Read Sukuma Bible 2015 – Bibilia Ilagano Lya Kale 2015 Kūshokeela 5 Bible Online

Kūshokeela 5 - Sukuma Bible 2015 – Bibilia Ilagano Lya Kale 2015 bible

Kūshokeela 5

¹Ū Musa ūbitana pye a Baisilaeli ūbawīla, “Bing'we Baisilaeli, degelekagi chiza mugiigwe a malange nī shilagīlo īsho nalīshihaya kū būtongi wing'we ī lelo. Shidimagi hangī mushimīzīle musho.

²Ū SEEBA Mulungu wise akabeeja ilagane hamò nise ū kū lūgūlū lwa Holebu.

³Ī lilagane lyenīlo ū SEEBA atabeegije na bakūlūgenji bise, alīyo akabeeja na bise benekīlī, pye a bose abo tūlī bapanga ī lelo īyī.

⁴Ū SEEBA akalūngalūnga ning'we bo hape hape kūfuma mu moto gwaligimaga mu lūgūlū.

⁵(Ī likanza lyenīlo ū nene naalī nīmīīla ha gatī ying'we nū SEEBA kūlwa kūmuwīla ū mhayo go ng'wa SEEBA, nguno ng'walī ng'wagogoha ū moto, ng'ūlemeelwa ū kūlwegeela ū lūgūlū.)[4] Ū SEEBA ūlūngalūnga alīhaya gīkī,

⁶“Ū nene nalī SEEBA Mulungu wako; nakakwīnja mu sī ya Misili, sī ya būsese.

⁷Yaya kūbiza na bamulungu bangī, alīyo nene wike.

⁸Yaya kwibeegeja shiikolile shose shose sha kūlamiwa; nūūlū shibize shiikolile sha shose shose īsho shilī kwigūlya ng'wigūlū, nūūlū īsho shilī hasī mu sī, nūūlū mu minzī mu gatī ya sī.

⁹Yaya kūshiinamīla, nūūlū kūshitugīja mazwi. Nguno ū nene SEEBA Mulungu wako nalī Mulungu wa wilu; nakababalīlaga nsango bana kūlwa būbi wa babyaji babo abo banikolilwe, kūshisha shibyalīlwe sha kadatū na sha kanè.

¹⁰Alīyo nakoolechaga būtogwa būtaale no kū mashihūmbī na mashihūmbī ga banhū abo banitogilwe na bagadimile a malange gane.”

¹¹Yaya kūlītūmamīla sagala sagala ī lina lya ng'wa SEEBA Mulungu wako; nguno ū SEEBA atūng'wisaaba ose ose kūbiza ntūngīlīja ūyo akūlītūmamīlaga sagala sagala ī lina lyakwe.

¹²Lwizūkagwe ū lūshikū lwa Sabato ūlūlang'hane lwikale lwela, gīt'ūmo SEEBA Mulungu wako akūlagīīlile.

¹³Tūmamaga pyī ī milīmo yako, nī myatīla yako ūmalamaje mu shikū itandatū.

¹⁴Alīyo ū lūshikū lwa mpungatī lwene Sabato ya ng'wa SEEBA Mulungu wako. Ū mu lūshikū lwenūlo yaya kūtūmama nīmo gose gose, ū bebe ng'wenekīlī, nūūlū ng'witūnja wako, nūūlū nshīke wako, nūūlū ntūmami wako ngosha nūūlū nkīma, nūūlū ng'ombe yako, nūūlū nzobe yako, pyī nūūlū mitugo jako jingī; nūūlū ngeni ūyo alī ha ng'wako. Ū ntūmami wako ngosha nūūlū nkīma, nang'hwe shiigelelile apandīke kwifuula gītī bebe.

¹⁵Izūkagwa gīkī nū bebe walī nsese mu sī ya Misili, na gīkī ū SEEBA Mulungu wako akagoloola nkono gwakwe, ūtūmamīla nkono gwa būdūla, ūkwīnja mo. Na lūūlū ū SEEBA Mulungu wako alagīlile kūlwizūkwa ū lūshikū lwa Sabato.

