntodo, nose īkūgahūūganya a miso gako.

³⁵Ū SEEBA akūkūtūla na būsaatu wa mabute gabūbi no ū kū mazwi na magūlū gako; gakūbiza masaatu no gatī ga kūpīla, na gakūgūsambaalīla pyī ū mīlī kwandīja kū mhambala kūshisha kū londooji.

³⁶Ū SEEBA akūkūtwala ū bebe nū ntemi wako ūyo ūlantūūle, kwihanga īlo ūtalīmanile na hado yaya, pyī na a bakūlūgenji bako baalī batalīmanile. Ū kwenūko ūkūbiza namya wa bamulungu bangī, bamulungu ba mantī na ba mawe.

³⁷Ūkūbiza shiilolelo sha kūkamaaja, na ndalahwa wa kwikala ūkwanīīlagwa hose pyī ū kū mahanga ayo SEEBA alakūponye.

³⁸Ūkūhamba mbīyū ningī ū mu migūnda yako, alīyo ī shilīwa ūkūgesa shigehu no, nguno shikūlyiwa njige.

³⁹Ūkūlīma migūnda na kwīhamba mizabibu, alīyo ūtūng'wa ī divai, nūūlū ūtūgahūlūla a matwajo gayo; nguno īkūlyiwa magino.

⁴⁰Ūkūbiza na mitī mingī ya mizeituni pye a hose ū mu sī yako, alīyo ūtūgatūmamīla a maguta gayo, nguno a matwajo gakūyūholoosha.

⁴¹Ūkūbiza na bitūnja hamò na bashīke, alīyo ūtikala nabo, nguno bakūding'wa batwalwe mu būsese.

⁴²Ī mitī ya mu sī yako īkwikīīlwa būhī na būhī wa njige, pyī nī shilīwa ū mu malaale gako.

⁴³Ū ngeni ūyo akwikala hamò nang'ho ū mu sī yako akūbiza higūlya, alīyo ū bebe ūkongeja kwika sīlīlī būl'ikanza.

⁴⁴Ūkūlanda shikolo ū kūlī we, alīyo ū bebe ūtūbiza na shikolo sha kūkūlanda ū wei. Ū wei akūbiza ntwe, ū bebe ūkūbiza nkīla.

⁴⁵A mazumo a gose aya gakūkwidīkīla gakookalīīle, kūshisha gakūkenaagūle gete, nguno ya kūlema kūlyigwa ī lilaka lya ng'wa SEEBA Mulungu wako, nū kūlemeelwa ū kūshidima ī shilagīlo shakwe, na a malange gakwe ayo wakwinha.

⁴⁶Gakūbiza shimanīkījo na mihayo ya kūkumya ū kūlī bebe, nū kū shibyalīlwe shako welelo bose.

⁴⁷Nguno ū ng'wikanza lyako lya būsabi, ūtantūmamīlile ū SEEBA Mulungu wako mu būyegi na kūsangabala.

⁴⁸Na lūūlū ūkūgatūmamīla a mahanga ga banishi bako ayo alīkūtūmīla ū SEEBA; nīyo ūkūtūmama mu makoye ga būtuubu, notà, būzuuka, na būkuuneese būtaale. Akūkūtunga ijoki lya chūūma ū mu nhingo yako, kūshisha akūmale gete.

⁴⁹Ū SEEBA akwenha ihanga lya kūkūdumīla, īlo ūtīko kūlūmana ū lūlīmi lwalyo; līkūfuma kūle kūfuma kū ngelelo ya sī. Līkwiza likwelemaga gītī mbeeshi īkwikaga hasī.

⁵⁰Līl'ihanga lya banhū ba būshū wa makanji ū kūbūlola; ī lyoi lītadīlīlaga banamhala na bagikūlū, hama lītabasaatagwa na a bado bado nūūlū na hado yaya.

⁵¹A banhū benabo bakūjilya pyī ī mitugo jako, na a matwajo ga mu sī yako, kūshisha ūkenaagūke. Batūkūlekela shilīwa nūūlū hado, pyī nī divai na a maguta; batūkūlekela nūūlū ndama ja mu madaale gako, nūūlū baana ba ng'holo, kūshisha ūshile ho gete.

⁵²Pyī ī mizengo īyo wīsanije mu sī yako, īkī īgītīlījiwe ndugu ndīhu ū kūja ū ng'wigūlya, bakwīpīndīlīja mabità ga bashilikale kūshisha īgwe hasī pye. Bakwīpīndya na mabità ga bashilikale ī mizengo ī yose, ū mu sī īyo SEEBA Mulungu wako alīkwinha.

⁵³Kūlwa kaluhīle kataale ū ng'wikanza lya kūpīndiwa na a mabità genayo, ūkūgalya nose na a matwajo ga būbyīle wako; ūkūlya nyama ja bitūnja na bashīke bako, abo SEEBA Mulungu wako akūkwinha.

