Read Sukuma Bible 2015 – Bibilia Ilagano Lya Kale 2015 Kūshokeela 30 Bible Online

Kūshokeela 30 - Sukuma Bible 2015 – Bibilia Ilagano Lya Kale 2015 bible

Kūshokeela 30

¹Ī mihayo yose yenīyī, ī na mazumo īyo nīyoolecha hape kū būtongi wako, ūlū yūkwizīīla nang'ho wīyideedeng'hanya chiza ū mu ng'holò yako, hose hose ū kū mahanga ayo alakūponye ū SEEBA,

²hūna ūngalūkīla SEEBA Mulungu wako ū bebe na a baana bako, ūzunya kūng'wigwa na ng'holò yako yose na būpanga wako bose, kūlenganīla nī yose īyo nalīkūlagīla ī lelo īyī,

³a henaho ū SEEBA Mulungu wako akūbūgalūcha ū būding'wa wako, akūchīle shigongo, akūkuminge hangī kūfuma ū kū mahanga ūko walī wabasambaagīja a banhū bako.

⁴Nūūlū walī waponyiwa kū sī ya kūle kūtinda jose ījo jilī ha sīlīlī yigūlū, nū kwenūko ū SEEBA Mulungu wako akūkwīnja ko akūshoshe.

⁵Akūkwenha hangī ū kū sī īyo yalī ya bakūlūgenji bako, nang'ho ūkwīdima hangī. Hanuma akūkwīta wīlūkīlwe no no no, ūkwīle kūtinda ūmo baalī bakūlūgenji bako.

⁶Ū SEEBA Mulungu wako akūyīngīja ū būsoso[24] ī ng'holò yako, nī ng'holò ja banhū ba shibyalīlwe shako, ūdūle ū kūntogwa na ng'holò yako yose, na būpanga wako bose; ūbize mpanga.

⁷Pye a mazumo genaya ū SEEBA Mulungu wako akūbaponegeja a banishi bako abo bakakūluhyaga kūlwa kūleka kūkūtogwa.

⁸A henaho lūūlū ūkwandya hangī kūbiza ūlī ng'wigwi ū kūlī SEEBA Mulungu wako, na kūshilondeela ī shilagīlo īsho nalīkwinha lelo.

⁹Hūna ū SEEBA Mulungu wako akūkwīta wīlūkīlwe no no no ū mu milīmo yose ya makono gako, nū mu matwajo ga būbyīle wa nda yako, nī mitugo jako na a matwajo ga mu malaale gako. Ū SEEBA akūkūyegela hangī, akwīte kūbiza na ningī, gīt'ūmo walī abayegelile bakūlūgenji bako.

¹⁰Shitange dūhū ū bebe ūng'wigwe ū SEEBA Mulungu wako, ūshidime nī shilagīlo shakwe na a malange gakwe ayo gandīkilwe ū mu shitabo sha shilagīlo īshi, hūna ūngalūkīla ū SEEBA Mulungu wako na ng'holò yako yose na būpanga wako bose.

¹¹Na lūūlū īyo nalīkūlagīla lelo ītī milambu no, nūūlū ītī kūle no gīkī hamo ūtūdūla kwīshikīja.

¹²Ītī ng'wigūlū nose wibūje, “Nani akūlinha ū ng'wigūlū akatwenhele ize atūlange nise twīzunye?”

¹³Nūūlū ītī kū būkīlo wa nyanza nose wibūje, “Nani akūkīla nyanza akatwenhela ize atūlange nise twīzunye?”

¹⁴Ītī gīko na hado yaya, ū mhayo gūlī hihī no nang'ho, gūlī mu ng'holò yako na mu moyo gwako, hū kūhaya ūdūgije ū kūgwīta.

¹⁵Managa gīkī ī lelo yenīyī naakūtūūlīlaga kū būtongi wako būpanga na wiza, kūcha na būbi.

¹⁶Nguno ī lelo nalīkūlagīla kūntogwa ū SEEBA Mulungu wako, na kūshimīzīla mu nzīla jakwe na mu katongeelele kakwe na mu malange gakwe, nū mu shilagīlo shakwe. Ūlū wīta gīko ūkūlama, na ūkwiyongeja. Nang'hwe ū SEEBA Mulungu wako hū akūkwinha ū mu sī īyo ūlīja kwīdima.

¹⁷Alīyo ī ng'holò yako ūlū yūgalūka ūlema gete ū kwigwa, ūdutwa kūlondeela bamulungu bangī kūjūbalamya na kūbatūmamīla,

¹⁸Ī lelo yenīyī nalīmumanya hape gīkī mukūyagaala gete. Mutīko ū kūlama ū mu sī īyo mulīkīla mongo gwa Yolodani kūja kwīdima.

¹⁹Ī lelo īyī nalīng'wilahīlīla kū būtongi w'igūlū na sī, gīkī naamutūūlīlaga kū būtongi win'gwe būpanga na kūcha, na mazumo. Alilūūlū, solaga būpanga ūdūle kūlama ū bebe ng'wenekīlī na a baana bako,

²⁰ūdūle nū kūntogwa ū SEEBA Mulungu wako, nī lilaka lyakwe ūdūle kūliigwa; ūdimane nang'hwe mu ng'hana. Nguno ū SEEBA hū ng'wene ūyo alī būpanga wako, akūkwinha myaka mingī ī ya kwikala ū mu sī īyo wabilahīlīla bakūlūgenji bako, ba Abulahamu, Isaka na Yakobo.