¹⁶Bakūjage so na noko, gīt'ūmo SEEBA Mulungu wako akūlagīīlīlile, ūpandīke kūlama shikū ningī, nī mihayo yako īkūbeelele ū mu sī īyo alīkwinha ū SEEBA Mulungu wako.

¹⁷Yaya kūbūlaga.

¹⁸Yaya kūshihya.

¹⁹Yaya kwiba.

²⁰Yaya kūfunya būkaanīji wa būlomolomo kūlwa nzenganwa ng'wiyo.

²¹Yaya kūng'wikūmva nke wa nzenganwa ng'wiyo, yaya nūūlū kwikūmva numba ya nzenganwa ng'wiyo, nūūlū ilaale lyakwe, nūūlū ntūmami wakwe ngosha nūūlū nkīma; nūūlū ng'ombe yakwe, nūūlū nzobe yakwe, nūūlū shikolo shingī shose shose sha nzenganwa ng'wiyo.

²²A malange genaya ū SEEBA akagahaya n'ilaka lya higūlya kū būtongi wa ibità lyose, aho balī ū kū lūgūlū ūlo lwaligimaga moto, lyalīho n'ilunde, na giiti shitaale. Atongegije mhayo gūngī hangī yaya. Hanuma ya henaho akagandīka ha mabalala ga mawe, ūninha nene.

²³Aho ng'waliigwa ī lilaka kūfuma ū mu giiti kūnū ū lūgūlū lūkūligimaga moto, pye a batongeeji ba ng'anda jing'we na a banamhala bing'we bakiza ū kūlī nene.

²⁴Ng'ūniwīla, “Ū SEEBA Mulungu wise watoolekejaga ī likūjo lyakwe nū būtaale wakwe, nī lilaka lyakwe twaliigwaga kūfuma ū mu moto. Ī lelo twabonaga gīkī gashi ū munhū ashikile kwikala alī mpanga nūūlū ūyombiwa na Mulungu.

²⁵Alilūūlū ī gīsī, nibūlī tūshile kūcha? Nguno ū moto gwenūyū gūkūtūbūlaga nose; nū kwikala tūkūliigwaga gīko ī lilaka lya ng'wa SEEBA Mulungu wise tūkūcha nose!

²⁶Nguno alīho munhū kī ū wa mīlī ūyo wabīta kwigwa ikanza lyose lyose ilaka lya ng'wa Mulungu mpanga akūlūngalūnganga kūfuma mu moto gīt'ūmo twigwīlaga bise gīkī, alīyo wikala mpanga?

²⁷Egeelaga ko ū bebe ūkīdegeleke chiza pyī īyo alīyīhaya ū SEEBA Mulungu wise. Hūna ūtūwīle būlī gwene ūyo alīkūwīla ū bebe ū SEEBA Mulungu wise; tūkūkwigwa tūshikīlīje.”

²⁸Aho mulīniwīla ū SEEBA wang'wigwaga; na lūūlū ū SEEBA ūniwīla, “Nayigwaga īyo balīkūwīla a banhū benaba, īyo bīhayaga pyī ītūngīlīgije.

²⁹Ni yabeelela ūlū nibabiza gīko gwa, ī ng'holò jabo jūbiza na logohano ū kūlī nene, būshidima ī shilagīlo shane pyī ī shikū gīkī ī mihayo ībaīle chiza, a boi benekīlī na a baana babo welelo bose!”

³⁰Na lūūlū jaga ūkabawīle, “Shokagi kū maheema ging'we.”

³¹Alīyo ū bebe wīmīīle hihī nane aha nakwinhe pye a kahelele na a malange, nī shilagīlo īsho ūlabalange kūshidima ūlū bingīla ū mu sī īyo nalībinha kūbiza yabo.

³²Alilūūlū ilang'hanagi ng'wīte gīt'ūmo SEEBA Mulungu wing'we alīmulagīīlīla; yaya kūgalūka nūūlū hado, kūja kū nkono gwa būlyo nūūlū gwa lūmoso.

³³Shimīzīlagi mo ū mu nzīla jose ījo SEEBA Mulungu wing'we wamulagīīlaga, mupandīke kwikala mulī bapanga, nī mihayo īmuīle chiza, hama mubize na būlamu wa shikū ningī ū mu sī īyo mulayīdime.