Read Sukuma Bible 2015 – Bibilia Ilagano Lya Kale 2015 Yohana 19 Bible Online

Yohana 19 - Sukuma Bible 2015 – Bibilia Ilagano Lya Kale 2015 bible

Yohana 19

¹Hūna ū Pilato ūnsola ū Yesu, ūntūla mbooko.

²A bashilikale nabo baalī babeeja ngikili ya ming'hwa, būnzwalīkīja ū kū ntwe, būngumīīla na līshizwalo lya nzulunge.

³Bandya kūyūng'wegeela, ūlū bashika bahaya, “Hangamaga ntemi o Bayudaya”; hūna bantūla mapī!

⁴Ū Pilato akīīta ūfuma hanze hangī, ūbawīla a banhū gīkī, “Leki namufunīje hanze ū munhū ng'wenūyo, mumane gīkī ū nene natūbonaga būbi bose bose ū mulī we.”

⁵Ūfunyiwa hanze ū Yesu azwalile ngikili ya ming'hwa, nī līshizwalo lya nzulunge; hūna ū Pilato ūbawīla gīkī, “Nolagi ūūyū ū munhū ng'wene!”

⁶A bagabīji bataale na a balang'hani ba hekalu aho bamona būhamuka balīhaya gīkī, “Nkomage ha nsalaba, nkomage ha nsalaba!” Ū Pilato ūbawīla, “Nsolagi a bing'we muje mukankome; ū nene natūbūbonaga ū būhūbi bokwe.”

⁷A Bayudaya būnshokeja balīhaya, “A bise tūlī na shilagīlo, hūna lūūlū kūlwa shilagīlo shenīsho wigeleelagwa kūcha, nguno akwigīmbaga gīkī ū wei alī Ng'wana o ng'wa Mulungu!”

⁸Ū Pilato aho wigwa ū mhayo gwenūyo ogoha no.

⁹Wingīla hangī ū ng'wibanza; ūmūja ū Yesu gīkī, Ū bebe ūfumile halī ī gete?” Alīyo ū Yesu atanshokegije nūūlū hado!

¹⁰Ū Pilato ūng'wīla, Ūtūniyombyaga, ūtamanile gīkī ū nene nalī na būdūla bo kūkūtaligūla nūūlū kūkūkoma ha nsalaba?”

¹¹Ū Yesu ūnshokeja gīkī, Ū bebe ūtī na būdūla bo kūnīītīla mhayo nūūlū gūmò ūlū ni ūtinhilwe kūfuma kwigūlya; na lūūlū ūyo wanenhaga kūlī bebe alī na shibi shitaale kūtinda!”

¹²Kūfuma ikanza lyenīlo ū Pilato wandya kūkooba nzīla ya kūntaligūla; alīyo a Bayudaya būyoganya balīhaya gīkī, Ūlū ūlantaligūle ū ng'wenūyū, ūkūbiza ūtī nwani ng'wiye wa ng'wa Kaisali; nguno būlī ng'wene ūyo wiyīta ng'wenekīlī kūbiza ntemi, ū ng'wenūyo ng'wilwisha o ng'wa Kaisali.”

¹³Ū Pilato aho wīyigwa ī mihayo yenīyo ūmfunya hanze ū Yesu, wigasha h'isumbī lya kūlamulīla, lyalī ng'wibīndo lya mawe (ū mu Shihebulania litanwa Gabata).

¹⁴Ū lūshikū lwenūlo lwalī lwa kūlonja lonja kūlwa pasaka; ī likanza līkashika gītī sa itandatū. Hūna ūbawīla a Bayudaya gīkī, “Nolagi ūūyū ū ntemi wing'we!”

¹⁵Būhoolanīja balīhaya, “Ng'wīnjage, ng'wīnjage a henaha ūkankome!” Nang'hwe ū Pilato ūbawīla, “Nankome ū ntemi wing'we?” A bagabīji bataale būhaya, “A bise tūtī na ntemi ūngī ūlū atī Kaisali dūhū!”

¹⁶Ng'hana nose ūntūūla mu makono gabo, bakankome! Hūna būnsola ū Yesu būntwala Hūna būnsola ū Yesu būntwala.

¹⁷Nūwe waja wibūūkījaga ū nsalaba gokwe, ūūkashika h'ipandī līkitanagwa lūpanga.

¹⁸Aho bashika henaho būnkoma a ha nsalaba; na bangī babīlī būkong'wa hamò nang'hwe, ūmò kūūnū na ūngī kūūnū, ū Yesu ha gatī.

¹⁹Ū Pilato wandīka wandīke būtūūlwa a higūlya ya nsalaba; boolī būhayile gīkī, “Yesu muna Nazaleti, ntemi o Bayudaya.”

²⁰Bayudaya bingī babūsomaga ū wandīke wenūbo, nguno ī lipandī īlo akakomelwa ū Yesu lyalī hihī nū nzengo; hama ū wandīke boolī ndīmi idatū, Shihebulania, na Shilatini, na Shiyunani.

²¹A bagabīji bataale ba Bayudaya būng'wīla ū Pilato, Ūtandīkage ‘Ntemi wa Bayudaya,’ andīkaga gīkī, ‘Ū munhū ng'wenūyū olihayaga wei gīkī ntemi o Bayudaya.’”

