Read Sukuma Bible 2015 – Bibilia Ilagano Lya Kale 2015 Kūshokeela 9 Bible Online

Kūshokeela 9 - Sukuma Bible 2015 – Bibilia Ilagano Lya Kale 2015 bible

Kūshokeela 9

¹Na lūūlū igwaga Isilaeli, ī haha ūlī bbihī kūgūkīla ū mongo gwa Yolodani, ūje kūgapeeja mahanga mataale na ga nguzu kūtinda bebe, kū sī ya mizengo mitaale īpīndīlījiwe ngītīli ja ndugu, ja būlīīhu wa kushika kū malunde.

²A banhū ba kwenūko balī na nguzu, hangī balīīhu no, ba shibyalīlwe sha ng'wa Anaki. Ū bebe ūbamanile, nīyo ūlūdeebile nū lūkumo lwabo ūmo bakahayīlagwa, “Nani ūyo adūgije kwilwisha na Baanaki?”

³Alīyo ī lelo yenīyī managa hape gīkī, ū SEEBA Mulungu wako hū ng'wene ūyo alīkīla, atonge ko gītī moto gwa būpī gūkūlyaga mabbaala. Akūbakenaagūla wei, akūbagwisha ū kū būtongi wako. Hūna ū bebe ūkūbapeeja na kūbayagaja wangū, gīt'ūmo SEEBA wakwisagīja.

⁴Alīyo ū SEEBA Mulungu wako ūlū ūbapeeja būkwīngīla, ūtizikumīlīja ūlīhaya, “Ū SEEBA wanenhile ū mu sī īyī kwiza kwīsola ībize yane kūlwa nguno ya būtūngīlīja wane.” Ītī gīko na hado yaya, alīyo īlī kūlwa nguno ya būsoso wa nhūngwa jabo a banhū ba mahanga genayo, hī chene ū SEEBA alībapeeja bakwīngīle.

⁵Ūtūjaga kwīsola ī sī ya banhū benabo kūlwa nguno ya būtūngīlīja wako, nūūlū kūlwa būgololoku wa nhūngwa jako. Alīyo īlī kūlwa nguno ya būsoso wa nhūngwa jabo, hī nguno yene ū SEEBA Mulungu wako akūbapeeja bakwīngīle, ashikīlīje īyo wabisagīja bakūlūgenji bako ba Abulahamu, Isaka na Yakobo.

⁶Hūna lūūlū itegelejage gīkī, ū SEEBA Mulungu wako atūkwinhaga ī sī yawiza yenīyo kwīsola ībize yako, kūlwa nguno ya būtūngīlīja wako; nguno ū bebe ūl'ihanga lya banhū ba nhingo ngang'hanazu no.

⁷Gwizūkagwe ū mhayo ūyū, ūtizīība ūmo ūkampelanīja ū SEEBA Mulungu wako aho ūlī kwitogolo. Kūfuma ikanza lya kwīnga kwako mu sī ya Misili kūshisha washika aha, ūkūnkoyaga dūhū ū SEEBA Mulungu wako, kūlwa būshitiigwa wako.

⁸Ū kū lūgūlū lwa Holebu mukampelanya no ū SEEBA, kūshisha ūhaya kūmuyagaja.

⁹Aho nalinha ū mu lūgūlū kūja kwanukūla mabalala ga mawe, a mawe ga būkaanījibo ng'wa SEEBA ūbo walī wabeeja ning'we, nakikala ū mu lūgūlū ikanza lya shikū makūmi anè, līīmi na būjikū; nataliile shilīwa nūūlū natang'wile minzī yaya.

¹⁰Ū SEEBA ūninha mabalala abīlī ga mawe gandīkilwe na nkono go ng'wa Mulungu. Gaalī gandīkilwe ho pye a malange ga shilagīlo sha ng'wa SEEBA, ayo akang'winha lūshikū lwene ng'walī ng'wibilinga, aho wayombaga ning'we kūfuma mu lūgūlū lūkūligimaga moto.

¹¹Aho jabīta ī shikū ījo makūmi anè līīmi na būjikū, ū SEEBA ūninha mabalala abīlī ga mawe, a mabalala g'ilagane.

¹²Hūna ū SEEBA ūniwīla, “Būkaga wike wīnge a henaha ūje wangū, nguno a banhū bako abo wabenhile kūfuma Misili bisosohagije. Baagalūkile wangū no bīīleka īyo naalī nabalagīīlile, bibeegegije shiikolile sha kūsula.”

