Read Sukuma Bible 2015 – Bibilia Ilagano Lya Kale 2015 Kūshokeela 3 Bible Online

Kūshokeela 3 - Sukuma Bible 2015 – Bibilia Ilagano Lya Kale 2015 bible

Kūshokeela 3

¹Hanuma twīnga a henaho; tūshimīza kūbīta ng'wikūūwa tūjile Bashani. Ntemi Ogi wa Bashani ūtūsūng'wanhīla Edilei na ibità lyakwe kwiza kwamba būlūgū kūlwa nise.

²Ū SEEBA ūniwīla, “Yaya ū kūng'ogoha, nguno nantūūlaga mu makono gako nī libità lyakwe pyī ī lyose hamò nī sī yakwe. Nang'hwe ng'wītīlage ūmo wang'wītīlile ntemi wa Baamoli ū Sihoni, ūyo walikalaga Heshiboni.”

³Na ng'hana ū SEEBA Mulungu wise, ūntūūla mu makono gise nū Ogi ū ntemi wa Bashani, hamò nī libità lyakwe. Tūūbatūla būshila pye; tūtabalekelile nūūlū wa mbīyū.

⁴Ī likanza lyenīlo twīdima pyī ī mizengo yakwe, tūtalekeelile nzengo nūūlū gūmò ū mu mizengo makūmi atandatū ya mu sī ya Oligobi ya Bashani, īyo yalī ha sīlīlī ya būsugi wakwe ū Ogi.

⁵Ī mizengo ī yose yenīyī yalī īpīndīlījiwe ndugu ndīhu, yūtūūlīlwa na mibita ya kūlugalwa; na magūngūli gangī mingī gaalīho, ayo gaalī gatapīndīlījiwe ndugu.

⁶Tūkagakenaagūla pye, gīt'ūmo twalī twītīla kū ng'wa Sihoni ū ntemi wa Heshiboni; tūūbabūlaga pye a banhū ba mu mizengo, bagosha, bakīma, na a banīgīnī.

⁷Alīyo ī mitugo nī shikolo īsho tūkasola mu mizengo, ī shene tūshijana shūbiza shise.

⁸Na lūūlū ū kūfuma ū kū batemi babīlī benaba a ba Baamoli, tūbiza twīdima ī sī ya kū nkīlo gwa kīya ya mongo gwa Yolodani, kwandīja kū mongo gwa Alinoni kūshisha kū lūgūlū lwa Helimoni.

⁹(A bana Sidoni ī Helimoni bayitanaga Silioni; lelo a Baamoli bene bayitana Senili.)

¹⁰Pyī ī mizengo ya ngūlya gwenūyo twīdima, nī Gileadi ī yose, nī Bashani ī yose kūshisha tūūshika Saleka na Edilei. Pyī ī yenīyī yalī mizengo ya mu Bashani, sī īyo walī ayīsugile Ogi.

¹¹(Ū Ogi ū ntemi wa Bashani walī wasaaga wei iyene ū mu banhū ba shibyalīlwe sha Balefai. Ū būlīīlī wakwe walī wa chūūma, wa būlīhu wa kūkīla ha fuuti ikūmi na idatū, ū būgalī galī wabo walī fuuti itandatū. Nī lelo īyī būtaalī būlīko ū kū nzengo gwa Laba ya Baamoni.)

¹²Ī sī īyo tūkīdima mu shikū jenījo, nakabinha ba lūganda lwa Lubeni na lwa ng'wa Gadi ī lipandī lya sukuma ya Aloeli, kūūko na mongo gwa Alinoni; nūūbatīnīla na ibudīka lya mu sī ya magūlya ga Gileadi hamò nī mizengo yamo.

¹³Ī Gileadi pyī īyo īkasaaga nī Bashani ī yose īyo yalī ha sīlīlī ya būsugibo ng'wa Ogi, hū kūhaya pyī ī Oligobi, nīgaba kū nusu ya banhū ba lūganda lwa Manase. (Pyī ī lipandī lya Bashani yenīyo ī kwandya lyalī līmanīkile gīkī sī ya Balefai.)

