Read Sukuma Bible 2015 – Bibilia Ilagano Lya Kale 2015 Yohana 17 Bible Online

Yohana 17 - Sukuma Bible 2015 – Bibilia Ilagano Lya Kale 2015 bible

Yohana 17

¹Ū Yesu aho wamala kūhaya ī yenīyo, ūlangamīla kwigūlya. Ūlola ng'wigūlū wandya kūhaya gīkī, “Baba lyashika ī likanza; nkūjage ū Ng'wana wako, nang'hwe ū Ng'wana wako akūkūje ū bebe.

²Nguno wang'winhile būsugi higūlya ya banhū bose, gīkī pye abo wang'winhile abinhe būpanga butashilaga.

³Ū būpanga butashilaga wene kūkūmana bebe ūyo ūlī Mulungu wa ng'hana; Mulungu ūmò wike, hamò na Yesu Kilisito, ūyo ūntūmile bebe.

⁴Ū nene naagūshikīlīgije ū nīmo ūyo ūninhile kūgūbeeja, nūkwenhela ikūjo ū mu sī.

⁵Ali lūūlū Baba, nigūngūhyage hamò nang'ho ī haha, nabize mo ū ng'wikūjo īlo naalī nalyo hamò nang'ho kūfuma na a haho sī ītaalī kusumvwa.

⁶A banhū abo ūbasolile kūfuma mu sī ūninha nene, naaboolekegije ī lina lyako. A boi baalī bako, alīyo waninhile nene, nīyo ī haha bagūdimile ū mhayo gwako.

⁷Bamanile gīkī pyī ī shikolo īsho ūninhile shilī shako.

⁸Nguno ī mihayo yako īyo ūninhile nene, naamalile kūbinha būyanukūla. Hūna lūūlū, ī haha bamanile gete gīkī, ū nene nafumile kūlī bebe. Na bazunije gīkī ū bebe hū ng'wene ūyo ūnitūmile.

⁹A benaba h'abo nalībalombela; natūlombelaga banhū ba mu sī, alīyo abo ūninhile, nguno a benaba balī bako.

¹⁰Pye a bane balī bako, na a bako balī bane. Na lūūlū nakūkūjiwagwa ū mubo.

¹¹Ū nene ī haha natīmo ū mu sī, naliza kūlī bebe; alīyo a bene bataalī balīmo ū mu sī. Baba ng'wela, balang'hanage mu lina lyako īlo ūninhile, babize mu būmò, gīt'ūmo bise tūlī ūmò.

¹²Aho naalī nataalī hamò nabo, nalūbalang'hanaga mu lina lyako īlo ūninhile, hangī naalī nabakīngītīīlile, atachile nūūlū ūmò wabo, ūlū atī ū ng'wana wa kucha dūhū; gīkī shishikīlījiwe ī shandīkwa.

¹³Ī haha naliza kūlī bebe, ī mihayo yenīyī nalīyīhaya mu sī, gīkī babize nabo ū būyegi bone ū mubo; nīyo būbize būshikanu.

¹⁴Ū nene naamalile ū kūbinha ū mhayo gwako, hūna lūūlū a ba mu sī baabakolilwe īkī a bene batī ba mu sī, gīt'ūmo nene natī wa mu sī.

¹⁵Natūlombaga ūbīnje ū mu sī, alīyo ūbalang'hane ū kūlī Mi.

¹⁶A boi batī ba mu sī gīt'ūmo nene natī wa mu sī.

¹⁷Beejage mu ng'hana yako; ū mhayo gwako hū yene ī ng'hana.

¹⁸Ūmo ūkanitūmīla nene ū mu sī, nū nene h'ūmo nalībatūmīla a boi ū mu sī.

¹⁹Naliyeeja nene ng'wenekīlī kūlwa nguno yabo, gīkī nabo babize beejiwagwa mu ng'hana.

²⁰“Natūbalombelaga aba dūhū, alīyo na a babo balanizunye kūlwa mhayo gwabo aba.

²¹Nabo pye babize balī mu būmò gīt'ūmo bebe Baba ūlī mulī nene, nū nene ūmo nalī mulī bebe. Na a bene babize ū mu bise; ī sī īzunye gīkī ng'hana ūnitūmile bebe.

²²Na hangī ū nene naabinhile ī likūjo īlo ūninhile ū nene, gīkī babize balī mu būmò, gīt'ūmo bise tūlī būmò.

²³Ū nene mubo nū bebe mulī nene; ū būmò wabo būshikane mu gīko, ī sī īmane gīkī ū bebe h'ūyo ūnitūmile, na hangī gīkī ūbatogilwe nabo gīt'ūmo ūnitogelilwe ū nene.

²⁴Baba, natogilwe abo wamalile kūninha babize hamò nane. Balībone ī likūjo īlo ūninhile, nguno ūnitogilwe kwīngīīla kale, na a haho sī ītaalī kusumvwa.

²⁵Baba ntūngīlīja, a banhū ba mu sī batakūmanile, alīyo ū nene nakūmanile; na a benaba ī bamanile gīkī hū bebe ūyo ūnitūmile.

²⁶A benaba naabalangile ī lina lyako, hangī nakongeja ū kūbalanga, ū būtogwa wako ūmo ūnitogelilwe na a bene babize nabo, nū nene nabize hamò nabo.”