Read Sukuma Bible 2015 – Bibilia Ilagano Lya Kale 2015 Shītwa sha Batung'wa 19 Bible Online

Shītwa sha Batung'wa 19 - Sukuma Bible 2015 – Bibilia Ilagano Lya Kale 2015 bible

Shītwa sha Batung'wa 19

¹Ū Apolo aho alī Kolinto, ū Paulo wajaga akūbītaga kū sī ja kū magūlya. Hūna ūtulumenha ajile Efeso; ūsanga koi bahemba balebe.

²Ūbabūja, “Aho ng'wazunya mukang'wanukūla ū Moyo Ng'wela?” Būnshokeja balīhaya, “Tūtaalī nūūlū kwigwa gīkī alīho na Moyo Ng'wela!”

³Ūbabūja hangī gīkī, “Hama ng'wabatīījiwa būbatīījiwa kī lūūlū?” Nabo būng'wīla, “Mu būbatīīja bo ng'wa Yohana Matīīja.”

⁴Hūna ū Paulo ūbawīla gīkī, “Ū Yohana wabatīījaga būbatīīja kūlwa nguno ya kūgalūka; wabakomelejaga a banhū kūnzunya Yesu, ūyo olī gīkī akwiza ha numa yakwe.”

⁵Aho bigwa gīko būbatīījiwa mu lina lya ng'wa Seeba Yesu.

⁶Ū Paulo aho wabatūūlīla makono ūbikīīla ū Moyo Ng'wela, bandya kūlūngalūnga mu ndīmi jingī, na kūhanga.

⁷Baalī bagosha gītī ikūmi na babīlī.

⁸Akamala myeji idatū akwingīlaga ng'wisinagogi walūngalūnga nabo mu kwisandaala, kūnū akūbalomeelaga na kūbaduta mu mihayo ya būtemi bo ng'wa Mulungu.

⁹Alīyo bamò babo baalī bagang'hanazu na badalahi, bandya kwīsondagūla ī Nzīla yenīyo kū būtongi bo banhū. Ū Paulo ūbaleka, ūbīnja a bahemba; wandya kūyūbalanga būlī lūshikū ng'widalasa lya ng'wa Tulano.

¹⁰Ūmala myaka ībīlī akūgūtūmamaga ū nīmo gwenūyo, kūshisha pye a bikaji ba Asia, babize Bayudaya nūūlū Bayunani, būgwigwa ū mhayo go ng'wa Seeba.

¹¹Ī shītwa īsho akayūbeeja ū Mulungu mu nzīla ya makono ga ng'wa Paulo shalī sha kūkumya no, shikīlile kasomboolele!

¹²Nose na basaatu būyūpījiwa kūlwa kūtwalīlwa shizwalo na shitambaala īsho shalī shakuumiwa ha mīlī gokwe; na a babo baalī na masamva gabafumaga.

¹³Ū mu shikū jenījo bakigela na Bayudaya balebe, bayeelaga hose hose bakūgemaga kūpeeja masamva mu lina lya ng'wa Seeba Yesu. Balītūmamīlaga ū kū banhū ba masamva balīhaya gīkī, “Nalīmupeeja mu lina lya ng'wa Yesu ūyo akūlomeelagwa na Paulo.”

¹⁴Ū mhayo gwenūyū bakagwīta na bitūnja mpungatī ba Nyudaya ūmò ngabīji ntaale, witanagwa Sikewa.

¹⁵Alīyo ī lisamva lyūbashokeja līlīhaya, “Ū Yesu naamanile, nū Paulo nang'witegelegije, al'a bing'we mulī banani?”

¹⁶Ū munhū ūyo walī n'isamva ūbasakamīla, ūbaheeba kībi kībi; ūbatandagūja ī shizwalo! Kwike būpūlūgūka, būpuluka ū mu numba yenīyo, alīyo balī dūūhū, na bajimaga machūbagūkīle!

¹⁷Ū mhayo gwenūyo būgūmana pye a bikaji ba mu Efeso; a bose, Bayudaya na a Bayunani, būgwīlwa booba. Ī lina lya ng'wa Seeba Yesu lyūkūjiwa.

¹⁸Bingī abo bakazunya būyūfunya būkaanīji bakwīsomboolaga īyo bīyītaga.

¹⁹Bamò baalī balogi; bingī babo būshikuminga ī shitabo shabo shūpemva kū būtongi wa banhū bose. Aho gwabalwa ū mpango gwa shitabo shenīsho, shūbonekana shipande shihūmbī makūmi atanò sha feza.[4]

²⁰Ū mu gīko ū mhayo gūkongeja kūbiza na nguzu, na kūsambaala hose pye kūlwa būdūla bo ng'wa Seeba.

²¹Aho yabīta ī yenīyī, ū Paulo ūbona ū mu moyo gīkī abīte Makedonia akaje Akaya, hūna akalūmbūlīle kūja Yelusalemu; ūhaya, “Ūlū nalashike ū kwenūko shinigelile naje nī Lumi nakabone nū kwene.”

