Read Sukuma Bible 2015 – Bibilia Ilagano Lya Kale 2015 Balumi 10 Bible Online

Balumi 10 - Sukuma Bible 2015 – Bibilia Ilagano Lya Kale 2015 bible

Balumi 10

¹Badūgū bane, ī ng'hūmbū jane ū mung'holò yane, nū būlombi ūbo nakūnombaga ū Mulungu kūlwa nguno yabo būlī gīkī, bapījiwe.

²Nguno ū nene nalībakaanīla gīkī balī na būkalalwa būtaale ū kūnkooba ū Mulungu, kwike ītī mu witegeleja!

³Batabūmanile ū būtūngīlīja bo ng'wa Mulungu, bakūkoobaga kwīmīīla ha būtūngīlīja wabo boi benekīlī; balemile ū kwidohya gīkī babize ha sīlīlī ya būtūngīlīja bo ng'wa Mulungu.

⁴Alīyo ū Kilisito h'ūyo alī būkalīkījo bo shilagīlo, ībize būlī ng'wene ūyo alī na kūzunya adūle kūbalīlwa būtūngīlīja.

⁵Nīyo ū Musa ayandīkile ī mihayo ya būtūngīlīja bo kūfuma mu shilagīlo; ahayile gīkī, “Ū munhū wa kwīyīta ī yenīyī akūbiza mpanga muyo.”

⁶Alīyo ū mhayo ūyo gūfumile mu būtūngīlīja kūlwa kūzunya gūlīyomba gīkī, “Ūtizūhaya ū mung'holò yako, ‘Nani akūlinha ū ng'wigūlū?’” (Hū kūhaya kūjūng'wenha mu sī ū Kilisito).

⁷“Nūūlū, ‘Nani akwika kūlimu?’” (Hū kūhaya akanjūūche ū Kilisito kūfuma mu bafu).

⁸Nose ī gete gūlīyomba ginehe? “Ū mhayo gūlī hihī nang'ho, nīyo gūlī mu nomo na mung'holò yako.” Hū gwene ū mhayo gwa kūzunya ūyo tūkūgūlomeelaga.

⁹Nguno ūlū ūnkaanīla Kilisito na nomo gwako, na ūzunya ū mung'holò yako gīkī ū Mulungu akanjūūcha kūfuma mu bafu, ūkūpīla.

¹⁰Ū munhū akūbalīlwa būtūngīlīja kūlwa kūzunya ū mung'holò yakwe, na akūpījiwa kūlwa kūkaanīla na nomo gokwe.

¹¹Īkī ī shandīkwa shihayile gīkī, “Būlī ng'wene ūyo ūnzunya atūding'wa minala.”

¹²Būtīho būsolanhyiwa a ha gatī ya Bayudaya na a mahanga a gangī, ū wei alī Seeba wa bose, nsabi kū bose abo bakanīlīīlaga.

¹³“Nguno būlī ng'wene ūyo ūlīlīlīīla ī lina lya ng'wa Seeba akūpījiwa.”

¹⁴Ī gīsī lūūlū, badūgije kūnīlīīla ginehe ūyo batanzunije? Nūūlū badūgije kūnzunya ginehe ūyo bataalī kwigwa ng'hūlū jakwe? Na hangī badūgije kwigwa ginehe ūlū batalomeelilwe?

¹⁵Na bakūlomeela ginehe ūlū batatūmilwe? H'ūmo gwandīkīlilwe; gīkī, “Galī masoga shido a magūlū ga balomeeji ba Ng'hūlū Jawiza!”

¹⁶Alīyo h'ītī gīkī a bose bajizunije ī Ng'hūlū Jawiza; nguno ū Isaya alīhaya gīkī, “Seeba nani ūyo ayīzunije īyo tūkwīlomeelaga?”

¹⁷H'ūmo īlī, ū kūzunya gūkafumaga mu kwigwa, ū kwigwa nako gūkafumaga mu mhayo go ng'wa Kilisito.

¹⁸Alīyo leki nabūje; Angū, bataalī ū kwigwa? Bigwa no nīyo, “Ī lilaka lyabo līsambaalile hose pyī ū mu sī; nī mihayo yabo īshikile kū būgelelo bo sī.”

¹⁹Nūūlū hamo shi nahaye gīkī, a Baisilaeli batamanile? Alīyo ī soolo ya mhayo ū Musa alīhaya gīkī, “Nakūmudimya wilu kūlw'ihanga īlo lītī ihanga; na nakūmupelanya kūlw'ihanga īlo lītī na witegeleja.”

²⁰Nū Isaya nang'hwe alīhaya mu būgimu; gīkī, “Baanipandīkile abo baalī batūnikoobaga, naabonekanile ū kū banhū abo baalī batūnikoobaga.”

²¹Lelo ū kū Baisilaeli, alīhaya gīkī, “Nakūdīlaga līīmi ji nambile makono gane kūbitana banhū bashitiigwa na bahalalī!”