²²Nang'hwe ū Pilato ūshosha, “Īyo nandīkaga namalaga kwandīka!”

²³Hūna lūūlū a bashilikale abo banang'hanaga ū Yesu būshisola ī shizwalo shakwe būshigabanhya magele ane, būlī ng'wene ūpandīka shakwe. Ū ng'wenda gwa kūzwala mu gatī gwalī gūtī na būlūngījo ū mu kasumīlwe kago, gwalī gūmò na gūmò dūhū; gūshibanyiwe kwīngīīla kwigūlya kūshisha kū sīlīlī.

²⁴Biwīla gīkī, “Tūtizūgūtandūla, tugutulīlaga mbale tūbone gūkūbiza go ng'wa nani.” Ū mu kwīta gīko shūshikīīla ī shandīkwa īsho shihayile gīkī, “Bakashigabanha ī shizwalo shane, ng'wenda gwane būgwesela mbale!” H'ūmo bakīītīla a bashilikale benabo.

²⁵Ū nina olī wīmīīla haho hihī nū nsalaba; baalī hamò na ng'wanong'wawe, na Malia nke wa ng'wa Kilopa, hamò na Malia Magadalena.

²⁶Ū Yesu ūmona ū nina wīmīīlaga hihī nū ng'hemba ūyo walī antogilwe; ūng'wīla gīkī, “Mayū nolage ū ng'witūnja wako.”

²⁷Nū ng'hemba ūng'wīla gīkī, “Ndīlīlage ū noko!” Na ng'hana kūfuma ikanza lyenīlo ū ng'hemba ng'wenūyo ūja nang'hwe kū ng'wakwe.

²⁸Hun ū Yesu aho wamana gīkī yashikana pyī ī yose shishikīlījiwe ī shandīkwa, ūhaya; “Nakolwa nota.”

²⁹Hihi henaho shalīho shiseme shokolile būgota būlūlū, būsola ibbūpya būlīlobeka ū mu būgota wenūbo, būlītunga kwigito lya ntī gwa husopo, būlīnunja būntūūlīla ū kū nomo.

³⁰Ū Yesu aho wabūng'wa ū būgota wenūbo ūhaya, “Yashila!” Winamya ū ntwe ūgūfunya ū moyo gokwe.

³¹Ū lūshikū lwenūlo lwalī lwa kūlonja lonja kūlwa sabato; a Bayudaya būja ū kūlī Pilato būūkalomba gīkī abo baalī bakong'wa ha misalaba babīnzwe a magūlū bīnjiwe ho, ī mibimba ītizikala henaho ī likanza lya sabato; nguno ī sabato yalī nhaale.

³²Biza a bashilikale, būmīnza a magūlū ū wa kwandya, ūyo walī akomilwe hamò nū Yesu. Būnsanga nū ūngī, nang'hwe būmīnza.

³³Alīyo aho bashika a halī Yesu, būbona gīkī walī wamala kūcha, būleka ū kūmīnza a magūlū gakwe.

³⁴Kwike ūmò wa bashilikale ūnchima n'ichimu lyakwe mu lūbazu; haho na haho gidīka mininga na minzī!

³⁵Ūyo akabona hū ng'wene alīkaanīla, nīyo ū būkaanīji bokwe būlī bo ng'hana. Amanile gīkī alīhaya ya ng'hana, nguno atogilwe ning'we muzunye.

³⁶Ī yenīyī īkaja gīko kūlwa kūshikīlījiwa kwa shandīkwa īsho shihayile gīkī, “Iguha lyakwe lītūbīnzwa.”

³⁷N'ipandī līngī shihayile gīkī, “Bakūng'wiloleela ūyo bakanchima!”

³⁸Hūna Yosefu muna Alimataya ūja ū kūlī Pilato, ūūkanomba agūsole ū mīlī go ng'wa Yesu. Ū Pilato ūnzunīlīja ū munhū ng'wenūyo, ūshika ūgūbūūcha ū mīlī go ng'wa Yesu. Nīyo nang'hwe olī ng'hemba okwe, kwike mu mbisīla kūlwa kūbogoha Bayudaya.

³⁹Nū Nikodemo ūyo ī kwandya walī waja ū kūlī Yesu būjikū, wiza abūūkije būgota winge, būsangije maguta ga ngazu.

⁴⁰Hūna būgūbūūcha ū mīlī go ng'wa Yesu, būgūlingīīla shitambaala sha ng'wenda gwa kitaani, hamò nū būgota wenūbo; gīt'ūmo shalī shīmīle sha kajīkīle ka Bayudaya.

⁴¹A h'ipandī lyenīlo akakomelwa ū Yesu gwalīho ngūnda, ū mu ngūnda gwenūyo shalīmo shigila shipya, gūtaalī kūlaajiwa mo mimba go munhū.

⁴²Na lūūlū īkī ī shigila shenīsho shalī hihī henaho, būntūūla ng'wenūmo ū Yesu; nguno nīyo ū lwenūlo lwalī lūshikū lwa kūlonja lonja kwa Bayudaya.