Read Sukuma Bible 2015 – Bibilia Ilagano Lya Kale 2015 Balumi 12 Bible Online

Balumi 12 - Sukuma Bible 2015 – Bibilia Ilagano Lya Kale 2015 bible

Balumi 12

¹Ali lūūlū badūgū bane, nalīng'wikūmbīlīja kūlwa shigongo sha ng'wa Mulungu; gīkī, ifunyagi ī mibīlī ying'we ībize shitambo shipanga na sheela sha kūnyeja Mulungu, hū kene a kalamīje king'we ako kigeleelilwe.

²Yaya ū kūlondeela nhūngwa ja mu sī, alīyo galūchiagwi; a maganiko ging'we gītwe kūbiza mapya. Mudūle kwīyitegeleja īyo ayītogilwe ū Mulungu; ī yawiza na ya kūyeja, hangī ītī na shisembo.

³Nguno ū nene ninhwa būdūla kūlwa kūchīlwa shigongo; na lūūlū nalīng'hūgūla būlī ūmò wing'we gīkī, yaya ū kūbiza na maganiko ga kwigūngūhya kūtinda ūmo īng'wigeleelilwe kwiyiganikīla, alīyo ng'wiganika mu widohya, gīt'ūmo Mulungu angelekelile kūzunya būlī ng'wene.

⁴Īkī īlī gīt'ūmo tūlī na mabudīka mingī mu mīlī gūmò, hama pye a mabudīka genayo gatī na nīmo gwa mbika īmò dūhū;

⁵H'ūmo īlī nū kū bise abo tūlī bingī; ū mulī Kilisito tūlī mīlī gūmò, būlī ng'wene alī ūmò wa biye.

⁶Nguno tūlī na shakwinhwa sha wikīla kīle, būlī ng'wene na kwīlūkīlwa kwakwe; ū wa būhangi ni ahangage gīt'ūmo kūzunya kwakwe kūlī.

⁷Nūūlū ni būgunanhi abize mo ū mu būgunanhi, ū nangi mu būlangi;

⁸nū nganikīji abize mu būganikīji, ū ng'winhi inhe mu kwifunya, ū ntongeeji atongeele mu būtūngīlīja, nū nchīīji wa shigongo nang'hwe īīte mu būyegi.

⁹Ū būtogwa būbize būtī na wibeeleja, bogohagi ū būsoso, mudimane na yawiza.

¹⁰Itogagwi mu būtogwa bo nyadūgū, būlī munhū ankūje ng'wiye tame.

¹¹Hama yaya ū kwinogolelwa ū mu kūbiza bagoogo, ntūmamīlagi ū Seeba na moyo gwa būkalalwa.

¹²Yegelagi ū mu kwisagīlwa kwing'we, bizagi biyūmīlīja nūūlū mulī mu kūluhiwa, lombagi gwa gwa gwa mu būkomeezu.

¹³Ng'ūbagunanha a beela, bizagi biza ng'holò.

¹⁴Abo bakūmuluhyaga ng'ūbalombela lubango, lombelagi lubango yaya ū kūzuma.

¹⁵Yegagi nabo abo bakūyegaga, abo bakūlīlaga līlagi nabo.

¹⁶Igwīndanyagi ū mu kikalīle, yaya ū kwikala ng'wiganika mihayo mitaale, alīyo ng'wīdīlīla nī mido mido; nū kwikumīlīja yaya.

¹⁷Na hangī yaya nūūlū kūshosha yabūbi kūlwa yabūbi; ng'ūbīītīla yawiza pye a banhū.

¹⁸Ūlū yūdūlīkana a bing'we koobagi kūbiza mu mhola nabo pye a banhū.

¹⁹Yaya ū kwimalīla shiilī a bing'we batogwa, alīyo lekanagi nabo ū būpelanu, nguno yandīkilwe gīkī, “Ū kūmala shiilī gūlī nīmo gwane, nene nakūlīpa,” alīhaya Seeba.

²⁰Alīyo ūlū ng'wanishi wako atuubile ng'winhage shilīwa, nūūlū akolilwe nota ng'winhage minzī ang'we; nguno ū mu kwīta gīko ūkūbiza ūlīntūūlīla makala ga moto a ha ntwe gokwe.

²¹Yaya ū kūheewa na būbi, alīyo būheebagi ū būbi mu yawiza.