Read Sukuma Bible 2015 – Bibilia Ilagano Lya Kale 2015 Shītwa sha Batung'wa 9 Bible Online

Shītwa sha Batung'wa 9 - Sukuma Bible 2015 – Bibilia Ilagano Lya Kale 2015 bible

Shītwa sha Batung'wa 9

¹Alīyo ū Saulo walī ataalī afuulile maleewe kūlwa būpelanu na kūbilumīla ng'haya a bahemba ba ng'wa Seeba, hūna ūja kūlī ngabīji ntaale.

²Ūūkalomba nyalūba ja kūja kū masinagogi ga Damasko, gīkī ūlū alabapandīke ko bose bose abo balīmo ū mu Nzīla yenīyī, bagosha na bakīma, abadime abatunge na kūbatwala Yelusalemu.

³Hūna aho ajile, ohayegeela ī Damasko, kwimanīla būpe būng'weku bo kūfuma ng'wigūlū bong'wikīīla būmpīndije.

⁴Ūgwa ha sī pu; wigwa ilaka līlīng'wīla gīkī, “Saulo Saulo, nibūlī ūlīniluhya?”

⁵Ūbūja, “Ūlī nani Seeba?” Nang'hwe ūshosha, “Nalī Yesu ūyo ūlīniluhya!

⁶Alīyo būūkaga ūshikīīle ū mu nzengo, ūkūjūwīlwa ng'wenūmo ūyo gūkwigelile ūgwīte.”

⁷A banhū abo washimīzaga nabo bīmīīla badedebalile, nguno ī lilaka baliigwaga alīyo batamonile munhū!

⁸Ū Saulo aho wabūūka a ha sī, wahayūloleecha a miso gakwe, atabonile nūūlū hado; būndima nkono būnshikīlīja ū mu Damasko.

⁹Akamala shikū idatū atūbonaga, hama ndūhū kūlya nūūlū kūng'wa shose shose.

¹⁰Ū mu Damasko ng'wenūmo walīmo ng'hemba nebe witanagwa Anania, ū Seeba ūng'witana mu koolechiwa, “Anania;” nang'hwe ūhaya, “Nalīho Seeba.”

¹¹Hūna ū Seeba ūng'wīla, “Būūkaga ūje ū kwikūūwa īlo līkitanagwa igololoku, ūlū ūlashike ko ūbūje ha ng'wa Yuda. Alīho hoi munhū akitanagwa Saulo, muna Taso, alīlomba.

¹²Wamonaga mu koolechiwa munhū ūmò akitanagwa Anania, alingīla na kūntūūlīla makono gīkī abone.”

¹³Nang'hwe ū Anania ūshosha ūhaya, “Seeba ū munhū ng'wenūyo nayigwile mingī ī mihayo yakwe īyo akūbīītīlaga a beela bako ī Yelusalemu.

¹⁴Na a henaha alī na būdūla winhilwe kūfuma kū bagabīji bataale, gīkī abatunge pye abo bakūlīkumīlījaga lina lyako!”

¹⁵Nang'hwe ū Seeba ūng'wīla, “Jaga ko dūhū, nguno ū munhū ng'wenūyo alī shitūmamīlo shane shisolwa, kūlwa kūlītwala lina lyane kū mahanga na batemi, na kū Baisilaeli.

¹⁶Nakūng'oolekeja mingī īyo shiigelile aluhiwe muyo kūlwa lina lyane.”

¹⁷Hūna ū Anania ūja ng'hana; aho wakingīla ū mu numba, ūntūūlīla makono, ūhaya gīkī, “Ndūgū Saulo, ū Seeba Yesu ūyo walī wakwilongelile mu nzīla aho ūliza, wanitūmaga. Ali lūūlū, anukūlaga būdūla bo kūbona; nīyo okajiwe na Moyo Ng'wela.”

¹⁸Haho na haho gūlagala kūfuma ū kū miso gakwe, magīnhū ga kūbiza gītī magambala, wandya hangī ū kūbona, ūbūūka ūbatīījiwa.

¹⁹Hūna ūlya shilīwa, ūpandīka nguzu. Ū Damasko akashinga ikanza lya shikū ndebe, alī hamò nabo a bahemba.

²⁰Atadīlile wandya kūyūlomeela ū mu masinagogi; gīkī, “Ū Yesu hū ng'wene ū Ng'wana o ng'wa Mulungu.”

²¹Pye abo bang'wigwaga būyūkumya balīhaya, “Tūhaya ū ng'wenūyū h'ūyo walūbaluhyaga ī Yelusalemu abo bakūlīlamyaga ī lina lyenīlī, nū kūūnū wizile kūbatunga abatwale kū bagabīji bataale?”

