Read Sukuma Bible 2015 – Bibilia Ilagano Lya Kale 2015 Yohana 7 Bible Online

Yohana 7 - Sukuma Bible 2015 – Bibilia Ilagano Lya Kale 2015 bible

Yohana 7

¹Ha numa ya yenīyo, ū Yesu ūbiza wa kūyūyeelela mu Galilaya dūhū, oya ū kūyeelela ī Būyudaya; nguno a bana Būyudaya bakayūkooba kūmūlaga.

²Aho shegeela shigukulu sha Bayudaya ī sha Maduku,

³a bazunaye būng'wīla gīkī, “Īngaga shi lūūlū nū kūūnū, ūje na Būyudaya; nū kwene bakībone a bahemba bako ī milīmo yako īyo ūkwīyītaga!

⁴Wiyoolecha hape ū kū banhū bayūbona ūmo ūkwītīlaga; nguno atīho munhū nūūlū ūmò ūyo akakoobaga kūmanīka, alīyo hangī ū kūnū wibisa bisa ū mu katūmamīle kakwe!”

⁵A bazuna ye nabo baalī bataalī ū kūnzunya.

⁶Nang'hwe ū Yesu ūbawīla, “Lītaalī ū kūshika ī likanza lyane ū nene, ī ling'we ī lyene līlīho gwa dūhū.

⁷A ba mu sī batīko ū kūmukolwa a bing'we, ū nene banikolilwe, nguno nakūbakaanīlaga gīkī ī milīmo yabo yabubi.

⁸Jagi a bing'we ū kū shigukulu, ū nene natūjaga ī haha ū kū shigukulu shenīshi, nguno ī likanza lyane lītaalī ū kūng'wa.”

⁹Aho wabawīla ī yenīyī wikala Galilaya.

¹⁰Bahayūja a bazunaye ū kū shigukulu, nū wei ūja, alīyo mu mbisīla, ītī mu kwiyoolecha bo hape.

¹¹A Bayudaya aho balī ū mu shigukulu būyūnkooba, kūnū bakwiwīlaga, “Alī halī ū ng'wene ī gete?”

¹²Yūbūūka yombo nhaale ū ng'wibita kūlwa nguno yakwe; bangī būyūhaya, “Owiza;” alīyo bamò bahayaga, “Yaya akūlembagūlaga banhū dūhū!”

¹³Kwike walī atīho nūūlū ūmò, ū wa kūgima kūng'haya hape hape, nguno ya kūbogoha Bayudaya.

¹⁴Aho shashika ha gatī gatī ī shigukulu, ū Yesu wingīla ū mu hekalu, wandya kūlanga.

¹⁵A Bayudaya būyūkumya balīhaya gīkī, Ū ng'wenūyū ashimanile ginehe ī shandīkwa ū wei, alīyo atalangilwe nūūlū kūlangwa?”

¹⁶Ū Yesu ūbashokeja ūhaya gīkī, Ū būlangi ūbo nakūlangaga būtī bone bo ng'wenekīlī, būlī bokwe ūyo anitūmile.

¹⁷Ūlū munhū ūkooba kwīta īyo ayītogilwe ūyo anitūmile, akūwitegeleja ū būlangi wenūbū ūlū gīkī būfumile kūlī Mulungu, nūūlū nakūhayaga yane ng'wenekīlī dūhū.

¹⁸Ūyo akahayaga yakwe ya ng'wenekīlī, akikoobelaga ikūjo lyakwe. Alīyo ūyo akakoobaga ikūjo lyakwe ūyo antūmile, ū ng'wenūyo alī wa ng'hana, na hangī ū mulī wei būtīmo būbi.

¹⁹Ī gīsī ū Musa atang'winhile shilagīlo a bing'we, alīyo atīho nūūlū ūmò wing'we ūyo akashishikīlījaga? Hama ī gīsī nibūlī mulīkooba kūnibūlaga?”

²⁰A banhū būnshokeja gīkī, “Hamo ūlī n'ihūgi shi ī gete, nani ūyo alīkooba kūkūbūlaga?”

²¹Nang'hwe ū Yesu ūshosha ūbawīla, “Nakabeeja nīmo gūmò, pye a bose ng'wandya kūkumya!

²²A bing'we mukasaalaga munhū nūūlū ha sabato, īkī Musa wang'winha shilagīlo sha kūsaala, (nūūlū īkī shitafumile kūlī wei, alīyo kū bakūlūgenji).

²³Mubonile īlī būgatū ū munhū ū kūsaalwa nūūlū ha sabato, gīkī shilagīlo sha ng'wa Musa shileke kūkenaagūlwa, hama ū nene nibūlī mukanipelanīla kūlwa kūpīja munhū ha sabato?

²⁴Mutasolanhyage ū mu kalamulīle king'we, ng'ūlamula mu būtūngīlīja.”

²⁵Kwitulwa bana Yelusalemu balebe bandya kūbūja gīkī, Ū ng'wenūyū, atī ng'wene ūyo bakūkoobaga kūmūlaga?

²⁶Hama ī haha angū lolagi alīyomba hape hape dūhū, alīyo batūng'wītīlaga nūūlū mhayo, hamo shi ī gete a basugi bamanile gīkī hū ng'wene ū Kilisito?

²⁷Alīyo nahene ū ng'wenūyū tūmanile shi ūko afumile, lelo ū Kilisito ng'wenekīlī ūlū wiza, ndūhū nūūlū munhū ūmò ūyo akūmana ūko afumīīle!”