⁵⁴Nū munhū ū mpolo gete na ng'wiza ng'holò ū mu bing'we akūng'wima nūūlū ng'wanong'wawe, pyī nūūlū nke ūyo antogilwe, nūūlū a baana bakwe abo bataalī bapanga.

⁵⁵Akūbahuhuma pye a benabo ī nyama ya bana abo wababūlagaga, nguno shikūbiza h'ī shenīsho dūhū īsho wasaajaga, kūlwa būluhi ūbo būkūkūgwīla ū ng'wikanza lya mizengo yako kūpīndīlījiwa na banishi bako.

⁵⁶Nū nkīma ū mpolo gete na ng'wiza ng'holò ū mu bing'we, ūyo būpolo na wiza ng'holò wakwe būkīlanīgije kagemeelelwe, nang'hwe akūng'huhuma ū ngoshi nūūlū akabiza antogilwe na kinehe; nīyo akūng'huhuma nūūlū ng'witūnja wakwe, pyī nūūūlū ū nshīke wakwe.

⁵⁷Akūlībisa ī liheeki lya kūfuma mu nda yakwe, na a beelele abo alabyale; nguno alī n'iganiko lya kūbalya mu mbisīla, ū ng'wikanza lya banishi bako kūkūgwisīja būluhi, kūlwa kwīpīndya na mabità gabo ī mizengo yako.

⁵⁸Ūlū ūleka kwīlondeela mu welwa ng'holò pyī ī mihayo ya shilagīlo shenīshi īyo yandīkilwe ū mu shitabo īshi, ūleka kūlīkūja ī lina ī lyawiza na lya magaka no no no, ī lya ng'wa SEEBA Muluangu wako,

⁵⁹ū SEEBA akūkūtūmīla mahūūya ga kogohya no ū bebe nī shibyalīlwe shako; mabūkenaagūji gabūbi na gakūshinga ho myaka mingī, na mabūsaatu ga kūkamaaja ayo gatī gakūpīla wangū.

⁶⁰A mabūsaatu ga Misili pye ayo walī ūgogohile, akūkwenhela gakūdamīīle.

⁶¹Nīyo ū SEEBA akūkwenhela mabūsaatu na gangī gatandīkilwe nū mu shitabo sha shilagīlo īshi, hamò na mahuuya; kūshisha ūshile ho gete.

⁶²A bing'we abo ng'walī bingī gītī sonda ja ng'wigūlū, mukūsaaga bageehu no ī lisaabu ling'we, nguno ya kūlema kūng'wigwa ū SEEBA Mulungu wing'we.

⁶³Ūmo walī ayegelile ū SEEBA kūng'wītīla yawiza, na kūng'wīta mubize bingī, nū kūmukenaagūla na kūmuyagaja akūyega gīko. Managi mukūdubbūlwa ng'wīnjiwe ū mu sī īyo mulīja kwīdima.

⁶⁴Hūna ū SEEBA akūkūsalang'hanya kūja hose pyī pyī pyī ū mu mahanga; kūfuma wandījo wa sī kūshisha kū būkalīkījo wayo. Ū kwenūko ūkūbiza namya wa bamulungu bangī, bamulungu ba mantī na ba mawe, abo ūtabamanile ū bebe, nūūlū a babyaji bako.

⁶⁵Ūtūdūla ū kūlembeela ū kū mahanga genayo, nīyo ūtūpandīka nūūlū ha kūtūūla lūpambala lwako gīkī wifuule. Ū ng'wikanza lya kūbiza kwenūko, ū SEEBA akūkwinha maganiko gatī ga kūlembeela na miso galyūngūmile, na kūgwa ng'holò.

⁶⁶Ūkūbiza munhū wa kwikala ūkwibakīlaga na kūtawatawa pye a makanza līīmi na būjikū, nguno ūtūdūla ū kwīmana īyo īkūkwilongela ū mu būpanga wako.

⁶⁷A makanza ga dilū ūkūyūhaya, “Hambū hambū ūlū ni mhīndī ī haha!” Ūlū lyūbiza lya mhīndī nahene ūkūhaya, “Hambū hambū ūlū ni dilū ī haha!” Ī yenīyo ūkwīhaya kūlwa nguno ya boobà ūbo ūkūyikala nabo ū mu ng'holò yako, nī mihayo īyo ūkwībona na miso gako.

⁶⁸Ū SEEBA akūmushosha Misili mu meeli, ū lūgendo ūlo nakakūwīla gīkī ūtigeleelilwe kūlūbūūcha hangī. Ū kwenūko mukwijinja kū banishi bing'we gīkī mubize nūūlū basese bagosha na bakīma; alīyo atilonga ū wa kūmugūla.