Read Sukuma Bible 2015 – Bibilia Ilagano Lya Kale 2015 Balumi 11 Bible Online

Balumi 11 - Sukuma Bible 2015 – Bibilia Ilagano Lya Kale 2015 bible

Balumi 11

¹Kolaga hamo nahaye gīkī ū Mulungu wabaponya gete a banhū bakwe? Gūtī gīko na hado yaya! Manīlagi dūhū ī gīkī, ū nene ūyū nalī Ng'wisiraeli, wa būbyīle bo ng'wa Abulahamu, mu lūganda lo ng'wa Benjamini.

²Ū Mulungu atabaponije na hado yaya a banhū bakwe abo abamanile kūfuma kale. Nūūlū hamo mutamanile ūmo shandīkwa shilīng'hayīla Eliya, aho wanombaga Mulungu alībahaya Baisilaeli; gīkī,

³“Seeba baabamalile kūbabūlaga a bahangi bako, nī myalīlo yako bīkambagūla, nene dūhū iyene naasaagile; nīyo nū nene balībūkooba ū būpanga bone!”

⁴Ī lishosho lya kūfuma ng'wigūlū līkang'wizīīla līlīhaya ginehe? “Nalī na banhū bane shihūmbī mpungatī nisaagīja, abo bataalī kūntugīja mazwi Baali!”

⁵H'ūmo īlī nū ng'wikanza īlī, būlīho būshiigo ūbo būsolilwe kūlwa shigongo.

⁶Nose ūlū īlī kūlwa shigongo, hū kūhaya shitīho shītwa ho a henaho, nguno numho ī shigongo shitūbiza shigongo hangī.

⁷Numho lūūlū hū kūhaya ginehe ho? Gūlī gīkī, īsho bakakoya koyaga kūshikooba na būkalalwa a Baisilaeli, bataalī ū kūshipandīka. Alīyo a basolwa bashipandīka, lelo a bangī būgūna.

⁸Gīt'ūmo gwandīkilwe gīkī, “Ū Mulungu wabinha moyo gwa būhūūlū hūūlū, na miso gatadūgije kūbona, na matū gatadūgije kwigwa nūūlū hado, kūshisha lelo īyī!”

⁹Nū Daūdi alīhaya gīkī, “Leka ī shilīwa shabo shibize lūtu, shibagwashe; shibize mheela yabo na shibipamye!

¹⁰Na a miso gabo gabbokule batizūbona, nī migongo yabo bagung'humiwe ilalī!”

¹¹Nūūlū hamo nahaye gīkī bagwa ilalī, batūbūūka hangī? Gūtī gīko na hado yaya! Alīyo ū būhūbi wabo būkenheleja ū būpīji būshike kū banhū ba mahanga, hūna ū mu mhayo gwenūyū a boi babize na wilu.

¹²Ī gīsī ū būkenaagūji wabo ūlū wabiza būsabi kū ba mu sī, nū būlemehazu wabo wabiza būsabi kū mahanga, al'ū wiza wa kūshikanyiwa kwabo lūūlū ahene būkūshika ginehe!

¹³A bing'we ning'we banhū ba mahanga leki namuwīle, ū nene īkī nalī ntūng'wa kūlwa nguno ya banhū ba mahanga, nagūyegelile ū nīmo gwane.

¹⁴Natogilwe babize na wilu a banhū b'ihanga lyane ū mu mīlī, ūlū yūdūlīka bamò babo bapīle mu gīko.

¹⁵Nguno ū kūponyiwa kwabo ūlū kūlenheleja kwegelejiwa kwa banhū ba mu sī; al'ū kwanukūlwa kwabo lūūlū ū kwene kūkūbiza kī, ūlū ītī būpanga kūfuma mu bafu?

¹⁶Īkī a matwajo ga wandījo ūlū galī meela, numho galī meela pye na a gangī, nū nji ūlū gūlī ng'wela, na a matambī gakūbiza meela.

¹⁷Alīyo ūlū matambī gangī gakabbutwa gīnjiwa ho, hūna ū bebe ūyo walī nzeituni gwa mu mapoolu wiza ūdimanījiwa hoi, nang'ho wandya kong'heela būnooli hamò nago a matambī a gangī kūfuma ū mu nji gwa nzeituni,

¹⁸hū kūhaya ūtikumīlījage kūnū ūkūgadalahaga a matambī genayo. Nguno ū mu kwikumīlīja kwako shiigelile wizūkwe gīkī ūtī bebe ūyo ūgūbūkije ū nji; ū nji hū gūkūbūkije ū bebe.

