Read Sukuma Bible 2015 – Bibilia Ilagano Lya Kale 2015 Kūshokeela 31 Bible Online

Kūshokeela 31 - Sukuma Bible 2015 – Bibilia Ilagano Lya Kale 2015 bible

Kūshokeela 31

¹Hūna ū Musa ūfuma hanze, ūbawīla a Baisilaeli a bose ī mihayo īyī.

²Ūhaya, “Ī haha nalī na myaka igana na makūmi abīlī, natūdūla ū kongeja kūmutongeela. Nguno nīyo nū SEEBA waniwīlile gīkī, ‘Ū bebe yaya ū kūgūkīla ū mongo gwa Yolodani.’

³Ū SEEBA Mulungu wako akūkīla hamò nang'ho, atonge ko; aje ū kū būtongi wako akūgakenaagūlaga a mahanga genaya. Hūna ū bebe ūkwīsola ī sī yabo; nū Yoshwa akūkīla hamò nang'ho kūkūtongeela gīt'ūmo SEEBA wahayīlile.

⁴Nīyo a banhū benabo, ū SEEBA akūbīītīla gīt'ūmo akabīītīla ba Sihoni na Ogi, a batemi ba Baamoli, abo akabakenaagūla hamò nī sī jabo.

⁵Ū SEEBA akūbatūūla mu makono ging'we, na lūūlū shiigelile mubīītīle gīt'ūmo naamulagīīlīlile.

⁶Ipandagi chanda mubize bashisha ng'holò, yaya ū kūbogoha a benabo, nūūlū batizūmudetemya, nguno ū SEEBA Mulungu wing'we alīja hamò ning'we, atūmulekanīja nūūlū atūng'wība yaya.”

⁷Hūna ū Musa ūng'witana ū Yoshwa ūng'wīla mu būtongi wa Baisilaeli bose, “Ipandage chanda, hangī ūbize nshisha ng'holò, nguno shikwigeleelilwe ūje nabo a banhū benaba mushike ū mu sī īyo SEEBA wabilahīlīla bakūlūgenji babo kūbinha. Ūkūbagabanhya būlī bene bapandīke wingīji wabo.

⁸Ū SEEBA alītonga ko wei ng'wenekīlī, na akūbiza hamò ning'we koi; atūmuleka nūūlū atūng'wība. Yaya ū kogoha, nū kūsusanya yaya.”

⁹Hūna ū Musa ūshandīka ī shilagīlo īshi, ūbina bagabīji, a ba lūganda lwa Lawī, abo baalī babūūcha b'isandīko ly'ilagane lya ng'wa SEEBA; na a banamhala a bose a ba Baisilaeli ūbinha.

¹⁰Hanuma ū Musa ūbalagīla alīhaya, “Būlī myaka mpungatī ūlū yūshika ha būkalīkījo, ū mu ng'waka gwa kūlekeja banhū būgasa wabo, ū ng'wikanza lya shigukulu sha maduku,

¹¹Ī likanza īlo Baisilaeli bose bakizaga kwiyoolecha kū būtongi bo ng'wa SEEBA Mulungu wako kwipandī īlo wei ng'wenekīlī alalīsole, ūkūshisoma ī shilagīlo shenīshi ūlī kū būtongi wabo badegelekile.

¹²Ūkūbabilinga pye a banhū, bagosha, bakīma, na a banīgīnī, pyī nū ngeni ūyo akwikalaga hamò nang'ho ū mu mizengo yako; bize badegeleke, bilange kūnkūja ū SEEBA Mulungu wing'we, na kwīlondeela mu welwa ng'holò pyī ī mihayo ya shilagīlo shenīshi.

¹³A baana babo abo batashimanile ī shilagīlo, shibigelile kūdegeleka, bilange ū kūng'ogoha ū SEEBA Mulungu wing'we, ū mu shikū jing'we jose ī ja kwikala ū mu sī īyo mulīkīla mongo gwa Yolodani kūja kwīsola.”

¹⁴Hūna ū SEEBA ūng'wīla ū Musa, “Ī likanza lyako lya kūcha lyashikaga, na lūūlū ng'wīlage ū Yoshwa ize hamò nū bebe ū ng'wiheema lya kwibilingīla, nize nanagīle milīmo ya kwīta.” Na ng'hana ū Musa nū Yoshwa biza ū ng'wiheema lya kwibilingīla.

¹⁵Ū SEEBA wiza a hiheema lya kwibilingīla, wiyoolecha mu nzīla ya ng'hīngī yilunde, lyīmīīla a ha nyango gwa kwingīlīla ū ng'wiheema.

