Read Sukuma Bible 2015 – Bibilia Ilagano Lya Kale 2015 Shītwa sha Batung'wa 3 Bible Online

Shītwa sha Batung'wa 3 - Sukuma Bible 2015 – Bibilia Ilagano Lya Kale 2015 bible

Shītwa sha Batung'wa 3

¹Lūshikū lūmò makanza ga sa kenda, Petelo na Yohana bajaga mu Hekalu kūjūlomba.

²Walīho ngosha nemehazu kūfuma mu nda ya ng'wa nina, wabūūchiagwa būlī lūshikū, wiza watūūlwa ha mīta gwa hekalu, gwalīho gwitanagwa “Nsoga.” Hūna a banhū ūlū balingīla ū mu hekalu, wayūlomba bang'winhe shose shose.

³Aho wababona a ba Petelo nū Yohana begeela kwingīla ū mu hekalu, ūbalomba bang'winhe shikolo.

⁴Nabo a ba Petelo nū Yohana būnkalalīla; hūna būng'wīla gīkī, “Bebe alitūlolage!”

⁵Ng'hana ūbalola, kūnū alisagīlwa kwanukūla shikolo kūfuma kūbo.

⁶Alīyo ū Petelo ūng'wīla gīkī, “Ū nene natī na sabo nūūlū hela, kwike nakūkwinha īsho nalī nasho. Mu lina lya ng'wa Yesu Kilisito wa Nazaleti, būūkaga ūshimīze.”

⁷Hūna ūndima ū nkono gwa būlyo, ūngūngūmūla; ī likanza lyenīlo ūguzuhiwa ū mu mhambala, nū mu maguha ga mu shing'ongwa shakwe.

⁸Ūbūūka, wikīndīka; wandya kūshimīza. Wingīla nabo ū mu hekalu akūshimīzaga kūnū ūsata sata na kūnkumīlīja Mulungu!

⁹Pye a banhū būmona alīshimīza, kūnū akūnkumīlījaga Mulungu.

¹⁰Būng'witegeleja gīkī, hū ng'wene ūyo wikalaga igashije akwilombelejaga ha mīta gwa hekalu ūyo gūkitanagwa Nsoga. Bakakumya no, gūbajinjimaja ū mhayo ūyo gūkang'wilongela gwenūyo.

¹¹Ūyo akapījiwa kūfuma mu būlemehazu ng'wenūyo, akikala abadimile a ba Petelo nū Yohana, nose būshika ng'wibīndo litanagwa lya ng'wa Solomoni. A banhū bakakumya no, pye a bose būyūpeela bajile mo.

¹²Ū Petelo aho wababona a banhū ūbawīla gīkī, “Bing'we bababa Baisilaeli, nibūlī mulīgūkumya ū mhayo gwenūyū, nūūlū nibūlī mulītūkalalīla a bise gītī twagwītaga na būdūla wise, nūūlū gīkī ū munhū ng'wenūyū twang'winhaga būdūla bo kūshimīza kūlwa wela wise?

¹³Ū Mulungu wa ng'wa Abulahamu na Isaka na Yakobo; ū Mulungu wa bakūlūgenji bise, wangūngūhije ū Ntūmami wakwe ū Yesu, ūyo mukanodeela, na kūnema kū būtongi bo ng'wa Pilato, nūūlū īkī ū Pilato ng'wenekīlī walī wamala kūlamula gīkī antaligūle.

¹⁴Alīyo a bing'we ng'ūnema ū Ng'wela na Ntūngīlīja, ng'ūlomba kwinhwa munhū mūlagi.

¹⁵Lelo ū Ng'winhi wa būpanga ng'ūmūlaga, alīyo ū Mulungu wanjūūkije kūfuma mu bafu, hama a bise hū tūlī bakaanīji bakwe.

¹⁶Hūna lūūlū, kūlwa kūlīzunya ī lina lya ng'wa Yesu, ū munhū ūyū muumanile na kale ng'wenūyū mulīmona waguzuhiagwa mu lina lyenīlo. Ū mhayo gwa kūlīzunya ī lina lyenīlo hū gwene ūyo gwang'winhaga mhola nshikanu gīkī kū būtongi wing'we!

¹⁷Kwike badūgū bane, namanile gīkī a bing'we na a batongeeji bing'we ng'wīyīta ī yenīyo mu būtūmana.

¹⁸Alīyo ū mu gīko gūkashikīīla ū mhayo go ng'wa Mulungu, ū gwa kūluhiwa kwa ng'wa Kilisito wakwe, gīt'ūmo walī wahayīla kūfuma kale, mu nzīla ya bahangi bose.

¹⁹Ali lūūlū, galūkagi ng'wīnge ū mu shibi shing'we, shijimangūchiwe; makanza ga kwifuujiwa gize kūfuma kūlī Seeba.

²⁰Antūme ū Yesu Kilisito, ūyo ahelilwe kūlwa nguno ying'we kūfuma kale na kale,

²¹ūyo shing'wigeleelilwe kwikala ng'wigūlū kūshisha gashike a makanza ga shikolo shose kūgalūchiwa shibize hangī gīt'ūmo shaalī na kale; ūmo Mulungu ahayīlile kūfuma kale, mu nzīla ya bahangi bakwe beela.

²²Nguno ū Musa akahaya gīkī, ‘Ū Seeba Mulungu wing'we akūmubūūkīja kūfuma mu badūgū bing'we ng'hangi wa kūbiza gītī nene; ū ng'wenūyo shiigelile mung'wigwe mu yose īyo alamuwīle.

²³Munhū ose ose ūyo atūng'wigwa ū ng'hangi ng'wenūyo, akūkenaagūlwa īnjiwe gete ū mu banhū.’

²⁴Pye a bahangi, kūfuma kūlī Sang'weli, na a babo bakalondeela ha numa yakwe, bajihayaga na kūjikumūcha ī shikū jenīji.

²⁵A bing'we mulī baana ba bahangi, na ba būlagane ūbo Mulungu akabeeja na bakūlūgenji bise; gīt'ūmo akang'wīlīla Abulahamu gīkī, ‘Pyī ī ng'anda ja mu sī jikwīlūkīlwa lubango mu nzīla ya būbyīle wako.’

²⁶Ū Mulungu aho wanjūūcha ū Ntūmami wakwe akantūma kū bing'we tame, gīkī anekeje na kūmfuha būlī ng'wene ūyo alagalūke kwīnga mu shibi shakwe.”