Read Sukuma Bible 2015 – Bibilia Ilagano Lya Kale 2015 Kūshokeela 4 Bible Online

Kūshokeela 4 - Sukuma Bible 2015 – Bibilia Ilagano Lya Kale 2015 bible

Kūshokeela 4

¹Alilūūlū Baisilaeli, degelekagi mukigwe a kalangīle nī shilagīlo īsho nalīhaya kūmulanga. Shidimagi hū mukwikala mulī bapanga, na mukūdūla kūja kwīdima ī sī yenīyo ībize ying'we, īyo SEEBA, ū Mulungu wa bakūlūgenji bing'we alīng'winha.

²Ū mu yenīyī nalīmulagīla yaya kongeja ho yīngī, na yaya kwīnja nūūlū hado, alīyo shidimagi ī shilagīlo sha ng'wa SEEBA Mulungu wing'we īsho nalīng'winha.

³Ng'wabonile na miso ging'we īyo akīīta ū SEEBA ī Baali-peoli. Ū SEEBA Mulungu wing'we akabakenaagūla bīnga ū mu bing'we pye abo bakabiza balondeeji ba ng'wa Baalī wa Peoli.

⁴Alīyo pye a bing'we abo ng'walī mudimanile nū SEEBA Mulungu wing'we, mulībona gīkī nī haha mutaalī bapanga.

⁵Managi gīkī ū nene naamulangile malange na shilagīlo gīt'ūmo SEEBA Mulungu wane wanilagīīlila, gīkī mushimīzīle musho ūlū ng'wingīla ū mu sī īyo mulīja kwīdima.

⁶Ī mihayo yenīyī īdimagi chiza, nguno ū kū mahanga īkoolecha gīkī mulī banhū ba masala na bitegeleja. Ūlū būgigwa pye a malange genaya bakūhaya, “Ī gete a banhū b'ihanga lyenīlī balī na masala, hama bitegeleja.”

⁷Nguno līlīho ihanga kī itaale īlo mulungu wabo alī hihī nabo gīt'ūmo SEEBA Mulungu wise alī hihī na bise būl'ikanza ūlū tūnomba?

⁸Na hangī ihanga kī ī litaale īlo līlī na malange na shilagīlo shitūngīlīgije gītī īshi nalīng'winha lelo yenīyī?

⁹Ū mhayo ū ntaale, a bing'we ilang'hanagi dūhū, nīyo ng'wikale miso ū mu shikū jose ja būlamu wing'we aho mutaalī mulī bapanga. Mutizūyīība ī mihayo īyo ng'wībonile na miso ging'we, nūūlū mutizūleka kwīdīlīla ū mu myoyo ying'we īkajimīīla. Balangagi a bana bing'we ī mihayo yenīyī, na a baana babo a hanuma yabo.

¹⁰Lwizūkagwi ū lūshikū ūlo ng'walī ng'wīmīīla kū būtongi bo ng'wa SEEBA Mulungu wing'we kū lūgūlū lwa Holebu, aho akaniwīla gīk, “Bakumingage a banhū kū būtongi wane bīdegeleke ī mihayo yane, bilange kūnikūja ū mu shikū ja būpanga wabo aho balī mu sī, na a baana babo babalange.”

¹¹Mukalwegeela ū lūgūlū ng'wiza ng'wīmīīla haho bbihī nalo, aho lwaligimaga moto gwinunga ng'wigūlya kū malunde, kūnū lwapīndiagwa na malunde madito gapi, na giiti shitaale.

¹²Hūna ū SEEBA ūlūngalūnga ning'we kūfuma ū mu moto, ng'ūliigwa ī lilaka īlo lyayombaga ī mihayo, alīyo mutabonile mīlī gose gose, lyalīho ilaka dūhū.

¹³Ūmuwīla hape hape ī shilagīlo shakwe, a malange ayo ikūmi ayo akamulagīla kūgalondeela, hanuma ya henaho ūgandīka ha mabalala abīlī ga mawe.

¹⁴Hūna ī likanza lyenīlo, ū SEEBA ūnilagīla kūmulanga a malange genayo nī shilagīlo īsho shiigelile mushidime aho mulī ū mu sī īyo mulīkīla mongo kūja kwīdima.

¹⁵Ū SEEBA aho wayombaga ning'we ū lūshikū lwenūlo kūfuma mu moto kū lūgūlū lwa Holebu, mutabonile suso yose yose; na lūūlū ilang'hanagi gete.

¹⁶Mutizisosohaja mukabeeja shikolo sha kūlamiwa mu suso ya mbika yose yose, shibize shilī mu suso ya ngosha nūūlū nkīma.

