Read Sukuma Bible 2015 – Bibilia Ilagano Lya Kale 2015 Kūshokeela 7 Bible Online

Kūshokeela 7 - Sukuma Bible 2015 – Bibilia Ilagano Lya Kale 2015 bible

Kūshokeela 7

¹Ū SEEBA Mulungu wako ūlū ūkūshisha ū mu sī īyo ūjile kwīdima ībize yako, hūna ūgapeeja mahanga mingī gūkwīngīla, ga Bahītī, Bagiligashi, Baamoli, Bakanani, Bapelizi, Bahīvī, na Bayebusi, mahanga mpungatī mataale na ga nguzu kūtinda bebe;

²ū SEEBA Mulungu wako ūlū ūgatūūla mu nkono gwako a mahanga genayo, nang'ho ūgapyena, īkūkwigelela kūbamala pye gete a banhū benabo. Yaya ū kūbeeja ilagane nabo nūūlū hado, hama yaya gete nūūlū kūbachīla shigongo.

³Yaya ū kwitooleela nabo; mutizūbazunīlīja a bashike bing'we ū kūtoolwa na a bitūnja babo, na a bitūnja bing'we yaya ū kūbatoola a bashīke babo.

⁴Nguno bakūbagalūcha a bitūnja bing'we, booye kūnilondeela nene, bandye kūbatūmamīla bamulungu bangī, a heneho ū SEEBA akūmupelanīla wangū no amukenaagūle.

⁵Na lūūlū ī ya kūbīītīla a banhū benabo yīyī: Ī myalīlo yabo īsambaagūlagi gete, hama balī na mawe bakagalamyaga; nago gabelagūlagi. Na ng'hīngī ja Maashela balī najo, nī jene jikambagūlagi, na a mashiikolile gabo gapembagi mu moto.

⁶Nguno ū bebe ūlī ihanga lyeela ū kūlī SEEBA Mulungu wako; ū SEEBA Mulungu wako wakūsola kūfuma ū mu banhū a bose abo balī mu sī; gīkī ūbize ihanga lya banhū bakwe ba wikomangīle.

⁷Ū Mulungu atang'olekegije ū būtogwa wakwe a bing'we mu nzīla ya kūmusola īkī gīkī ng'walī bingī no kūtinda a banhū a bangī; ītī gīko yaya, nguno a bing'we ng'walī bagehu no kūtinda pye a banhū.

⁸Alīyo yalī kūlwa nguno īkī ū SEEBA amutogilwe no; na lūūlū washikīlīja kwisagīja ūko walī wabisagīja bakūlūgenji bing'we. H'ī nguno yene akamukomoola na nkono gwa būdūla, ūmufunya ū mu sī ya būsese, ng'wīnga ū mu nkono go ng'wa Falao ū ntemi wa Misili.

⁹Na lūūlū itegelejagi gīkī, ū SEEBA Mulungu wing'we, hū ng'wene ū Mulungu; ū wei alī Mulungu nsanyiwa, akadimīīlaga ilagane lyakwe kū bose mu būtogwa būshikanu, kūshisha shihūmbī sha shibyalīlwe sha banhū abo bantogilwe na bashidimile ī shilagīlo shakwe.

¹⁰Alīyo abo bankolilwe, akabashokejaga īyo ībigelelilwe, gīkī abayagaje gete. Atadīlaga ū kūbamalīla shiilī abo bankolilwe, kūlenganīla nū mumo ībigeleelilwe.

¹¹Na lūūlū īng'wigeleelilwe kwilang'hana no no no, mushimīzīle ū mu kahelele na a malange gakwe, nī shilagīlo īsho nalīng'winha lelo īyī.

¹²Ūlū ng'ūshidīlīla ī shilagīlo shenīshi, hama ng'wilang'hana ng'ūdūla kūshimīzīla musho, ū SEEBA Mulungu wako akūlīlang'hana ī lilagane lyakwe ū kūlī bebe mu būtogwa, gīt'ūmo wabilahīlīla bakūlūgenji bako.