¹⁹Ū bebe ūshikile nūūlū kūhaya gīkī, “A bana matambī benabo bakīnjiwa nūtūūlwa ho nene!”

²⁰Na ng'hana ūlītūngīlīja, alīyo gakīnjiwa ho kūlwa būtūzunya; ū bebe nang'ho wīmīīlile ho kūlwa kūzunya, hūna lūūlū ogohaga; ūtizigīmba gīmba.

²¹Nguno ū Mulungu ūlū atagalekile a matambī a gaho na kale, nū bebe atūkūleka ho!

²²Ū mu mhayo gwenūyo shibonage ī shigongo sha ng'wa Mulungu, nū būkalī bokwe; ū kū bagwile nkalī no. Alīyo ū kūlī bebe, ū Mulungu alī na shigongo, ūlū ūlembeela mo ū mu shigongo shenīsho. Nguno ūlū ītī chene nū bebe ūkūbbutwa ūponyiwe!

²³Na a babo ūlū bīnga ū mu būtūzunya wabo bakūshoshiwa, bize badimanījiwe hangī; nguno ū Mulungu adūgije ū kūbashosha ho hangī.

²⁴Manīlaga dūhū gīkī, ū bebe ūkabbutwa kūfuma ha nzeituni gwa kū mapoolu, ūdimanījiwa ha nzeituni gwa kūlīng'wa, gūbiza gwītwa mhayo ūyo gūtī gwaho na kale; hū kūhaya ū kū boi gūlī nogu no ū gwa kūdimanījiwa hangī a ha nzeituni gwabo na kale!

²⁵Nguno badūgū bane gūlīho mhayo gwa mbisīla, ūyo natatogilwe muleke ū kūgūmana, nose ng'wikale mukwikumīlījaga. Balīho Baisilaeli bamò bagūnu, nīyo bakwikala gīko kūshisha līng'we ī lisaabu lya banhū ba mahanga a bingīji.

²⁶Hūna na a Baisilaeli a bose bakūpījiwa, gīt'ūmo gwandīkilwe gīkī, “Nkomooji akūfuma Sayuni, akūng'wīngīja ū Yakobo ū būgomi bokwe.

²⁷Ū wenūbū hū būlagane bone nabo, ūlū nūbīngīja ī shibi shabo.”

²⁸Ū mu kajīle ka Ng'hūlū Jawiza, balī banishi kūlwa nguno ying'we, alīyo ū kū mhayo gwa būsolwa, balī baganja kūlwa nguno ya bakūlūgenji.

²⁹Nguno ū Mulungu atī na magalū galū ū mu kinhīle nū mu nhūmamīle yakwe.

³⁰Īlī gīt'ūmo ng'walī bashitiigwa ū kūlī Mulungu a bing'we ī kale; alīyo ī haha mukūchīlagwa shigongo, kūlwa būshitiigwa wabo.

³¹H'ūmo gūlī nū kū bene ī haha, nabo balī bashitiigwa kūlwa nguno ying'we, gīkī nabo babize ba kūchīlwa shigongo, gīt'ūmo bing'we mukūchīlagwa shigongo.

³²Nguno ū Mulungu abatūūlile pye a banhū ha sīlīlī ya būshitiigwa, ooleche gīkī alī nchīīji wa shigongo kū banhū bose.

³³Ee, būshimu wa būsabi bo masala ga ng'wa Mulungu na witegeleja bokwe; a kalamulīle kakwe katī ka kūbonwa, nī nzīla jakwe jikīlile kamanīlwe!

³⁴“Nguno nani ūyo walī alīmanile Ī liganiko lya ng'wa Seeba? Nūūlū nani ūyo walī nganikīji wakwe?

³⁵Nani ūyo wang'winha shikolo, gīkī igeleelilwe ashokejiwe nang'hwe?”

³⁶Nguno pyī ī shose shifumile kūlī wei, shilīho kūlwa nguno yakwe, nīyo shilī shakwe. Ikūjo lībize lyakwe shiku jose: Alichene!