¹⁷Nūūlū suso ya shiseng'wa shose shose īsho shikashimīzaga hasī, nūūlū noni ya kūlala ng'wigūlya;

¹⁸nūūlū shiinū ya kūshooloma hasī, nūūlū ndīlo īyo īkayeela yeelaga mu minzī.

¹⁹Nīyo ilang'hanage gete, ūtizūgima kūbūūcha miso gako kwigūlya kūlola līīmi, nūūlū ng'weji, nūūlū sonda; mabità gose ga shikolo īsho shilī kwigūlya. Ūtizūdūtwa nūūlū hado ūkagima kūshiinamīla na kūshilamya shikolo īsho SEEBA Mulungu wako washitūūla ho kūlwa nguno ya mahanga gose ga banhū abo balī ha sīlīlī y'igūlū.

²⁰Alīyo a bing'we, ū SEEBA wang'wīnja kūfuma ng'wichongo lya moto lya kwaabīja chūūma, kūfuma mu sī ya Misili; gīkī mubize banhū bakwe, bingīji kūlī we gīt'ūmo mulī lelo yenīyī.

²¹Ū SEEBA akanipelanīla ū nene kūlwa nguno ying'we, ūnilahīlīla gīkī natūdūla ū kūgūkīla ū mongo gwa Yolodani ningīle ū mu sī yawiza īyo alīng'winha ū SEEBA Mulungu wing'we ībize ya wingīji wing'we.

²²Ū nene nakūchīla mu sī īyī; natūgūkīla ū mongo gwa Yolodani, alīyo a bing'we mulī hihī kūgūkīla ī haha muje mukīsole ī sī yawiza yenīyo.

²³Na lūūlū ilang'hanagi gete mutizūlyība ī lilagane lya ng'wa SEEBA Mulungu wing'we, īlo akabeeja hamò ning'we. Mutizūgima kūbeeja shiikolile sha kūlamiwa mu suso yose yose ya shikolo īsho SEEBA Mulungu wing'we amulemegije.

²⁴Nguno ū SEEBA Mulungu wing'we alī moto mpelanu, ū wei alī Mulungu wa wilu.

²⁵Ūlū ūbyala bana, ūpandīka na bizūkūlū, ūbiza wikala shikū ningī ū mu sī yenīyo, hūna wandya kwīta yabūbi na kwisosohaja, kū būtongi bo ng'wa SEEBA Mulungu wako, ūkūnsayīchaga mu nzīla ya kwibeegeja shiikolile shose shose sha kūlamiwa.

²⁶Ī lelo īyī nalīmulahīlīla kū būtongi w'igūlū na sī,[2] gīkī mukūyagaala wangū no ng'wīnge ū mu sī īyo mulīkīla Yolodani kūja kwīdima. Mutūūlama ko shikū ningī, mukūkenaagūka ng'hana; nīyo wangū no!

²⁷Ū SEEBA akūmusambaagīja mu mahanga, a bapanga mukūsaaga bageehu no ū mu mahanga ūko alamusambaagīje ū SEEBA.

²⁸Ū kwenūko mukūbiza balamya ba mamulungu ga kūbeejiwa na banhū; mashiikolile ga kūbeejiwa kūfuma mu mitī na mawe, ayo gatīko kūbona nūūlū kwigwa nūūlū kūlya, nūūlū ni kūnung'hīlwa dūhū yaya.

²⁹Alīyo ūlū ūlī kwenūko hūna ūnkooba ū SEEBA Mulungu wako, ūkūmpandīka ūlū ūnkooba na ng'holò yako yose na būpanga wako bose.

³⁰Ū kū shikū ja kū būtongi ūlū wingīla mu makoye kūlwa kūgwīlwa nī yose yenīyī, a henaho lūūlū hūna ūkūngalūkīla ū SEEBA Mulungu wako ūbize ng'wigwi kūlī we.

³¹Īkī ū SEEBA Mulungu wako alī Mulungu wa shigongo, atūkūlekanīja wilalī, nūūlū atūkūkenaagūla gete; na atīko kūlyība ī lilagane lyakwe īlo walībeeja na bakūlūgenji bako, īlo akabalahīlīla.

³²Al'īgīsīlījagi ī mihayo ya shikū ja kale, ī kale ya bakale aho ikanza ling'we lītaalī kūbiza ho; kwandīja ikanza lya kūseema kwa ng'wa Mulungu, aho akanseema munhū mu sī. Gīsīlījagi pye hose hose, kūfuma wandījo w'igūlū kūshisha kū ngelelo yalyo.[3] Mhayo kī ntaale gwa kūbiza gītī gwenūyū gwigengeleka ikanza lyose lyose, nūūlū mhayo kī gwa kūbiza gītī gwenūyū gwigwiiwa ikanza lyose lyose?