²²Hūna ūbatūma babīlī ba bagunanhi bakwe, ba Timotheo na Elasto, būtonga ī Makedonia; ū wei ūlenda ho hado ū mu Asia.

²³Jūbīta shikū kaganda ataalī alīho, kūhayimanīla gwigela nsambo kūlwa nguno yayo ī Nzīla yenīyo.

²⁴Walīho nsuji nebe o feza witanagwa Demetilio, wabeejaga shiikolile sha feza sha hekalu ya ng'wa Alitemi. Ū mu gīko batūmami bapandīkīlaga milīmo mingī a ha ng'wakwe.

²⁵Hūna lūūlū ū munhū ng'wenūyo ūbakuminga abo balīīlaga ū mu nīmo gwenūyo; ūbawīla gīkī, “Bagosha, angū mulībona gīkī ū nīīlo gwise gūlī mu nīmo gwenūyū.

²⁶Alīyo ī haha hū mulībona, nū kwigwa muliigwa, gīkī ū Paulo ng'wenūyū wahūmbūūlile banhū bingī. Nīyo ītī mu Efeso ūmu dūhū, hihī pye a hose ū mu Asia; akūjaga ūhaya gīkī angū batī bamulungu abo bakabeejiagwa na makono.

²⁷Nose hū kūhaya ū nīīlo gwise gwenūyū gūlī mu nhabaala ya kwingīla mu kūdalahwa; hama nī hekalu ya ng'wa mulungu wise ū nkīma, ū Alitemi nī yene īlī mu kwihīga kwa kūbalwa gīkī ītī na solobo. Nī likūjo lyakwe nalyo līkwika, alīyo ī Asia ī yose īkanamyaga; nīyo pyī dūhū a hose ū mu sī.”

²⁸Aho bigwa gīko būpelana no, bandya kūyoganya balīhaya gīkī, “Ū Alitemi wa Baefeso ng'wene ntaale!”

²⁹Pyī ū nzengo gūyuugūka, būbahaja biye ba ng'wa Paulo, ba Gayo na Alisitako bana Makedonia, būbatwala kwinumba lya kwiloleelela mabina na mawigusha; pye a banhū būlilimūka nhambo bajile ko.

³⁰Alīyo ū Paulo aho wihamba ū kūja kwigulanya ū ng'wibita, būnemeja a bahemba.

³¹Hama bamò ba batongeeji baalī banwani biye, būtūma nhūng'wa balīng'wikūmbīlīja atizūkiyoolecha ū kwinumba lyenīlo.

³²Abo baalīho hoi, būlī bene bayoganyaga balīhaya mihayo yabo dūhū. Nīyo īkī gwalī nsambo, a bingī baalī batamanaga nī shisho shalī shabenheleja kwibilinga.

³³Ū ng'wibita lyenīlo baalīmo na Bayudaya; hūna a bene būnsola Isikanda, būng'wīla abahuumūje a banhū. Ng'hana wandya kūbahūngīja nkono gīkī abasomboolele.

³⁴Kwike aho badeeba gīkī walī Nyudaya nang'hwe, būhoolanīja pye a bose bakūyoganyaga n'ilaka lya higūlya, nose lyūshika ikanza lya sa gītī ibīlī balīhamuka būhaya gīkī, “Ū Alitemi wa Baefeso ng'wene ntaale!”

³⁵Nose kalani ntaale wa mu nzengo ūbahuumūja, hūna wandya kūbawīla gīkī, “Bing'we bababa Baefeso, munhū kī ūyo atamanile gīkī ū nzengo gwa Baefeso gūkalang'hanaga hekalu ya ng'wa Alitemi ū ntaale, hamò nī shikolo īsho shikagwa kūfuma ng'wigūlū?

³⁶Ali lūūlū īkī ī mihayo yenīyī atīho munhū nūūlū ūmò ūyo ashikile kwīyihalalīja, īlī yawiza muhuumūle; ītīho nguno ya kwīta nsambo.

³⁷Nguno ahene ng'hana a banhū benaba ng'wabenhaga, alīyo batasolile shikolo shose shose sha mu hekalu ying'we, nūūlū bataalī kūndūkagūla ū mulungu wing'we.

³⁸Hū kūhaya ū Demetilio na a batūmami biye ūlū gīkī balī na mhayo gwa kūmūūla munhū ose ose, galīho a mabanza, na a balamuji balīho; ni bajage kwenūko bakīmīīle.

³⁹Hama nūūlū gūbize gūlīho mhayo gūngī gose gose ūyo mulīgūkooba, pyī ī yose yenīyo īkūlolwa ha lūbanza ūlo lūzunīlīgije.

⁴⁰Al'ī mbika īyo twabeejaga ī lelo īyī, īshikile kūtwenheleja kwinhwa nsango kūlwa kwenheleja nsambo, nguno tūtī na nzīla yose yose ya koolecha ni shikolo kī īsho shatūbilingaga gīkī aha.”

⁴¹Aho omala kūhaya gīko ūbawīla a banhū kūsambaala.