Read Sukuma Bible 2015 – Bibilia Ilagano Lya Kale 2015 Balumi 14 Bible Online

Balumi 14 - Sukuma Bible 2015 – Bibilia Ilagano Lya Kale 2015 bible

Balumi 14

¹Ū ngokolo mu kūzunya ng'wanukūlagi, kwike ītī mu kūnamula a maganiko gakwe.

²Nguno hamo ūngī adūgije kūbiza akalyaga būlī shikolo ū mu kūzunya kwakwe, alīyo ūngī akalyaga makūbī dūhū īkī ngokolo.

³Ūyo akalyaga yaya ū kūndalaha ūyo atalyaga, nū yūyo atalyaga yaya ū kūnamula ūyo akalyaga, nguno ū Mulungu ang'wanukūlile.

⁴Ū bebe ūlī nani nose ūkūnamulaga ntūmami o ng'wa munhū ūngī? Ū wei akwīmīīla, nūūlū akūgwa kū būtongi bo ng'wa ise būgonzo; na ng'hana akwīmīīla dūhū, nguno ū Seeba adūgije kūng'wīmīlīja.

⁵Alīho munhū ūngī akūgije lūshikū lūlebe kūtinda lūngī, alīyo alīho ūngī ajibalile pyī ī shikū gīkī jilenganīlile; nose ībeelelile būlī munhū abize nshikanu ū mu maganiko gakwe.

⁶Ūyo akalonjaga mihayo ya shikū akīītaga gīko kūlwa ng'wa Seeba, nū yūyo akalyaga nang'hwe akalyaga kūlwa ng'wa Seeba, īkī akanūmbaga Mulungu; pyī nū yūyo atalyaga, nang'hwe atalyaga kūlwa ng'wa Seeba īkī akanūmbaga Mulungu.

⁷Nguno atīho nūūlū ūmò wise ūyo alī mpanga kūlwakwe wei ng'wenekīlī, nūūlū atīho wa kūcha kūlwakwe wei ng'wenekīlī.

⁸Nose hū kūhaya ūlū tūlī bapanga, tūlī bapanga kūlwa ng'wa Seeba, nūūlū tūcha nahene numho tūlīcha kūlwa ng'wa Seeba. Hūna lūūlū, tūlī ba ng'wa Seeba nūūlū tūkabiza tūlī bapanga, nūūlū tūcha.

⁹H'ī nguno yene ū Kilisito akacha hangī ūjūūka, gīkī abize Seeba wabo a bafu na a bapanga.

¹⁰Ali lūūlū nibūlī ū bebe ūkūnamulaga ū ndūgūyo? Nūūlū nibūlī ūkūndalahaga ū ndūgūyo? Nguno pye a bose tūkwīmīīla kū būtongi w'isumbī lya ng'wa Mulungu lya kūlamulīla.

¹¹Gwandīkilwe gīkī, ‘Gīt'ūmo nalī mpanga;’ alīhaya Seeba, ‘Būlī izwi līkūnitugīja nene, na būlī lūlīmi lūkwibūūla hape kūlī Mulungu.’”

¹²Hū kūhaya būlī ūmò wise akwibūūla wei ng'wenekīlī, ū kūlī Mulungu.

¹³Nose tūtikalagi twilamula bise bike; alīyo ni yabeelela kūbiza na būlamuji bo kūleka kūchaamīka sha kūng'wipamya nūūlū kūngwisha ndūgūyo.

¹⁴Namanile gete, hama nīyo nalī na witegeleja gīkī ū mulī Seeba Yesu, shitīho shose shose īsho shilī shabūbi shoi shenekīlī dūhū. Alīyo ū kūlī munhū ūyo akūshibalaga gīkī shilī shabūbi, numho ng'hana shilī shabūbi ū kūlī we.

¹⁵Hūna lūūlū ūlū ūmpīnīhaja ndūgūyo kūlwa nguno ya shilīwa, numho ūtūshimīzīlaga ū mu būtongwa; ūtizūnkenaagūla kūlwa shilīwa shako ū munhū ūyo akachīlīlwa na Kilisito.

¹⁶Yaya ū kūwenheleja kūsondagūlwa ū wiza wing'we.

¹⁷Nguno ū būtemi bo ng'wa Mulungu būtī mihayo ya shilīwa na būng'wi, alīyo būtūngīlīja na mhola na būyegi mulī Moyo Ng'wela.

¹⁸Ūyo akantūmamīlaga Kilisito mu gīko akanyejaga ū Mulungu, na a banhū bakizunīlījaga nang'hwe.

¹⁹Hūna lūūlū, tūlondeelagi mihayo ya mhola na kwizenga būlī munhū na biye;

²⁰yaya ū kūgūkenaagūla ū nīmo go ng'wa Mulungu kūlwa nguno ya shilīwa. Na ng'hana pyī īsho shikalyiagwa shilī shawiza, alīyo shilī shabūbi ū kūlī munhū ūyo shikūng'wipamya ūlū ūshilya.

²¹Īlī chiza ū kūleka nūūlū kūlya nyama, nūūlū kūng'wa mvinya, nūūlū ni shikolo shingī īsho shishikile kūng'wipamya ndūgūyo.

²²Ū kūzunya kwako ūko ūlī nako, bizaga nako bebe ng'wenekīlī kū būtongi bo ng'wa Mulungu. Alī na lubango ūyo atibalīla būbi ū mu mihayo īyo ayanukūlile gīkī īlī yawiza.

²³Alīyo akūbalīlwa nsango ū wa kūlya mu kūsusanya, īkī atūlyaga mu kūsanya; nguno būlī mhayo ūyo gūtūfuma mu kūsanya shilī shibi.