³³Balīho banhū kī bangī abo baabīta kwigwa ilaka lya ng'wa Mulungu ikanza lyose lyose, akūyombaga kūfuma mu moto gīt'ūmo wigwīla ū bebe, alīyo būleka kūyagaala?

³⁴Nūūlū alīho mulungu kī ūyo ikanza lyose lyose watūmamīla nkono gwa būdūla, ūgūgoloola ū nkono gwakwe koolecha shimanīkījo na kwīta mihayo ya kūluhya kūtaale, na ya kūkumya na kūdedebaja, na būlūgū; mihayo yose īyo SEEBA Mulungu wing'we wīyīta mu Misili kūlwa nguno ying'we, na a bing'we mulībona na miso ging'we?

³⁵Ī yenīyī īkīītwa kū būtongi wako ūlolile, ūmane gīkī ū SEEBA hū ng'wene ū Mulungu; atīho ūngī ūlū atī wei wike.

³⁶Hū ng'wene akakwīta ū bebe ūliigwa ī lilaka lyakwe kūfuma ng'wigūlū gīkī akūlange; ūkoolekeja moto ntaale ū mu sī, ūlyigwa ī lilaka lyakwe kūfuma ū mu moto gwakwe.

³⁷Īkī walī abatogilwe a bakūlūgenji bako, nī shibyalīlwe sha hanuma yabo walī wamala kūshisola, h'ī nguno yene walī hamò nang'ho wei ng'wenekīlī, ūkwīnja ū mu sī ya Misili na būdūla wakwe.

³⁸Ūpeeja na mahanga mataale ga nguzu kūtinda bebe, gīkī gakwīngīle akūtūūle bebe ū mu sī yago, ūkwinha bebe ībize yako ya wingīji wako gīt'ūmo īlī lelo īyī.

³⁹Na lūūlū ī lelo managa gete, nīyo ū mhayo gwenūyū ūgūtūūle mu ng'holò yako; gīkī ū SEEBA hū ng'wene ū Mulungu ū kwigūlya ū ng'wigūlū na a hasī ū mu sī; atīho ūngī.

⁴⁰Gadimage a malange gakwe nī shilagīlo shakwe īsho nalīkwinha lelo, īkūkūbeelela ī mihayo; ū bebe hamò na a baana bako abo balize hanuma yako. Nīyo ū mu gīko ūkūbiza na būlamu būlīhu ū mu sī īyo SEEBA Mulungu wako alīkwinha ībize yako shikū jose.

⁴¹Hanuma ya henaho ū Musa ūkomanya mizengo idatū ū kū nkīlo gwa kīya ya mongo gwa Yolodani,

⁴²Ībize ya kūpeelela ko munhū ose ose ūlū ūmūlaga ng'wiye alīyo walī atang'wikanilwe. Ūlū wīta gīko adūle kūpeelela mu nzengo gūmò gwayo ī yenīyo akapīlīle ko.

⁴³Ī mizengo īyī hū yene īkasolwa, kwitogolo lya kū sī ja magūlya nzengo gwa Beza gūūsolwa kūlwa nguno ya banhū ba lūganda lwa ng'wa Lubeni. A ba lūganda lwa Gadi binhwa Lamosi ya Gileadi, lelo a ba lūganda lwa ng'wa Manase a bene binhwa nzengo gwa Golani, mu sī ya Bashani.

⁴⁴Ū Musa akabatūūlīla a Baisilaeli shilagīlo shiishi.

⁴⁵Ūbū hū būkomelejabo ng'wa Musa, na a malange, nī shilagīlo īsho akabina aho balī hanze ya Misili.

⁴⁶Ī shikū jene baalī ng'wilago lya mongo gwa Yolodani, kū ntambūko gwa kīya bbihī na Beti-peoli. Yalī sī ya ng'wa Sihoni ntemi wa Baamoli, ūyo wikalaga Heshiboni, ūyo Musa na a Baisilaeli bakampyena aho baalī mu lūgendo lwa kūfuma Misili.

⁴⁷Ī sī yakwe bīsola hamò nī ya ng'wa Ogi, ū ntemi wa Bashani; sī ja batemi babīlī abo baalī kū nkīlo gwa kīya ya mongo gwa Yolodani.

⁴⁸Ī sī yenīyī ū būtaale wayo walī kwandīja Aloeli, kū ngegu ja mongo gwa Alinoni, kūja kū lūgūlū lwa Siyoni (hū kūhaya lwa Helimoni).

⁴⁹Nī sī ya Alaba ū kū ntambūko gwa kīya ya mongo gwa Yolodani yalī īkūbanījiwe pyī, kūshisha kū nyanza ya Alaba, kūja kū ntulumenho gwa lūgūlū lwa Pisiga.