Read Sukuma Bible 2015 – Bibilia Ilagano Lya Kale 2015 Yohana 18 Bible Online

Yohana 18 - Sukuma Bible 2015 – Bibilia Ilagano Lya Kale 2015 bible

Yohana 18

¹Ū Yesu aho wamala kūhaya ī yenīyo wīnga a henaho, ūkīla longa lo Kiduloni; gwalīko ngūnda, ūūkingīla ng'wenūmo hamò na a bahemba bakwe.

²Ū Yuda, ū nodeeji wakwe, olī alīmanile ī lipandī lyenīlo; nguno ng'hangala ningī ū Yesu na a bahemba bakwe bamanhījaga mo.

³Hūna ū Yuda ūsola ibita lya bashilikale na balang'hani ba hekalu, kūfuma kū bagabīji bataale na Bafalisayo. Biza babachaga chenge na tala, kūnū babūūkije na shilanga.

⁴Ū Yesu olī ayīmanile īyo yizaga kūng'wilongela; hūna ūfumīla ha welekele ūbabūja, “Mulīnkooba nani?”

⁵Būnshokeja, “Yesu wa Nazaleti.” Nang'hwe ūbawīla, “Nene ūūy'aha.” Nū Yuda, ū nodeeji wakwe, walī wīmīīla hamò nabo.

⁶Aho wabawīla gīkī, “Nene ūūy'aha,” būshoka bashoka shigongwanuma, bukagwa ha sī!

⁷Nang'hwe ūbabūja hangī, “Bing'we mulīnkooba nani?” Būhaya, “Yesu wa Nazaleti.”

⁸Ū Yesu ūbashokeja, “Angū namuwīla hū nene. Na lūūlū ūlū mulīnikooba nene, balekagi aba baje.”

⁹Akahaya gīko kūlwa kūshikīlījiwa kwa mhayo ūyo walī wagūhaya; gīkī, “Abo wamalile kūninha natanjimīīgije nūūlū ūmò wabo.”

¹⁰Ū Simoni Petelo walī na līlūshū, ūlīsopoola ubuta gūtū go būlyo go ntūmami o ngabīji ntaale, gūtīnīka! Ī lina lyakwe ū ntūmami ng'wenūyo witanagwa Maluko.

¹¹Ū Yesu ūng'wīla ū Petelo gīkī, “Bebe, lūshoshage mu shilalo ū lūshū; nibūlī naleke ū kūshing'wa ī shikombe īsho waninhile ū Baba?”

¹²Hūna ī libita lya bashilikale nū ntaale wabo, hamò na a balang'hani ba hekalu abo baalī bafuma kū Bayudaya benabo, būndima ū Yesu būntunga.

¹³Būntwala kū ng'wa Anasi tame; nguno walī nkwiye o ng'wa Kayafa, ūyo olī ntaale o bagabīji ū ng'waka gwenūyo.

¹⁴Ū Kayafa hū ng'wene ūyo akabawīla a Bayudaya gīkī, “Shiigelile munhū ūmò abachīlīle a banhū.”

¹⁵Ū Simoni Petelo nang'hwe ūnkūūbīja ū Yesu, hamò na ng'hemba ūngī; ū ng'hemba ū ūngī ng'wenūyo walī amanīkile a ha ng'wa ntaale o bagabīji, na lūūlū ū wei akingīla nū Yesu ū mu gwalugwa ya ha ng'wa ntaale o bagabīji.

¹⁶Ū Petelo wīmīīla hanze, ha mīta. Ū ng'hemba ū ūngī, ūyo olī amanīkile a ha ng'wa ntaale o bagabīji, ūfuma wiza ūyomba nū nang'hani wa ha mīta, ūng'wingīja nū Petelo.

¹⁷Hūna ū ng'wanikī ūyo walang'hanaga a ha mīta ūmūja ū Petelo gīkī, “Gashinaga nang'ho ūlī ūmò wa bahemba bakwe ū munhū ng'wenūyo?” Nang'hwe ūhaya, “Yaya ū nene!”

¹⁸A batūmami na a bashilikale baalī bapemba moto bīmīīla henaho koota nguno yalī mbeho, nū Petelo ūūkīmīīla ho wandya nang'hwe koota.

¹⁹Hūna ū ntaale o bagabīji wandya kūmūgīlīja mihayo ya bahemba bakwe, nī ya kalangīle kakwe.

²⁰Ū Yesu ūnshokeja gīkī, Ū nene nalūbalangaga bo hape hape a ba mu sī; būlī gwa naalūlangaga mu masinagogi na mu hekalu, ūmo bakibilingīlaga pye a Bayudaya, natalangile mu kwibisa bisa na hado yaya.

