Read Sukuma Bible 2015 – Bibilia Ilagano Lya Kale 2015 Balumi 13 Bible Online

Balumi 13 - Sukuma Bible 2015 – Bibilia Ilagano Lya Kale 2015 bible

Balumi 13

¹Būlī munhū shing'wigeleelilwe kwidohya ū kū basugi ba sī, nguno būtīho būsugi ūlū ītī mu kahelele ka ng'wa Mulungu, nū būbo būlīho nabo būtūūlilwe na Mulungu.

²Nose ūyo akūgomelaga būsugi, ū ng'wenūyo akūgūgomelaga mhayo go ng'wa Mulungu; hama abo bakagomaga bakiyenhelejaga boi benekīlī kūgwa mu nsango.

³Nguno a basugi batī na lyogohya kū shītwa shawiza, alīyo kū mihayo yabūbi; ūtogilwe kūleka kūng'ogoha nsugi? Beejaga yawiza akūkūkumīlīja.

⁴Nguno ū wei alī ntūmami o ng'wa Mulungu kūlwa nguno yako, ū mu shītwa ī shawiza. Alīyo ūlū ūlī ng'wīti wa mihayo yabūbi, ogohaga; atadimile lūshū dalali. Ū wei ntūmami wa ng'wa Mulungu, maji wa shiilī kūlwa kūng'winha nsango ūyo alī na shītīle shabūbi.

⁵Hūna lūūlū, shiigelile kwidohya; ītī kūlwa nguno ya kogoha nsango dūhū, alīyo nū mu moyo mubize na wiyangūji wela.

⁶H'ī nguno yene mukatobaga na goodi, nguno a boi balī batūmami bakomeezu ba ng'wa Mulungu, pye a makanza bakagwītaga mu būkomeezu ū nīmo gwenūyo.

⁷Ng'ūbinha pye a banhū īyo yigelile kūbinha; ū wa goodi goodi, ū wa mheela mheela, ūyo igelile kogohwa ng'ogohagi, nū yūyo igeleelilwe ikūjo nkūjagi.

⁸Yaya ū kūbiza na būgasa na munhū ose ose, ūlū ītī kwitogwa dūhū; nguno ūyo antogilwe ng'wiye, ū ng'wenūyo nshikīlīja wa shilagīlo.

⁹Īkī ūmo gūhayīlilwe gīkī, “Yaya ū kūshihya, Yaya ū kūbūlaga, Yaya ū kwiba, Yaya ū kwikūmva;” nūūlū shūbiza shilīho na shilagīlo shingī, pyī ī shose shikūbanījiwe mu mhayo ūyo gūhayile gīkī, “Ntogagwe nzenganwa ng'wiyo gīt'ūmo witogelilwe bebe ng'wenekīlī.”

¹⁰Ū būtogwa būtīko kūng'wītīla yabūbi ū nzenganwa; hū kūhaya ū būtogwa būlī būshikanu wa shilagīlo.

¹¹Hama ūlū mulīīta ī gīko managi gīkī ī haha tūlī ng'wikanza lya kūmisha kwīnga mu tūlo, na kūbūūka; nguno ī haha ū būpīji wise būlī hihī kūtinda aho tūkandīja kūzunya.

¹²Bojaga ū būjikū, būlī hihī kwangalūka, na lūūlū tūshiponyagi ī shītīle sha mu giiti twitunge shilanga sha līīmi.

¹³Tūshimīzagi gīt'ūmo shiigeleelilwe mu kashimīzīle k'ikanza lya līīmi, ītī mu būlaku nūūlū būng'wi, ītī mu būjingi nūūlū kwikūmva kwabūbi, ītī mu wilemeelwa nūūlū wilu.

¹⁴Alīyo nzwalagi Seeba Yesu Kilisito; yaya ū kwikala ng'wiganika kwīta īyo īfumile mu kwikūmva kwa mīlī.