²²Alīyo ū Saulo ongeja kūbiza na nguzu, a Bayudaya ba Damasko ūyūbahuumūja hape hape, ūlū alīboolekeja gīkī ū Yesu hū ng'wene ū Kilisito.

²³Aho jabīta shikū ningī, a Bayudaya būsīgana mhayo gwa kūmūlaga!

²⁴Būyūdīla balang'hanile mu welwa ng'holò a ha mita līīmi na būjikū, gīkī balandime bamūlage! Kwike ū Saulo ūbūmana ū būsīgani wabo.

²⁵Hūna a bahemba bakwe būntūūla mu shigabbu makanza ga būjikū, būnsheepeleja ng'widilisha lya mu ndugu, būng'wicha.

²⁶Aho washika ī Yelusalemu ūgema ū kwisangīja ū mu bahemba, alīyo pye a bose būng'ogoha, batazunije ī gīkī walī ng'hemba ng'hana.

²⁷Kūshisha nose Balinaba ūnsola, ūntwala ū kū batūng'wa, ūūkabawīla ūmo akamonela ū Seeba aho alī mu nzīla, na gīkī ū Seeba akayomba nang'hwe; pyī nī ya kūlomeela na būgimu mu lina lya ng'wa Yesu aho walī Damasko.

²⁸Hūna būng'wanukūla ū mu būsangī wabo ī Yelusalemu, wandya kūyingīla na kūfuma hamò nabo; nū kūlomeela ūyūlomeela hape hape mu lina lya ng'wa Seeba.

²⁹Akayūdīla akūbasomboolelaga a Bayudaya ba Shiyunani, na kwihalalīja nabo; nose bandya kūkooba nzīla ya kūmūlaga.

³⁰Alīyo aho bagūmana a badūgū, būntwala Kaisalia; būūkanūmbūlīja kūja Taso.

³¹Hūna lūūlū ī kanisa yūbiza yalembeela hose pyī ū mu Būyudaya nī Galilaya, nī Samalia. Yongeja kūkūla na kūbiza na nguzu, kūnū īkūshimīzīlaga mu logohano lwa ng'wa Seeba, na kūlūngūjiwa na Moyo Ng'wela.

³²Makanza malebe ū Petelo wandya kūja akūbītaga būlī ipandī, nose ūūkashika kū beela bikalaga Luda.

³³Ūnsanga koi munhū ūmò, lina lyakwe Ainea; walī na myaka īnaane alī mu būlīīlī kūlwa būsaatu bo kūpola mīlī.

³⁴Ū Petelo ūng'wīla gīkī, “Ainea, ū Yesu Kilisito wakūpījaga, būūkaga ūbūbeeje ū būlīīlī wako.” Ng'hana ūbūūka haho na haho.

³⁵Aho bamona pye a bazengi ba Luda na Shaloni, būngalūkīla Seeba.

³⁶Walīho ng'hemba mu Yopa, lina lyakwe Tabiza, makūlū gaho Dolika;[1] ū nshīke ng'wenūyo walī akangīlīgije ū mu shītwa ī shawiza, hangī walī ng'wiza ng'holò kalalamba!

³⁷Ū mu shikū jenījo ūsaata, ūzumalīka. Aho bamala ū kūng'ooja, būntūūla kū chumba sha kū golofa.

³⁸Ī Luda yalī hihī nī Yopa, na lūūlū īkī a bahemba baalī bigwa gīkī ū Petelo walī kwenūko, būtūma koi banhū babīlī, būūkang'wikūmbīlīja balīhaya, “Ūtizūdīla ū kwiza ūko tūlī.”

³⁹Ū Petelo ūbūūka, ūja nabo. Aho washika ko, būntonga ū kū chumba sha kū golofa, pye a bachīlwa bīmīīla bampīndije, balīlīla kūnū balīng'oolekeja ū Petelo ī shizwalo nī myenda īyo walī wabeeja ū Dolika aho walī ataalī hamò nabo.

⁴⁰Ū Petelo ūbafunya hanze pye a bose. Hūna ūtuja mazwi ūlomba, aho wamala ūgūgalūkīla ū mīlī ūhaya, “Tabiza, būūkaga!” Ūloleecha a miso gakwe; aho wamona ū Petelo wigasha.

⁴¹Nang'hwe ūndima nkono ūngūngūmūla, ūbitana a beela na a bachīlwa ūng'winha kūbo, wapīlaga.

⁴²Ū mhayo gwenūyo gūkumūka pye a hose ū mu Yopa, būnzunya Seeba.

⁴³Ū Petelo wikala makanza malīhu ū mu Yopa ng'wenūmo, ha ng'wa Simoni nkomi wa makūnza.