²⁸Hūna ū Yesu aho alīlanga ū mu hekalu, ūhamuka n'ilaka lya higūlya ūhaya gīkī, “Na ng'hana bizagi munimanile ū nene, pyī nū kūko nafumile. Kwike natizile kūlwane nene ng'wenekīlī, ūyo anitūmile ng'wene ntūngīlīja; alīyo a bing'we mutaamanile!

²⁹Ū nene naamanile nguno nafumile kūlī wei, hangī hū ng'wene ūyo anitūmile.”

³⁰Būhaya kūndima, alīyo īkī ī likanza lyakwe lyalī lītaalī ū kūshikana, atigelile nūūlū ūmò wa kūngoloolela makono.

³¹Ū ng'wibita lyenīlo bakakwīla a banhū ba kūnzunya, būyūhaya gīkī, Ū Kilisito ūlū alize, akwīta mitaale kūtinda īyo akwītaga ū ng'wenūyū?”

³²A Bafalisayo būbigwa a banhū bakūng'hayaga mihayo īlī gīko mu kūng'ung'uula ng'ung'uula. Hūna a bagabīji bataale na a Bafalisayo būtūma bashilikale, gīkī baje bakandime.

³³Nang'hwe ū Yesu ūhaya, “Lyasaagaga ikanza ido no ī lya kwikala hamò ning'we ū nene; najile kūlī we ūyo anitūmile.

³⁴Mukūnikooba alīyo mutūnipandīka, nīyo mutūdūla ū kwiza ūko nalīkikala.”

³⁵A Bayudaya bandya kwilūnjalūnja boi benekīlī baliwīla gīkī, Ū ng'wenūyū, alīhaya kūja halī ūko dūtūdūla ū kūmpandīka a bise? Hamo alīhaya kūja kū balobeji ba kū sī ja Bayunani ayūbalanga na Bayunani kwenūko!

³⁶Ū mhayo gwenūyū wagūhaya, ni gūlī na makūlū kī? ‘Ī gīkī, Mukūnikooba alīyo mutūnipandīka,’ nī gīkī, ‘Ūko nalīkikala mutūdūla ū kwiza ko?’”

³⁷A ha lūshikū lo kūmalīja shigukulu, ūlo lūlī lūshikū lūtaale, ū Yesu akīmīīla ūhamuka n'ilaka lya higūlya ūhaya gīkī, “Ose ose ūyo akolilwe nota ni izage kūlī nene ang'we.

³⁸Ūyo ūnizunya, myongo ya minzī gabupanga īkwandya kūsela kūfuma mulī we, gīt'ūmo shandīkwa shihayīlile.”

³⁹Ū mhayo gwenūyo akagūhaya kūlwa ng'wa Moyo Ng'wela, ūyo bakūng'wanukūla a bazunya; nguno ū Moyo walī ataalī ū kwiza, īkī ū Yesu walī ataalī ū kūgūngūhiwa.

⁴⁰Hūna bangī ū ng'wibita aho bīyigwa ī mihayo yenīyo, būhaya gīkī, “Ī gete ū ng'wenūyū hū ng'wene ū Ng'hangi!”

⁴¹Bangī gīkī, Ū ng'wenūyū Kilisito!” Alīyo bamò būhaya, Ū Kilisito afume Galilaya?

⁴²Tūhaya ī shandīkwa shihayile gīkī ū Kilisito alī wa lūganda lo ng'wa Daūdi, na gīkī akūfuma Betelehemu, igūngūli īlo lyalī lya ng'wa Daūdi?”

⁴³Būbiza bikīla kīla a banhū kūlwa nguno yakwe.

⁴⁴Bamò babo būyūgengagenga kūhaya kūndima, alīyo atigelile nūūlū ūmò wa kūngoloolela nkono gokwe.

⁴⁵Nose a bashilikale būshoka ū kū bagabīji bataale na a Bafalisayo, būshikīla kūbūjiwa gīkī, “Nibūlī ng'waneka?”

⁴⁶A bashilikale benabo būshosha balīhaya gīkī, “Ataalī kūyomba munhū nūūlū ūmò gīt'ūmo akūyombelaga ū munhū ng'wenūyū!”

⁴⁷A Bafalisayo būbawīla, “Gashi hangī na a bing'we ng'wakalemva lemva!

⁴⁸Ī gīsī nani ū mu basugi, nūūlū ū mu Bafalisayo ūyo anzunije ū munhū ng'wenūyo?

⁴⁹Lelo ī libita lya banhū īlī, a bene angū bazumilwe dūhū; nguno nīyo nī shilagīlo batashimanile!”

⁵⁰Ūmò wabo, Nikodemo, ūyo walī waja kūlī Yesu ī kwandya, ūbawīla gīkī,

⁵¹“Bing'we ī shilagīlo shise shikanamulaga ū munhū nūūlū ataalī kūdegelekwa tame, īmanwe īyo akūyītaga?”

⁵²Nabo būnshokeja balīng'wīla gīkī, Ū bebe nang'ho, ūlī muna Galilaya hamo shi ī gete? Gīsīlījaga, ūkūbona nang'ho ī gīkī ataalī kwilonga ng'hangi kūfuma Galilaya nūūlū kamò!” [

⁵³Hūna busalang'hana, būlī ng'wene ūja kū ng'wakwe.