Read Sukuma Bible 2015 – Bibilia Ilagano Lya Kale 2015 Kūshokeela 34 Bible Online

Kūshokeela 34 - Sukuma Bible 2015 – Bibilia Ilagano Lya Kale 2015 bible

Kūshokeela 34

¹Hūna ū Musa ūja kū lūgūlū lwa Nebo kūfuma ū kū mbūga ya Moabu, ūūkalinha kwigūlya ya lūgūlū lwa Pisiga, ūlo lwalī lwilolile na Yeliko ū kū ntambūko gwa mongo. Aho alī kwenūko ū SEEBA ūng'oolekeja pyī ī sī, kwandīja Gileadi kūja Dani;

²pye a mabbaala ga Nafutali, ī sī ya Efulaimu na Manase. Wībona pyī ī sī ya Yuda kūshisha kū nyanza ya ng'weli.

³Wībona nī Negevu nī sī ī yose kwandīja ntubīlo gwa Yeliko ū kū nzengo gwa minaji, kūshisha Zoali.

⁴Ū SEEBA ūng'wīla, “Ī yenīyī hū yene ī sī īyo naalī nabisagīja mu kwilahīla ba Abulahamu, Isaka, na Yakobo, aho nakabawīla gīkī, ‘Nakūbinha banhū ba shibyalīlwe shing'we.’ Naakūzunīlīja ū bebe wībone na miso gako, alīyo ūtūkīla ūshike ko.”

⁵Na lūūlū ū Musa ū ntūmami o ng'wa SEEBA, ūchīla mu sī ya Moabu, gīt'ūmo SEEBA walī wahayīla.

⁶Ūnjīka Moabu kwenūko, mu sī ya ntubīlo yilolile na Beti-peoli; kwike nī lelo īyī atīho nūūlū ūmò ūyo amanile aho shilī ī shigila shakwe.

⁷Ū Musa aho alīcha walī na būlamu wa myaka igana na makūmi abīlī, alīyo a miso gakwe gaalī gataalī gūūbona chiza no, nī nguzu jakwe jalī jitaalī ū kūgeeha.

⁸Na lūūlū a Baisilaeli būnīla ū Musa shikū makūmi adatū, ū mu mbūga ya Moabu ng'wenūmo, kūshisha lyūshila ī likanza lya kūlīla kwabo.

⁹Alilūūlū, ū Yoshwa walī ookala moyo gwa witegeleja, nguno ū Musa walī wantūūlīla makono gakwe. Hūna lūūlū būng'wigwa a Baisilaeli, bīīta pyī īyo SEEBA walī wanagīīla Musa.

¹⁰Nīyo kūfuma ikanza lyenīlo kūshisha lelo īyī, ataalī kwilonga ng'hangi ūngī mu Baisilaeli wa kūbiza gītī Musa; ūyo SEEBA walī amanile būshū kū būshū,

¹¹ūyo akīīta pyī ī shimanīkījo sha kūkumya nī mihayo ya kūkamaaja īyo SEEBA akantūma kwīyīta mu sī ya Misili, kūlī Falao na a batūmami bakwe, nū mu sī yakwe ī yose.

¹²Atīho ūngī hangī ūyo wabīta koolecha mihayo ya būdūla būtaale gīko, nūūlū ūyo wīta mihayo ya magaka gītī īyo wītaga Musa mu būtongi wa Baisilaeli bose.