¹⁶Ū SEEBA ūng'wīla ū Musa, “Lyashikaga ī likanza lyako ū bebe ī lya kūja kwifuula na bataale bako, alīyo a banhū benaba bakwandya kwisosohaja na bamulungu bageni, ū mu sī īyo balīja kwikala. Ū nene bakūnīība, balīkenaagūle nī lilagane īlo naabeeja nabo.”

¹⁷Alīyo ū lūshikū lwa kwīta mhayo gūlī gīko, bakūnisayīcha no nabalekanīje gete. Nakūbibisa bayagaale, nguno ū būshū wane batūbūbona. Mihayo mingī yabūbi na ya kūbakoya īkūbagwīla. Ū ng'wikanza lyenīlo bakwibūūja balīhaya, “Ī mihayo yabūbi yose yenīyī ītūūtūgwīlaga īkī ū SEEBA Mulungu wise atī hamò nise?

¹⁸Alīyo ū nene nakwibisa gete ū ng'wikanza lyenīlo; batūbūbona ū būshū bone, kūlwa nguno ya būhūbi wabo bose ūbo balawīte mu nzīla ya kūbagalūkīla bamulungu bangī.

¹⁹Alilūūlū, ī haha andīkaga līīlī lyīmbo lyako; ūbalange kūlyīmba a Baisilaeli, lībize būkaanīji wane kūbo kūlwa kūbakaanīla.

²⁰Nguno ūlū nūbashisha ū mu sī ya būhondo ī ya kūsūlūlūka būkī na mabeele, īyo naabisagīja bakūlūgenji babo mu kwilahīla, hūna būlya bigūta būgīna, bakūbagalūkīla bamulungu bangī bandye kūbalamya banidalahe ū nene, nī lilagane lyane balīkenaagūle.

²¹Na lūūlū ī mihayo yabūbi nī ya kūbakoya ūlū yūbagwīla, ī lyīmbo lyenīlī līkūbiza būkaanīji ū kūbo; nguno lītīīwa ū mu shibyalīlwe shabo. Ū nene nīmanile īyo bakwīyideedeng'hanyaga nūūlū aho nataalī ū kūbashisha ū mu sī īyo nabisagīja mu kwilahīla.”

²²Na ng'hana ū lūshikū lwenūlo ū Musa ūlyandīka ī lyīmbo īlī, ūbalanga a Baisilaeli.

²³Ū SEEBA ūnkomeleja ū Yoshwa ū ng'witūnja o ng'wa Nuni alīng'wīla, “Handatīlaga na hangī ūbize nshisha ng'holò. Nguno ū bebe hū ūkūbashisha a Baisilaeli ū mu sī īyo nabisagīja mu kwilahīla, nū nene ng'wenekīlī nakūbiza hamò nang'ho.”

²⁴Ū Musa aho wamala kūyandīka mu shitabo ī mihayo ya shilagīlo shenīshi, kūfuma wandījo wayo kūshisha kū būkalīkījo wayo,

²⁵ūbalagīla a Balawī, abo babūūchaga isandīko ly'ilagane lya ng'wa SEEBA. Ūbawīla gīkī,

²⁶“Shisolagi ī shitabo īshi, ī sha shilagīlo, mushitūūle shiihele nī lisandīko ly'ilagane lya ng'wa SEEBA Mulungu wing'we, shiikale henaho kūlwa būkaanīji kūlī bebe.

²⁷Nguno nabūmanile ū būshitiigwa wako nū būdimu bo ntwe gwako ūmo būlī. Īkī ī haha mulī bashitiigwa gīkī alīyo hū nataalī hamò ning'we; al'ūlū nalaache, angū mmho mukūkīlanīja no a hene!

²⁸Na lūūlū, ī haha babilingangi pye a banamhala ba ng'anda jing'we na a bagunanhi babo, baneegeele aha nīhayī ī mihayo yenīyī badegelekile; nabakaanīle kū būtongi wigūlū na sī.

²⁹Nguno namanile hape gīkī, ūlū nūcha mukwisosohaja no mugalūke ng'wīleke ī nzīla īyo naamulagīlile. A bing'we mukūgwīlwa mayanga mataale ū kū shikū ja kū būtongi, nguno mukwīta ya malofu ū kū būtongi bo ng'wa SEEBA, mumpelanye kūlwa milīmo īyo mukūyūbeeja na makono ging'we.”

³⁰Hūna ū Musa wīhaya ī mihayo ya lyīmbo īlī kū būtongi wa kwibilinga kwa Baisilaeli a bose, kūfuma kū wandījo walyo kūshisha kū būkalīkījo walyo.