¹³Nīyo akūkūtogwa no ūkūfuuha na ningī, gīkī mukwīle kūtinda. Ū būbyīle wa nda yako akūwīlūkīla mbango, pyī na a matwajo gako ga kūfuma mu malaale ī shilīwa shako, mizabibu yako, na a maguta akūgafuuha mbango; nī ndama ja mu madaale gako, na a baana ba ng'holo na a ba mbūli jako. Ī yose yenīyī akūkwītīla ū mu sī īyo wabisagīja bakūlūgenji bako gīkī akūkwinha.

¹⁴Ū bebe ūkūbiza na kūtinda pye a banhū ba mu sī, atīho nūūlū munhū ūmò, ngosha nūūlū nkīma ūyo akūbiza ngumba; na gūtīho ntugo gwako nūūlū gūmò ūyo gūtūdūla kwibyala.

¹⁵Ū SEEBA akūkwīngīja pyī ī mbika ja mabūsaatu; atūkūgwisīja na hado yaya a mabūsaatu gabūbi ayo walī ūgamanile mu sī ya Misili, a genayo akūbagwisīja abo bakūkolilwe ū bebe.

¹⁶Na lūūlū shikwigeleelilwe kūbamala pye a banhū abo SEEBA Mulungu wako alabatūūle mu nkono gwako. Ūtizūbachīla shigongo nūūlū hado yaya, hama a bamulungu babo ūtizūgima gete kūbatūmamīla nūūlū hado; nguno ū lwenūlo lūkūbiza lūtu lwa kūkūgwasha.

¹⁷Ū bebe ūshikile kwiganika, “A mahanga genaya galī na nguzu no kūtinda a bise. Tūkūdūla kinehe ū kūgapeeja gatwīngīle?”

¹⁸Yaya ū kūbogoha nūūlū hado a banhū benabo, ū bebe izūkagwa dūhū ūmo SEEBA Mulungu wako akang'wītīla ū Falao na a bana Misili a bose.

¹⁹Bebe ng'wenekīlī ūkabona na miso gako īyo SEEBA Mulungu wako akīyīta; ūbona mihayo ya kūluhya kūtaale, na shimanīkījo sha kūkumya na kūdedebaja, ūgūbona ū nkono gwakwe gwa būdūla, ū nkono ūyo akagūgoloola ng'wikanza lya kūkūfunya ū mu sī yenīyo. Ū SEEBA Mulungu wako akūgīītīla gīko na a mahanga pye ayo ūlīgogoha genayo.

²⁰Nīyo ū SEEBA Mulungu wako akūbatūmīla būkalasa, kūshisha bashile pyī, na a bakūyūng'witūlūganya.

²¹Yaya gete ū kūbogoha a benabo, nguno ū SEEBA Mulungu wako, ūyo alī hamò nang'ho, alī Mulungu ntaale na wa lyogohya.

²²Ū SEEBA Mulungu wako akūgīnja had hado a mahanga genayo gakwīngīle; yaya ū kūgapeeja pye a gose haho na haho ikanza līmò, nguno mashiinū ga mu mapoolu gakwibyala gakwīle gakūkoye.

²³Alīyo ū SEEBA Mulungu wako akūbatūūla mu nkono gwako a banhū benabo, abinhe ng'holò ya kūbbaha kūshisha bashile pye.

²⁴A batemi babo akūbatūūla mu nkono gwako, kūshisha ūlīpyagūle ī lina lyabo lījimangūke gete, lyīnge a ha sīlīlī y'igūlū. Atīho nūūlū ūmò wabo ūyo akūgima kūkwīmīla ū bebe; ūkūbakenaagūla pye gete.

²⁵Nī shiikolile sha ba mulungu babo ūshipemba mu moto. Yaya ū kūjikūmva ī zahabu nūūlū feza ījo jizwalīkījiwe ū kū mashiikolile genayo; yaya nūūlū kūjisola gīkī nang'ho ūbize wipandīkīla. Ūlū wīta gīko ūkwigwasha mu būsese wa kūgatūmamīla, nguno a mashiikolo genayo galī ga malofu ū kūlī SEEBA Mulungu wako.

²⁶Yaya ū kwenha shikolo shose shose sha malofu ū mu numba yako, ūlū wīta gīko nū bebe ūkūbiza wigeleelwa kūgwīlwa nsango gwa kūkenaagūlwa gīt'ūmo gal'a goi. Ī shikolo sha mbika yenīyo h'ūmo shibizīle; shikolagwe gete, nīyo ūshogohe no, nguno shizumilwe.