Read Sukuma Bible 2015 – Bibilia Ilagano Lya Kale 2015 Balumi 1 Bible Online

Balumi 1 - Sukuma Bible 2015 – Bibilia Ilagano Lya Kale 2015 bible

Balumi 1

¹Nene Paulo nsese o ng'wa Kilisito Yesu, ūyo nitanwa kūbiza ntūng'wa, nguno nakomilwe kūlwa nīmo gwa Ng'hūlū Jawiza ja ng'wa Mulungu,

²Ījo ū Mulungu walī wajiisagīja kūfuma kale mu nzīla ya bahangi bakwe, mu shandīkwa sheela.

³H'ī jene ī ng'hūlū ja Ng'wana wakwe, ūyo ū mu kabyalīlwe ka mu mīlī afumile mu lūganda lo ng'wa Daūdi,

⁴ng'wene Yesu Kilisito Seeba wise, ūyo kūlwa kūjūūka kwakwe kūfuma mu bafu, akoolechiwa mu būdūla bo ng'wa Moyo wa wela, gīkī alī Ng'wana wa ng'wa Mulungu.

⁵Hū ng'wene ūyo mulī we twanukūlile shigongo na nīmo gwa būtūng'wa kūlwa mahanga gose; gīkī ū mu lina lyakwe banhū bose bazunye na babize bigwi.

⁶Na a bing'we mulī bamò babo, abo Yesu Kilisito abitanile;

⁷bose abo mulī Lumi, abo Mulungu amutogilwe, na wang'witana kūbiza beela: Shigongo na mhola shibize hamò ning'we kūfuma kūlī Mulungu Sīswe, na kūfuma kūlī Seeba Yesu Kilisito.

⁸Ū mhayo gwa kwandya nalīnūmba ū Mulungu wane mulī Yesu Kilisito kūlwa nguno ying'we bose pye, nguno ū kūzunya kwing'we kūkūjaga kūkumūchiwa hose pyī ū mu sī.

⁹Ū Mulungu ūyo nakantūmamīlaga na moyo gwane gose mu nīmo gwa kūlomeela Ng'hūlū Jawiza ja Ng'wana wakwe, alī nkaanīji wane gīkī būlī gwa nakūng'wizūkagwa a bing'we.

¹⁰Ū mu kūlomba kwane būlī gwa nakūlombaga gīkī, ūlū yūdūlīka ū mu shikū jenīji, napandīke ng'wanya gwa kūshimīza lūgendo lwawiza gīt'ūmo Mulungu atogelilwe, nize ūko mulī.

¹¹Nguno nalī na ng'hūmbū ja kūmubona nang'winhe shakwinha sha kūfuma kūlī Moyo, mubize na nguzu ja kwīmīīla.

¹²Hū kūhaya a bose tūguzuhiwe mu nzīla ya kūzunya, ū kwing'we nū kwane.

¹³Ali lūūlū badūgū bane, natogilwe ng'witegeleje gīkī, jakwīlaga ī ng'hangala ja kūmanūgema ū kwiza ūko mulī, nū kwene napandīke matwajo gīt'ūmo nakūpandīkīlaga kū mahanga gangī; alīyo nataalī nachaamilwe kūshisha nī lelo īyī.

¹⁴Ū nene nalī na būgasa kū banhū bose, babize Bayunani nūūlū ba mahanga gangī; babize ba masala nūūlū bachilū chilū.

¹⁵Nose ū nene ī ng'hūmbū jane, jilī kūmulomeela ī Ng'hūlū Jawiza na a bing'we abo mulī Lumi.

¹⁶Nguno ū nene natīko kūjibonela minala ī Ng'hūlū Jawiza, īkī ī joi hū jilī būdūla bo ng'wa Mulungu kūlwa kūmpīja ose ose ūyo ūzunya; kwandīja Bayudaya, na a ba mahanga a gangī.

¹⁷Nguno ū mujo būkoolechiagwa būtūngīlīja bo ng'wa Mulungu, kwandīja mu kūzunya na kūkalīkīja mu kūzunya, gīt'ūmo gwandīkilwe gīkī, “Ū ntūngīlīja akūbiza mpanga kūlwa kūzunya.”