¹³Ū SEEBA ongeja kūniwīla alīhaya, “Nīyo a banhū benaba naababonile gīkī balī na ntwe ndaamu no!

¹⁴Ī gete nilekage nabakenaagūle, nalīpyagūle gete ī lina lyabo lyīnge a ha sīlīlī y'igūlū, nakwīte ū bebe ūbize ihanga lya nguzu, n'itaale kūtinda a boi.”

¹⁵Hūna nūgalūka kwika kūfuma ū mu lūgūlū; ī likanza lyenīlo lūkūligimaga moto. Na a mabalala ay'abīlī a g'ilagane naalī nago ū mu makono gane.

¹⁶Na ng'hana aho naaponya a miso nūbona gīkī ng'wang'hūbile no ū SEEBA Mulungu wing'we; nūūbona ng'wagalūkile wangū ng'wīleka ī nzīla īyo SEEBA walī wamulagīla, ng'wibeegeja shiikolile sha ndama ya kūsula.

¹⁷A mabalala ga mawe ayo naalī nagabūkije mu makono gane, nūgadima nūgaponya hasī mulolile, gūūbelagūka gūbiza mamenyagūlwa.

¹⁸Hūna nūūgwa hasī kū būtongi wakwe ū SEEBA nūnīlīīla; nikala gīko ikanza lya shikū makūmi anè, līīmi na būjikū. Natalile shilīwa nūūlū kūng'wa minzī yaya, kūlwa nguno ya būkenaagūji wing'we ū bose ūbo ng'walī ng'wawīta, ī shibi īsho shikampelanya no no no ū SEEBA.

¹⁹Ū nene nakabogoha ū būpelanu nū būdaki wakwe ū SEEBA, walī wasaya no kūshisha walī amalīīlile kūmuyagaja. Alīyo ū SEEBA ūniigwa nū lūkangala lwenūlo.

²⁰Hama nīyo ū SEEBA walī wampelanīla no nū Alooni; walī atogilwe kūnyagaja, nū ng'wene nakanombela ī likanza lyenīlo.

²¹Hūna ī līshiinū ling'we, ī lidama īlo ng'walī ng'walībeeja nūlīsola nūlīpemba mu moto. Hama nūlīpondagūla, nūlīshigina lyūnoga, lyūbiza lūbuubu; ū lūbuubu lwenūlo nūlūsaamagūlīla mu minzī ga mu longa gaahūūmaga kūfuma mu lūgūlū.

²²Ū SEEBA ng'walī ng'wampelanya n'ikanza līngī mulī Tabeela, na Masa, na Kibuloti-havata.

²³Na a haho mulī Kadeeshi-balinea ū SEEBA akamutūma ūmuwīla, “Jagi mukīdime ībize ying'we, ī sī īyo nang'winha.” Na ahene mukalema, ng'ūshigomela ī shilagīlo sha ng'wa SEEBA Mulungu wing'we; ng'ūduuma ū kūnsanya nūūlū ū kūng'wigwa.

²⁴A bing'we mulī bashitiigwa na kale ū kūlī SEEBA, kūfuma aho nandīja kūmudeeba ū nene.

²⁵Hūna lūūlū nūdīla ī shikū ījo makūmi anè līīmi na būjikū nagwile ū kū būtongi bo ng'wa SEEBA, nguno ū SEEBA walī wahaya akūmuyagaja.

²⁶Nūnomba ū SEEBA nalīhaya, “Ee Seeba MULUNGU, ūtizūbayagaja a banhū bako, banhū ba wingīji wako abo wabakomoola na būdūla wako būtaale, ūbīnja mu sī ya Misili na nkono gwako gwa būdūla.

²⁷Bizūkagwe a batūmami bako; a ba Abulahamu, Isaka na Yakobo, yaya ūkūbūkalalīla ū būgūnu wa banhū benaba, nū būkenaagūji wabo nī shibi shabo.

²⁸Ūlū ītī chene a banhū ba kū sī īyo watūfunije bakūhaya, ‘Ū SEEBA walī atabatogilwe a banhū benaba, na lūūlū īkī walemeelilwe ū kūbashisha ū mu sī īyo walī wabisagīja, wakalīlile kūbamalīla ng'witogolo dūhū!’

²⁹Alīyo a boi balī banhū bako gete, banhū ba wingīji wako, abo bebe ng'wenekīlī ūkagoloola nkono gwako gwa būdūla ūbafunya ū mu sī ya Misili.”