²¹Nibūlī ūlīnibūja nene? Babūjage abo baliigwaga īyo nalūlangaga; baaba ūlībabona abo bīmanile īyo nalūlangaga.”

²²Aho wahaya gīko, ūmò wa balang'hani ba hekalu abo baalī bīmīīla hihī nang'hwe, ūntūla ipī ū Yesu. Ūng'wīla gīkī, Ūlīnshokeja ginehe ī gīko ū ntaale o bagabīji?”

²³Nang'hwe ū Yesu ūhaya, Ūlū nahaya mhayo gūhūbile būkaanīlage ū būhūbi, alīyo ūlū natūngīlīja, numho ūlīnitūlīla kī?”

²⁴Hūna ū Anasi ūntwala atungilwe, kū ng'wa Kayafa.

²⁵Ū Simoni Petelo walī ataalī īmīīlile akootaga moto; kwimanīla bamūja hangī gīkī, “Bebe ūtī ūmò wa bahemba bakwe gete ū munhū ng'wenūyo?” Ūlema no; alīhaya, “Yaya natī ng'wene!”

²⁶Hūna ūmò wa batūmami ba ha ng'wa ntaale o bagabīji ntaale, ndūgūye ūyo Petelo akantīna gūtū; ūhaya gīkī, “Bebe tūngīlījaga; natakūbonile nang'hwe gete ū mu ngūnda?”

²⁷Ūlema no hangī ū Petelo; haho na haho yūhīla ng'hungulume!

²⁸Hūna mu dilū, būng'wīnja ū Yesu a ha ng'wa Kayafa, būntwala kwikūlū. Kwike a boi būleka ū kwingīla ū mu numba ya h'ikūlū, gīkī batizūsosohala, bakaduuma kūlya pasaka.

²⁹Hūna ū Pilato ūfuma ī hanze aho baalī; ūbabūja gīkī, “Bing'we mulī na mihayo kī ī ya kūmūūla ū munhū ng'wenūyū?”

³⁰Būnshokeja būhaya gīkī, Ū ng'wenūyū ūlū ni atīītile yabūbi ni tūtang'wenhile ū kūlī bebe.”

³¹Hūna ū Pilato ūbawīla gīkī, “Nsolagi bing'we benekīlī mukaanamule gīt'ūmo shihayīlile ī shilagīlo shing'we.” A Bayudaya būng'wīla hangī gīkī, “A bise tūtazunīlījiwe kūbūlaga munhū ose ose!”

³²Īkaja gīko kūlwa kūshikīlījiwa kwa mhayo gwakwe ū Yesu, ūyo walī wagūhaya mu koolecha mbika ya lūfu ūlo akūcha.

³³Ū Pilato wingīla hangī ū mu kaya, ūng'witana ū Yesu ūmūja gīkī, Ū bebe, ūlī ntemi o Bayudaya?”

³⁴Nang'hwe ū Yesu ūnshokeja, Ū gwenūyo ūlīgūhaya bebe ng'wenekīlī dūhū, nūūlū bangī bakūwīlaga?”

³⁵Ū Pilato ūshosha, Ūliganika gīkī ū nene nalī Nyudaya? Angū a banhū b'ihanga lyako na a bagabīji bataale hū bene bakwenhaga ū kūlī nene; okenije kī?”

³⁶Ū Yesu ūshosha gīkī, Ū būtemi bone būtī bo mu sī; ū būtemi bone ūlū ni bo mu sī, ni banilwīlīlaga a batūmami bane, natizūtūūlwa mu makono ga Bayudaya, alīyo ī haha ū būtemi bone būtī bo heneha.”

³⁷Hūna ū Pilato ūng'wīla; “Gashinaga hū kūhaya ūlī ntemi ng'hana!” Nang'hwe ū Yesu ūshosha, “Bebe ūlīhaya gīkī nalī Ntemi. Ū nene nakabyalwa kūlwa nguno ya mhayo gwenūyū, nizile ū mu sī ūmu kūlwa kwīkaanīla ī ng'hana; būlī ng'wene ūyo alīmo ū mu ng'hana akwīdegelekaga īyo nakwīhayaga.”

³⁸Ū Pilato ūmūja gīkī, “Ī ng'hana ni kī?” Ū Pilato aho wamala kūhaya ī gīko ūfuma hangī ū kū Bayudaya. Ūbawīla gīkī, Ū nene natūbonaga būbi ū mulī munhū ng'wenūyū.

³⁹A bing'we mulī na shīmīle sha kūtaligūlīlwa munhū ūmò a ha pasaka, hamo namutaligūlīle ū ntemi wing'we Bayudaya?”

⁴⁰Būyoganya balīhaya gīkī, “Yaya ū ng'wenūyū; ūlū Balaba.” Alīyo ū Balaba olī nsambo!