¹⁸Alīyo ū būpelanu bo ng'wa Mulungu būkundūlīlilwe kūfuma ng'wigūlū kūlwa nguno ya būkenaagūji bose, na shibi sha banhū abo bakatūmamīlaga būbi wabo kwīfukīīla ī ng'hana.

¹⁹Nguno ī mihayo ya ng'wa Mulungu īyo īmanīkile, īlīho yoolechiwe hape ū kū būtongi wabo, Mulungu ng'wenekīlī ayoolekije.

²⁰Nī mihayo yakwe īyo ītī ya kūbonwa, gītī būdūla bokwe ū butashilaga, nū būmulungu bokwe; ī yenīyo nayo īdūgije kwitegelejiwa hape mu nzīla ya kūshibona ī shikolo īsho ashibeegije kūfuma ha kūseeng'wa kwa sī. Nose batī na nzīla ya kwibūūlīla!

²¹Nguno nūūlū baamana ū Mulungu, nahene yaya ū kūnkūja gīkī alī Mulungu, nūūlū kūnūmba yaya. Alīyo hū babiza babūdigisīīla gete ū mu kiganikīle kabo, nū būchilū chilū bo mung'holò jabo būkongejaga kūbiza giiti!

²²Ū mu kwikumīlīja kwabo gīkī balī na masala, hū bakongejaga kūbiza babbūūlī.

²³Nī likūjo lya ng'wa Mulungu ūyo atīko kūkenaagūka, bakalīgalūchaga kūbiza mu suso ya shiikolile sha banhū abo bakakenaagūkaga, na sha noni, na shiinū ja magūlū ane na ja kwigwesa ha sī.

²⁴Hūna lūūlū kūlwa yose yenīyo, ū Mulungu abalekanīgije bashimīzīle mu būsoso wa kwikūmva kwang'holò jabo, bikale bakwikenaagūjaga ikūjo lya mibīlī yabo boi benekīlī.

²⁵A ha ng'wanya gwa kūshimīzīla mu ng'hana ya ng'wa Mulungu, būbiza ba kūshimīzīla mu būlomolomo, mu mihayo ya kūlamya shiseeng'wa na kūshitūmamīla, kūtinda kūnamya ū Nseemi, ūyo alī nkumīlījiwa wa welelo bose: Alichene.

²⁶Kūlwa yose yenīyī, ū Mulungu abalekanīgije bikale mu nhūngwa ja malofu ja kwikūmva kwa minala. Kūshisha na a bakīma babo bagalūcha ī nhūngwa, būjileka ī ja kūgūtūmamīla ū mīlī ūmo kalī kasūmbīlwe kaaho na kale, būsola jitī ja kasūmbīlwe kaaho na kale.

²⁷Na a bagosha hū gūmò, nabo bajileka ī nhūngwa ja kūsangīla na bakīma ūmo kalī kasūmbīlwe kaaho na kale, būbiza ba kwiyikūmva boi kū boi. Kūshisha nose bagosha bakwiyītīlaga mihayo ya minala na bagosha bichabo; ū mu gīko bakūbizaga baanukūji ba mheela īyo ībigeleelilwe mu mibīlī yabo boi benekīlī, kūlwa būkenaagūji wabo!

²⁸Hūna lūūlū, kūlwa kūbona gīkī batī na nguno ya kūmana ū Mulungu, nang'hwe ū Mulungu abalekanīgije bikale mu masala mahūganu, bīīte mihayo īyo ītigelile kwītwa.

²⁹Balī banhū abo bokalile būbi wa būlī mbika, būsoso, kwikūmva kwabūbi, wilu, būbūlagi, wilwisha, būlemba lembi, būlembekeja, na būsīgani.

³⁰Hama basong'hanya, nīyo batantogagwa ū Mulungu. Banhū b'ibengwe, badooshi, bikumīlīja, bandya ba mihayo yabūbi, hangī batī na wigwi kū babyaji babo.

³¹Bachilū chilū, babūlagi ba būlagane, naabo batamanile kūsaatwa banhū, nūūlū kūchīla shigongo.

³²Nīyo hangī nūūlū īkī bamanile ūmo ahelelile ū Mulungu, ī gīkī abo bakīītaga īlī gīko bigeleelilwe nsango gwa kūcha, nahene batagelelaga dūhū a ha kwīyīta ī yenīyo, alīyo bakizunīlījaga nabo abo bakīyītaga!