¹⁴Ngosha witanagwa Yaili, wa mu lūganda lwa Manase akīdima pyī ī sī ya Aligobi, ūūkakandya kū lūbīmbī lwa sī ya Geshuli na ya Maaka. Aho walīdima ī lipandī lyenīyo ūlīgalūcha ī lina; lyūbiza Havoti-yaili kūlwa kūng'wizūkwa wei.

¹⁵Ī Gileadi ī yene nakabinha ba mpanda go ng'wa Makili.

¹⁶Alīyo a ba lūganda lwa Lubeni nū lwa ng'wa Gadi, a bene nakabinha ī sī īyo yandīgije Gileadi yūtulumenha kūshisha kū mongo gwa Alinoni (ū lūbīmbī lūbiza a ha gatī gatī ya mongo); ū kū lwandī ū lūngī būūkashika kū lūbīmbī lwa Baamoni, kū mongo gwa Yaboki.

¹⁷Ū lūbīmbī lwa sī yabo ū kū ng'weli gwalī mongo gwa Yolodani kū sī ya Alaba; kwandīja Kineleti ū kū nyanza ya Alaba yenīkīlī (Nyanza ya Munhu), kū sīlīlī ya lūgūlū lwa Pisiga.

¹⁸Ī likanza lyenīlo nūmukomeleja nalīmuwīla, “Ū SEEBA Mulungu wing'we wang'winhile ī sī yenīyī ng'wīsole ībize ying'we. Alīyo pye a bagosha ba nguzu abo balīmo ū mu bing'we shibigelelile basole shilanga, bakīle hamò na a badūgū bing'we a Baisilaeli bakabagunanhe.

¹⁹Kwike a bake bing'we na a bana bing'we bakwikala ū mu mizengo īyo nang'winhile, hamò nī mitugo jing'we (nguno namanile mulī na mitugo ningī);

²⁰kūshisha ū SEEBA abinhe kwifuula nabo gīt'ūmo wang'winhīlile a bing'we. Nabo babize bīsola ī sī īyo SEEBA Mulungu wing'we alībinha ū kū nkīlo gwa Yolodani, hūna a hanuma ya henaho būlī ūmò akūja ū kū wingīji bokwe ūbo naamugabīlile.”

²¹Ū mu shikū jenījo nūnkomeleja ū Yoshwa ū ng'witūnja o ng'wa Nuni nalīng'wīla, “Wībonile na miso gako pyī īyo wabīītīlile ū SEEBA a batemi benaba būbīlī wabo. Ū SEEBA akūgīītīla gīko na a mabūtemi a gangī pye ūko mulīja.

²²Mutizūbogoha, nguno ū SEEBA Mulungu wing'we wei ng'wenekīlī akūmulwīlīīla.”

²³Ū ng'wikanza lyenīlo nūng'wibūūlīla ū SEEBA nalīhaya,

²⁴“SEEBA Mulungu, ī haha wandyaga kūng'oolekeja ū ntūmami wako a magaka gako nū nkono gwako ū gwa būdūla. Nguno alīho Mulungu kī ū ng'wigūlū nūūlū ū mu sī, ūyo adūgije kwīta milīmo mitaale na shītwa sha kūlenganīla nī shisho ūkwītaga bebe?

²⁵Ni wanizunīlīja nane naje nakībone ī sī yawiza īyo īlīko ū kū nkīlo gwa Yolodani, ī sī ya magūlya yenīyo, nī Lebanoni!”

²⁶Alīyo kūlwa nguno ying'we, ū SEEBA walī wanipelanīla; na lūūlū atanizunīlīgije gete. Ū SEEBA ūniwīla, “Bebe huumūlaga wigegije lūūlū, natatogilwe kwigwa ūlīnilomba hangī ū mhayo gwenūyū!

²⁷Jaaga ūkalinhe kū lūgūlū lwa Pisiga ūlole pye pye pye, ī ng'weli nī sukuma nī dakama nī kīya; wībone na miso gako ī sī, nguno ūtūgūkīlaga ū mongo gwa Yolodani gwenūyū.

²⁸Alīyo nkomelejage ū Yoshwa, ūntimbye ng'holò na kūnguzuhya, nguno hū ng'wene ūyo akūbatongeela a banhū benaba ū kūgūkīla ū mongo, baje bakīdime ī sī īyo ūkwībona na miso gako.”

²⁹Na lūūlū twikala ng'wilago lya bbihī na Beti-peoli.